10 nyied 31 hauh byonghngoenzlaj, bineix Vahcuengh Sawcuengh Suijbingz Gaujsi youq Cunghgung Nanzningz Siveij Dangjyaugauj, gungh miz 251 bouxgauj daj ndaw gih gak si caeuq Yinznanz daengj dieg daeuj camgya cogaep、cunggaep、gaugaep 3 gaep gaujsi. Baez gaujsi neix ciuq gij iugouz dangqnaj fuengzgaemh binghraq bwtndat de daeuj guh.

Ngoenz gaujsi de, Swcigih Minz- cunghveij fucujyin Veih Yungjhungz、ngeih gaep sinzsiyenz Cinz Hanvaz daengj lingjdauj daengz dieg gaujsi dangciengz vixyinx guhhong.

Vahcuengh Sawcuengh Suijbingz gaujsi dwg yiengh gaujsi swngjbu gaep, dwg yiengh sawqgauj suijbingz byauh- cunjva vah siujsoq minzcuz ndeu, sawq guh 4 bi nanz le, daengz bi 2016 hainduj baenz yiengh gauj bingzciengz ndeu. Mbouj hanh saimbwk、minzcuz、nienz- geij、yozliz、guh maz hong、vunz dieg lawz、vunz guek lawz daengj, byawz yaek bauqmingz couh gag dingh, gag bauq gijmaz daengjdaep.

（Cangh Haijyingh Vangz Yacangh）