“Gij doxliz ceiq gyae gwnzbiengz haenx mbouj dwg lix caeuq dai, dwg gou youq doiqnaj mwngz, mwngz dauqfanj loengh soujgih. ” Neix dwg miz vunz dawz gawq sei Daigoh’wj gaij daeuj gangjriu, gangj ndaej gig deng, neix couhdwg gij cingzgvang caensaed ciuhneix!

Caen dahraix, seizneix, soujgih cinwngz、dennauj bingzbanj, gaenq byaij haeuj cien gya fanh hoh, habsim hab’eiq gyoengqvunz. Youq gyawz seizbienh cuengqda baez yawj, seiqlengq cungj raen gyoengqvunz ngaemgyaeuj yawj soujgih, mboujlwnh bouxsai mehmbwk roxnaeuz bouxlaux lwgnyez, vunzlai caeuq soujgih cungj ndang mbouj liz ngaeuz, lumjbaenz yaepyet hix faen mbouj ndaej hai. Aen soujgih iqetet ndeu, hawj gyoengqvunz dawzyinx dangqmaz. Danghnaeuz, miz saek geij faencung aen soujgih mbouj youq ndaw fwngz, couh lumj saet hoenz lekmamx nei, daengx ndang mbouj cwxcaih.

Raeuz guhhong caeuq gwndaenj daengj haujlai saeh cungj aeu yungh soujgih, lumjbaenz yawj dunghcih caeuq sinhvwnz、caz caizliuh、guh gaicawx、ra baengzyoux、lwnhgangj simcingz…… Mbouj miz soujgih, haujlai saeh guh mbouj baenz rox- naeuz guh mbouj ndaej baenzneix vaiq baenzneix vei.

Hoeng, gou bonjfaenh cungj siengj liz soujgih gyae di, ndaejhoengq couh lai yawj di saw, yawj sawceij. Baez dwen daengz yawj saw, aiq miz haujlai vunz cungj naeuz seizneix dunghsin baenzneix fatdad, daihgya cungj haengj yawj sawdenswj lo, byawz lij bae yawj sawceij dem! Sawceij naek youh mbouj ndei dauqcawq dawz, ndigah dingzlai vunz haengj yawj sawdenswj.

Gou haengj yawj sawceij dwg aenvih sawceij ndawde hom raemx- maeg, bungj saw haeuj fwngz, naekgywggywg, hawj gou sim’onj dangqmaz. Gou nyinhnaeuz neix dwg cungj yiengjsouh, baenzneix gou mizyinx dangqmaz. Mboujlwnh baenz- lawz nyaengqfoedfoed, banhaemh gwn caeuz liux, gou ndekndak soujgih le, couh naengh gwnz sahfaz, dawz bonj saw okdaeuj, doq gwn caz doq yawj gij sawceij, caen hawj vunz simsoeng, gig miz feihdauh.

Raeuz cungj rox, “gij saw, dwg dungxcaiz vunzloih gyonj baenz” “gij saw, dwg mbaeklae cinbu vunzbiengz” “doegsaw lumj bonjfaenh ndaej bae youzlangh baez he nei” “doegsaw dwg caeuq gij vunzndei doxgangj”…… Caen dahraix, yawj ndaej bonj saw ndei he, saedcaih hawj raeuz yawj ndaej engq gvangq engq gyae, hawj raeuz roxsoq, hawj raeuz coengmingz, hawj raeuz gvaiget……

Ndaejgeiq mwhde gou ngamq guh lauxsae, faen bae aen hagdangz iq lajmbanj dieggyae bae son ban hwnj roek nienzgaep. Aen ban neix aenvih miz geij boux hagseng doegsaw moet di, cungj ndaej cibseiq haj bi lo. Mwhde gou ngamq bizyez okdaeuj, hix ngamq ndaej 19 bi, nienzgeij caeuq geij boux hagseng haenx ca mbouj geijlai.

Ngamq guh lauxsae, mbouj miz saekdi gingniemh, caemhcaiq aen hagdangz neix haujlai bi mbouj miz lauxsae moq daeuj son saw lo, gyoengq hagseng roxnyinh gig singj- sien. Ngoenznaengz baenz gyoengq caenx haeuj ndaw rug gou daeuj, caeuq gou gangjgoj. Gou daengz dieg neix dwg vunseng, gyoengqde hawj gou gaijmbwq mbouj noix, gou hix maij caeuq gyoengqde gangjriu, baenzneix gyoengqde cungj haengj heuh gou guh “Cejcinh”.

Hainduj, gou laihnaeuz gyoengq hagseng caeuq gou miz gangj miz riu, itdingh lauxsaed dingqgangj, hoeng, mbouj geij nanz, gou cij menhmenh roxnyinh gyoengqde geijlai rwzna geijlai nanz son. Gyoengqde mbouj haengj hag cih saw, caemhcaiq haengj “loengh vunz”, lienz gou hix mienx mbouj ndaej deng gyoengqde loengh gvaq dem!

Ndaw ban geij boux coengmingz youh ceiq hung haenx, haengj doeng diuq sae saet, ciengzseiz daiqdaeuz luenhnauh, gij vah gou naeuz cungj lumj gij raemx gvaq laeng duzbit nei, son geijlai mbat cungj mbouj gaij. Mizseiz lij youq gwnz dangz gou daeg- daengq luenhnauh, gou naeuz mbouj ndaej guh maz, gyoengqde nyengh guh, baezbaez gou cungj hujdengdeng, hozndat lumj feiz coemh!

