“Ai, Siu Cuh ya! Din fwngz mwngz riengjret lai lo……” Haenzdah cienz daeuj gij sing heuh, lingh boux dahsau cingq byaij coh henz dah.

“Vaiqdi deuz. Gyoengqde daeuj lo!”

De gipmuengz coi Lungz Byauh.

“Gou ngoenzcog caiq daeuj.”

“Ngoenzcog gyanghaet dou youh aeu hwnj bya bae lo.”

Lungz Byauh geiq maenh coenz vah doeksat de, doq cienq ndang lizbae.

Hwnzde, de daengx hwnz cungj fangzhwnz caeuq Siu Cuh doxyouq.

Daihgouj Aulungzgveiz Gangj Goj (Daihngeih)

Ngoenz daihngeih, Lungz Byauh hwnq ndaej gig romh, mbwn ronghyaiyai, de byaij le song leix lai roen, daeuj daengz aen mbanj Siu Cuh youq, deq youq aen bakroen hwnj bya, mbouj geijlai nanz, miz bang dahsau hwnj bya gvej nya daj ndaw mbanj gangjnyaengnyaeng byaij gvaqdaeuj dahraix. Gyoengqde bouxboux cungj daenj aen mauhdiemx, gwnz mbaq venj diuz hanzfaexcuk song gyaeuj soem, lij cug miz cagndaij, daiq fag caxfwnz ndeu caeuq aen doengjfaex iq cang haeux byaek ndeu, geij boux dahsau doxyouq cungj miz gangj miz riu, doxriengz byaij roennou hwnj bya bae.

Lungz Byauh doq ndoj youq ndaw caznywj, hawj gyoengqde byaij gvaqbae, doeklaeng youq baihlaeng mbouj gig gyae laeglemx riengz dwk.

Byaij daengz gwnz bya, gyoengq dahsau cungj sanq bae gvej rum, Lungz Byauh riengz youq baihlaeng, itseiz ra mbouj raen Siu Cuh youq gyawz, cijndei dauqcawq luenh byaij, yawjraen geij boux dahsau, cix cungj mbouj dwg Siu Cuh, de youh mbouj gamj bae cam, hix mbouj gamj heuh, youq gwnz bya luenh ren le buenq ngoenz, doeklaeng vanzlij dungx iek saetmuengh maranz lo.

Hoeng de mbouj fug, ngoenz daihsam hwnq ndaej engq caeux, caemhcaiq lij daiq le geij aen lwgmaenz, cigsoh ganj daengz lohnga gyoengq dahsau hwnj bya haenx bae deq, baezneix deq ndaej daengz lo, de raen Siu Cuh caeuq gizyawz dahsau faenhai le, gag boux vunz ndeu byaij hwnj gwnz bya coh baihdoeng bae, de angqvauvau, laeglemx riengz laeng, mbouj gamj hawj Siu Cuh rox.

Youq gwnz bya’ndangq lingq, Siu Cuh daengx roengzdaeuj, Lungz Byauh hix doq ndoj youq baihlaeng gofaex hung he, raen Siu Cuh venj aen doengjfaex iq cang haeux byaek youq gwnz gofaex iq, cagndaij caeuq hanzgyaeuq hix coq youq lajde, dawz fag caxfwnz he, binjbinj gavaq caeuq genbuh, yaep ndeu hix mbouj daengx, couh youq gizde gvej rum hwnjdaeuj.

Lungz Byauh mbouj gamj hawj de rox bonjfaenh youq gizneix, couh laeglemx bin hwnj gofaex hung, naengh youq gwnz ngafaex, daj baihgwnz yawj cim Siu Cuh gvej rum.

(caengz sat)