Miuhhoih Goengbaekdaeq Bingzsiengz Si Sangsiz Cin daj Cingciuz doengh bi gaxlaeng haenx cienz daengz seizneix, aen hozdung neix youq gyae’gyawj cungj miz mingz, yingjyangj gig gvangq. Seiq- henz bak goengleix caenh miz aenmiuh Goengbaekdaeq dog, gij vunz bonjdeih cungj nyinhnaeuz Baekdaeq dwg boux saenz baujhoh bonjsaeh ak、gaiqgaiq cungj rox、yienghyiengh cungj guh ndaej daengz ndeu. Ndigah, moix bi ndwencieng coseiq, gyoengqvunz cungj bae cuengqcaeq Baekdaeq, maqmuengh Baekdaeq ndaej baujyouh gyoengqde. Ngoenz miuhhoih, gyoengq beksingq mboujdan cuengqcaeq Baekdaeq, lij guh gij gaicawx caeuq gak cungj hozdung guh’angq dem.

Geij bi neix daeuj, gij hozdung conzdungj miuhhoih youq daengx guek gak dieg cungj banh dwk nauhyied oen’oen, aen ciengzmienh miuhhoih Goengbaekdaeq Sangsiz caemh hoengh dangqmaz. Gij miuhhoih Goengbaekdaeq Sangsiz laeng ndwencieng coseiq cujyau miz gvaxbyaij、ciengj bauqva、bengcag、eu fwen、bau aendom、langhbaij sawsij mbawveh minzsug、baijok gij doxgaiq ndaej gwn miz daegsaek haenx、ngaizbakranz daengj lai cungj lai yiengh hozdung. Lij miz baenz buek vunzhek daj Bingzsiengz bonjdeih、Ningzmingz、Lungzcouh caiqlij Vet- namz daeuj ngonzyawj dem. Gij vunz dinfwngz dangdieg sien guh ndei song aen “bauqva baedyou” gonq, hozdung hainduj le, geijcib boux lwgmbauq itheij ram bauqva、diuq foux gyaeujgeizlaenz、roq laz roq gyong、 gingz fagcax Gvan’goeng、gingz aen daengloengz riengz diuzgai bae gvaxbyaij. Gij sing gyonglaz youq gwnzmbwn haprwenz bae, bauqrengh hix yiengj dwk goksatsat. Henz gai gyoengqvunz bouxcoz vunzlaux lwgnyez humx caenx ndaetfwdfwd, angq hemq gyukgyad, doxcanj cuengqcaeq bauqva baedyou, nauh- yied raixcaix. Baenz geij cien vunz youq Goengbaekdaeq siuyieng sax- caeq, mbaenjgouz baenz bi seiqgeiq cungj bingzan, fwnraemx ndaej yinz, biengzbingz an’onj, roxnaeuz mbaenjgouz miz lwglan lai、swngguen fatcaiz、mbouj bingh mbouj nanh daengj. Gij yizsiz neix heuhguh “mbaenj fuk”, daengz bi laeng miuhhoih lij aeu daeuj “ boiz fuk”. Gij vunz daeuj mbaenj fuk、boiz fuk haenx dingzlai gag dawz gaeqlix、byaek、laeuj daengj daeuj, caeq Baekdaeq sat le couh youq baihnaj aen miuh Goengbaekdaeq doxcomz, gaj gaeq cawj byaek, bet boux naengh guh daiz ndeu, gwn haeux gwn laeuj guh angq. Haenx deng vunz bonjdeih heuhguh “ngaizbakranz beksingq Goengbaekdaeq Sangsiz”.

Haujlai vunz cungj sibgvenq sien caeqbaiq bouxsaenz gonq caiq guh seng’eiq gaenlaeng, vunzlai caeuxcaeux couh ganj daengz gizneix genj dieg ndei bae ndacap lo. Ndigah aen haw miuhhoih Goengbaekdaeq caemh dwg aen haw hoengh guh gaicawx youzhaw nauhyied ndeu lo. Yienghneix nanz le, miuhhoih Goengbaekdaeq Sangsiz couh bienq- baenz aen ciet hunghoengh ranghdieg gvangqyub ndeu. De hix ndaej hoengzyiengz gij minzsug conzdungj vwnzva Cunghvaz minzcuz, youh gyoebbaenz cungj vwnzva binjbaiz ndeu, bienqbaenz cungj lijyouz swhyenz ndeu, sawj gij ginghci sevei diegneix ndaej hwngfat hwnjdaeuj.

Bi 2016, miuhhoih Goeng- baekdaeq Sangsiz ndaej senj haeuj swcigih daihroek buek feihyiz mingz- loeg.