Gij lizsij siuqva Mulaujcuz gig naihnanz, dozanq de lai cungj lai yiengh, miz mbwn miz deih, youh miz doenghgo doenghduz gwnzbiengz, gij doxgaiq siuq okdaeuj haenx hix lekndei gvaq gij sengcingz de bae. Lozcwngz Mulaujcuz Swciyen Swbaj Cin Mbanjcunghcai dwg aen dieg siuqva Mulaujcuz mizmingz ndeu, daengx mbanj mehmbwk dingzlai cungj rox siuqva, gij doxgaiq gyoengqde siuq okdaeuj haenx gyaeundei dangqmaz, gij saek dapboiq doxhuz, gij doz hix siuq dwk lumj gij caen nei, vunzseng’eiq cungj haengj bae soucawx.

Gyoengqvunz fwngzsoem ndawde miz boux daiqbiuj ndeu heuhguh Se Siuyungz. De ndaej hajcib geij bi lo, mbangj gaiq lumj “haiz siuqva” gaenq saetcienz haujlai nanz haenx、“haiz hwnjgiuh” ndawbiengz haqsau aeuyah seiz yungh haenx、buhhak Mulaujcuz daengj, de vanzlij ndaej siuq okdaeuj. De genhciz daiq lwgsae, cienz gij dinfwngz de hawj gyoengq lwgsae, gungganq ndaej haujlai vunzcaiz, vihneix, gyoengq- vunz cungj heuh de guh “Yahsiuq”. Byaij haeuj ndaw ranz de bae, doq raen daengx faq ciengz cungj dwg gij doxgaiq de siuq haenx, venj dwk rim raixcaix. Fukfuk cungj miz lizdijgamj, yienghsik ndeiyawj, gij saek hix boiq ndaej gig ndei.

Gij siuqva Mulaujcuz Mbanjcunghcai daj ciuhgonq cienz daengz seizneix gaenq miz haj bak lai bi lo. Seizneix ndaw mbanj boux siuqva ceiq laux haenx miz bet geij bi, boux ceiq oiq he hix daj bet bi couh hainduj hag siuqva lo. Gij siuqva Mulaujcuz baen miz sam cungj: Siuqbingz、siuq raedceij、siuq riengmax. Gyoengq mehmbwk itbuen cungj dwg siuq najnda、aenmauh、buhvaq、fandox、haiz siuqva、songzswiz daengj doxgaiq lai. Gwnzde siuq miz aendaengngoenz、song duz bya、dujfwj、duzgeizlaenz daengj gak cungj gak yiengh dozanq gitleih haenx.

Siuq riengmax itbuen yungh ma guh buh lai. Sam cungj siuqfap neix, siuq riengmax ceiq hoj siuq hix ceiq miz yisuz gyaciz. Se Siuyungz ceiq sughangz guh siuq riengmax, daengx mbanj caenh gag de rox cungj siuqfap neix. Gij buhliuh siuq riengmax yungh haenx gig gangjgouz, gij bouhloh hix gig fukcab, itbuen aeu seiq geu riengmax guh sim gonq, youh aeu mae hau geuj hwnjbae, guh baenz diuz mae siuqva ndeu; caiq aeu gij mae siuqva neix riengz gij rizraiz gaenq veh ndei youq gwnz baengz haenx bae siuq doz; youh yungh mae lai saek benjbet aeu maesei lai saek laenz baenz haenx, siuq haeuj cungqgyang gij rizraiz giz hoengq bae; doeklaeng cix ciuq gij bingzsiuq、deuva、luenhcim、diuqcim daengj fuengfap baeznaengz siuqva yungh haenx bae siuq. Dan guh maesim riengmax couh aeu guh baenz geij ndwen, gij doxgaiq siuq ndaej haenx gyaeu lumj gij ciuhgeq neix, gyaeundei gyaqciq, liuh saed hix naihyungh.

Siuqva Mulaujcuz mbouj gag dapcoux dwk minzcuz vwnzva, lij ndaej hawj vunzmbanj canhcienz. Daj bi 2012 doxdaeuj, Se Siuyungz banh ndaej sam mbat ban sonlienh, gungh miz bak lai vunz camgya. Se Siuyungz daiq gij lwgsae de, doengxhaemh heuhcomz gyoengq mehmbwk ndaw mbanj mbouj miz hong guh haenx bae vih gij vunzseng’eiq gyae’gyawj haenx siuq doxgaiq. Bi 2014, Mbanjcunghcai gungh miz gyawj betcib boux mehmbwk guh gij hong siuqva neix, gyoengqde itbi boux ndeu cungj canh ndaej baenz fanh ngeih maenz ngaenz.