Dahli naengh youq henz mbonq, song fwngz gaem goekga daejfwtfwt. Bouxgvan de Daeggvangh youq baihrog gwn laeuj dauq daengz ranz, mbouj rox Dahli vihmaz daej? Cij raen lwed hoengzfwgfwg daj goekga Dahli lae okdaeuj, doek youq gwnz namh nding lumj dujva nei.

“Baenz …… baenzlawz yiengh- neix? Ngoenzbonz mbouj dwg ndeidedded, baenzlawz youh caiq miz moq lo?” Daeggvangh simyou cam.

“Mwngz miz aen gyaeujfoeg ndwi, gij saeh neix cungj dwg mwngz guh baenz, hawj gou baenzlai in.” Dahli doq roq gyaeuj Daeggvangh baez ndeu doq naeuz, “Mwngz cang aen gaep youq gakranz, duzmeuz din caij deng gaep, gou naemj bae gouq de, de dauq fanj haeb gou, simndei mbouj ndaej bauq.”

“Meuz haeb? Mbouj baenz nw! Vaiqvaiq bae dajcim.” Daeggvangh fuz Dahli hwnj cimozdoz, fatdoengh ci le, lumj mbin nei hai coh yihyen bae.

Canghyw dwg bouxsai ndeu. De cam Dahli gyawz deng haeb, Dahli mbouj gamj gangj, aeu fwngz vix haeuj goekga bae, naeuz:“Gizneix.”

“Duet vaq hawj gou yawjyawj!” Canghyw naj mbouj miz saek geu riu doiq Dahli naeuz.

Dahli cim coh Daeggvangh, naj fwt nding lo. De gej saivaq, duet vaq roengz daeuj donh he, loh ok song diuz gagoek hausupsup. Canghyw aeu fwngz bae nyaenjnyaenj geij baez, naemj dawz gij lwed doeg nyaenj okdaeuj. Daeggvangh raen canghyw guh yienghneix, byaij ok bakdou bae, miz di mbouj sim’angq.

Yaep ndeu, canghyw youq gwnz caekhaex Dahli dajcim, in ndaej Dahli heuh boh heuh meh bae.

Dahli dauq daengz ranz, giz caekhaex dajcim lij in lumj deng gaeq dot nei. Giz meuz haeb haenx, in daengz aensim diuqbaegbaeg bae. Daeggvangh cim Dahli, gangjriu naeuz:“Mwngz yawj, aen baksieng duzmeuz haeb haenx, hwnj nwnj lumj aen yaenq cup nei hoengzfefe.”

Dahli hoz raeng lumj aen giuznaeng, hoeng mbouj rox baenzlawz guh. “Mwngz gangj yienghneix, cungj miz ngoenz ndeu mwngz hix deng haeb, daengz seizhaenx mwngz gag rox.” Dahli hozndat naeuz.

Dajcim ndaej 7 ngoenz, gij baksieng Dahli menhmenh ndei hwnjdaeuj, Daeggvangh cuengqsim okbae dajgoeng lo. Mwh yaek okdou bae, Daeggvangh cup Dahli mbat ndeu naeuz:“Gou bae lo, youq ranz gven cueng ndei, gaej hawj duzmeuz caiq haeb mbat moq.”

Daeggvangh baez bae couhdwg 3 ndwen mbouj dauq, vunz ndaw mbanj mbouj rox de haeuj singz guh maz hong, miz vunz raen Daeggvangh caeuq dah lwgsau ndeu youq gwnz haw haeujok.

Aen siusik neix gig vaiq cienz haeuj ndaw rwz Dahli bae, ngoenz- laeng, Dahli dauqfanj sou ndaej Daeg- gvangh geiq gvaqdaeuj 5000 maenz ngaenz. Dahli aj ga naengh youq bakdou, doiq vunzmbanj baedauq gangj:“Gou couh naeuz ma, Daeg- gvangh mbouj dwg cungj vunz haenx, sou yawj, de ngamq geiq ngaenz dauq.”

Caiq gvaq ndwen he, Daeggvangh fwt dauq daengz ranz, aen naj baihswix suek gaiq baengzsa ndeu. Dahli raen le, mbouj rox miz maz saeh, doq cam:“Naj mwngz baenzlawz lo?”

“Deng meuz haeb lo!” Daeg- gvangh aeu fwngz goemq naj naeuz,“Gou bae cangcoih aen ranz gaeuq ndeu, ndawranz miz duz meuzmeh ndeu ngamq roengz lwg, raen gou haeuj ndaw couh diuq gvaqdaeuj, haeb daengz gwnz naj gou lo.”

Banhaemh gwn caeuz liux, Dahli dawz aen hab ndeu okdaeuj vut roengz gwnz daiz bae, hwk ndaej Daeggvangh naengh daengz gwnz namh bae.

Daeggvangh ga saenz sim diuq mbouj dingz, de cingq yaek hawj Dahli lwnh 5000 maenz ngaenz baenzlawz daeuj. Dahli dauqfanj daej lo:“Gou dawz 5000 maenz ngaenz cuengq youq ndaw hab neix, mbouj rox seizlawz deng vunz caeg bae lo, mwngz gaej gvaiq gou, mwngz gaej gvaiq gou……”

Daeggvangh naengh hwnjdaeuj, got dawz mbaq Dahli naeuz:“Gaej daej lo, mbouj raen couh mbouj raen, cienzngaenz lix mbouj daiq daeuj dai mbouj dawz bae, okbae ra couh ndaej, daej lai vaih da, youh sieng ndangdaej.”

Dahli dingq le riu naeuz:“Lauxgvan, mwngz caen ndei!”

Duenh seizgan neix, Daeggvangh youq ranz mbouj ok bakdou gvaq, moix mbat vuenh yw、cuengq yw cungj dwg de gag guh, mbouj hawj Dahli bang gvaq.

Miz haemh ndeu, Daeggvangh ninzndaek lumj duzmou, mbouj siujsim gaiq baengzsa suek baksieng haenx deng loenq lo. Dahli yawj le, roxnyinh giz sieng baenzlawz hix mbouj lumj duzmeuz haeb, congh heuj naed beij naed hung, baenzlawz yawj hix dwg vunz haeb, Dahli caiq ninz mbouj ndaek lo.