Gou dauqdaej rox lauxsae gaxgonq daiq ban neix vihmaz cungj haenh ban neix ndei, naeuz gyoengq hagseng dingqgangj, cingzcik ndei…… Mwhde gou hix ngawzngwd- ngwd docih de, nyinhnaeuz de “simndei”, hawj ban ndei neix hawj gou daiq. Laxlawz dwg aen congh- hongx hung ndeu! Mwh de gou caen dwg “bouxngoemx gwn vuengzlienz, miz haemz cungj gangj mbouj ok”!

Hoeng, seizneix couh lumj duznou iq bin hwnj daizdaeng, gaenq roengz mbouj ndaej lo, cij ndaej giengiengz dingj hwnjbae, aenvih gou mbouj fugsaw! Gou itdingh aeu siengj banhfap haenqrengz hawj gyoengq hagseng gaij ndei.

“Saw daengz yungh seiz cij yiemz noix”. Ndaw dungx noix maeg, caen nanz guh saeh! Aeu lai yawj saw gyagiengz gij bonjsaeh sonhag cij ndaej.

Daj seizde hwnj, gou baez ndaejhoengq couh bae cawx saw、yawj saw. Aenvih gou cienmonz bae yawj gij saw baenzlawz guenjleix hagseng, caemhcaiq hag ndaej couh yungh. Mbouj geij nanz, gij saeh hagseng gaujluenh simfanz haenx yied daeuj yied noix lo, gyoengq hagseng hix yied daeuj yied gvai, gij cingzcik engq yied hwnj yied ndei, aensim gou menhmenh cuengq roengzdaeuj lo. Mwhde, gou cij roxnyinh: Dwg yawj saw hawj gou hag rox haujlai, hawj gou sonhag ndaej engq simsoeng!

Doeklaeng, gou menhmenh lienh baenz sibgvenq yawjsaw lo. Gou mboujdan gyaez yawj sawsonhag, caemhcaiq haengj yawj gij saw vwnzyoz dem. Yienznaeuz gou guh mbouj daengz haenqrengz doeg saw lajbiengz sat, hoeng, gou nyienh itcig ndaej caeuq gij saw doxbuenx doxing.

Yawj gij saw ndei, ndawsim gou gig boiqfug gyoengq canghraiz, baenzlawz baenzneix maenh’ak, rox aeu gij cihsaw bingzciengz raiz gij saeh iq、gij doxgaiq、gij vunz daengj ndaej baenzneix sengdoengh、baenz- neix mizyinx, yawj ndaej lai, da ndat fwngz hix humz lo, gou menhmenh hix naemj raiz di doxgaiq, mbouj- guenj ndei roxnaeuz mbouj ndei, moix baez siengj raiz cungj aeu raiz roengzdaeuj.

Gou hainduj sawq sij sanjvwnz caeuq sawcuenh seiz, cij menhmenh haeujsim bae yawj gij gezgou faenzcieng bouxwnq, hix hag daeuj yungh youq ndaw faenzcieng gou, mbouj iugouz baez ndeu song baez couh yungh ndaej ndei. Couhcinj gag yawj hix roxnyinh bonjfaenh bitmaeg noix, hoeng, cungj maij dangqmaz, mbouj rox naiqbaeg hix mbouj rox saetnaj, gwq yawj gwq raiz.

Siengj mbouj daengz, miz baez ndeu, gingqyienz miz boh’au duiyouh he doiq gou naeuz:“Siuj Luz, gij faenzcieng mwngz gou cungj haengj yawj bw, daegbied dwg sawcuenh, sij ndaej giuj!” Gou baez dingq, youh sim’angq youh dwglau, aensim ndat- fwdfwd caemhcaiq diuqbubbub.

Aenvih gaxgonq gou cungj laihnaeuz gij faenzcieng gou sij ndaej mbouj ndei, hix mbouj haeuj da, engq mbouj miz byawz yawjnaek, moix baez cungj sij le couh douz okbae, hix mbouj gamj siengj daiq lai, caenh siengj: Cijaeu canh di cienz he daeuj cawx bau gyu couh baenz lo……

“Mid gat baengh rin, fouj raeh baengh muz”. Gou roxnyinh gij saw couhdwg “rinmuz” gou, siengj dawz gij faenzcieng bonjfaenh sij ndaej engq ndei, couh aeu lai yawj lai sij! Baenzneix gou engq haenqrengz bae lai yawj、lai hag、lai sij、lai gaij…… Mboujduenh daezsang bonjfaenh, moix baez douz faenzcieng okbae hix mbouj caiq yupyat caemhcaiq simvueng lo.

Youq ndaw ndwenngoenz gou, caiq hix noix mbouj ndaej saw lo. De lumj boux baengzyoux gou nei, buenx gou bae youzlangh lajbiengz, buenx gou riu buenx gou daej. Gij simnyap sojmiz baez raen bonj saw he, cungj deng vut daengz laeng bae, caiq hix mbouj miz simgei bae ngeix hwnj lo, caenh siengj bae yawj ndaw saw miz maz dijbauj ndei, deq gou bae cimhra、bae yodawz.

Geiqndaej ndaw saw miz coenz vah ndeu naeuz “gij mingh raeuz miz song cungj, cungj he dwg ndangdaej, cungj he dwg cingsaenz”. Gou nyinhnaeuz, gij ndang raeuz ndaej daj gijgwn aeu ndaej yingzyangj, gij cingsaenz raeuz cujyau dwg daj ndaw saw aeu ndaej yingzyangj.

Vahsug gangj “mingh vunz miz dinjraez, faexdeiz miz sangdaemq”, ciuhvunz dinjdet, raeuz yaek siengj hawj diuzmingh bonjfaenh bienq raez, gig nanz, hoeng, cijaeu raeuz lai bae yawj saw, lai hag gij coeng- mingz banlaux, couh ndaej haigvangq gyalaeg aen uk raeuz, haigvangq gij mingh raeuz!