Gou boux ndeu youq aen singz neix, yienznaeuz mbouj miz geijlai boux baengzyoux, hoeng gou cungj mbouj roxnyinh mbwq gvaq. Moix ngoenz sij di doxgaiq, roxnaeuz guh di hong swhgeij roxnyinh mizyinx, danghnaeuz ndaejhoengq, couh okbae youzbyaij saek yaep.

Gou ceiq gyaez naengh cigunghgyauh daj camhnduj daengz camhbyai, youh daj camhbyai naengh ma camhnduj, itloh yawj funghgingj baihrog. Mizseiz hix buenq loh roengzci, daengz ndaw hawciengz vunz lai vunz daih ndaetfwdfwd baenq geij hop, cawx saekdi doxgaiq, roxnaeuz maz cungj mbouj cawx song fwngz hoengqvatvat couh dauqma lo.

Ngoenz ndeu, gou youh naengh cigunghgyauh okbae youz mbwq, okdou seiz ndit ndat lumj feiz coemh, hanh lae rim ndang rim naj, hoengheiq lumjbaenz mbouj doengh nei, diemheiq gig dwgrengz, hawj vunz yaek daimbaet bae. Yaep he, aen mbwn bienq lo, fwjndaem baenz benq baenz benq na’nupnup at roengz lajdeih daeuj, laepfubfub, rumz hung cifafa, lumj yaek dawz gofaex song mbiengj loh lienz rag ciemz hwnjdaeuj nei, mbouj yaep he couh doekfwn lo. Sing fwn doek youq gwnz cueng ci baihrog yiengj “daekdaek”, lumj boux vunz doq ciengq go doq danz ginz nei, singsing haeuj rwz haeuj sim daeuj, hawj vunz dauqngeix bae gyae……

Sawqmwh, gou myag raen baihnaj mbouj geij gyae miz daxmeh nienznomj ndeu, youq ndaw fwn gang aen liengj he, song fwngz gak gotdawz laeq lwgsai he caeuq laeq lwgmbwk he byaij. Aen liengj iq lai, fwn doek youh hung, mehlwg 3 boux buhvaq cungj dumz caez. Cingq youq seizneix, gou fwt ngeix hwnj gij saeh seiz iq ndeu, ngeix hwnj bihaenx daxmeh caeuq dou song cejnuengx, hix yienghneix youq ndaw fwn rumz byaij gvaq, engq mbouj lumz lij miz boux vunz ngoemx heuhguh Daegdwen dem.

Gwq ngeix gij saeh gaxgonq, cigunghgyauh youq baihnaj aen camh dingz roengzdaeuj. Gou lumjbaenz daj ndaw loq fwt singj gvaqdaeuj nei, goq mbouj ndaej naemj maz, gipmuengz gaem aen liengj gou riengz ndang daiq, riengjret diuq roengz ci, cigsoh byaij bae coh 3 mehlwg haenx.

Gwnz gyaeuj sawqmwh mbouj deng fwn rwed, daxmeh nienznomj caeuq song laeq lwgnyez cungj doeksaet youh gamjgik, cungj muenghyawj gou, gyoengqde goq mbouj ndaej uet bae gij raemxndik gwnz naj, coh gou riu lo.

Gou caeuq daxmeh nienznomj neix boux gotdawz boux lwgnyez ndeu, youq ndaw fwn baez yamq baez yamq byaij coh baihnaj bae, raemxfwn gaenq daj gahengh dumz daengz gyaeujhoq dou…… Yaep he couh byaij daengz laj laeuz ranz gyoengqde, dou caez soeng le gaemz heiq ndeu. Daxmeh nienznomj neix riunyumnyum naeuz:“Docih mwngz lo, haeuj ranz daeuj naengh yaep ndeu gonq, ndoet cenj raemxndat caiq byaij ba.”

“Mbouj yungh lo.” Gou vadvad fwngz, cienqndang cung haeuj ndaw fwn bae, laebdaeb soemh fwn ganjloh.

Fwn yied doek yied hung, yied doek yied haenq, mumjmumj gyumqgyumq, muengh mbouj raen gyae, mbwn caeuq namh lumj lienz baenz benq ndeu nei, faen mbouj ok gyawz dwg mbwn, gyawz dwg namh. Youq ndaw fwn menhmenh byaij, gou youh dauqngeix gij saeh gaxgonq haenx daeuj.

Haujlai bi gaxgonq, gou iqetet youh caemhcaiq daemqdetdet, caengz ndaej haeujhag doegsaw, byoemgyaeuj lij raed ndaej dinjdetdet. Daxboh ciengzciengz dawz gij byoemgyaeuj youh henj youh unq gou, daj song mbiengj bwnda raed gvaq laeng gyaeuj bae, yienghneix aen gyaeuj caeuq aen naj yienh ndaej engq luenz, bouxwnq cungj riu naeuz gou lumj aen vanj goeb gwnz gyaeuj nei.

Seiz iq gou caeuq daegnuengx cungj gyaez bae ranzdaiq, cawz le liggaeuq caet nyied cibseiq caeuq haemhndaep mbouj ndaej bae ranzdaiq, bingzseiz cungj gyaez heuh daxmeh daiq dou bae.

Ranz daxdaiq gou youq ndaw rungh, aeu byaij haj roek leix roen hung, caiq byaij aen cungdaeuz lohbya cij daengz. Seizhaenx gou ngamq ndaej seiq haj bi, moix baez naemj daengz yaek bae ranzdaiq, gou youq sim’angq youh miz di simyup. Aenvih bae ranzdaiq aeu gvaq aen mbanj hung ndeu, aen mbanj hung haenx miz ndaek vunz ndeu, de heuhguh Daegdwen, gou gig lau de, lau yaek dai bae.

Daegdwen dwg bouxngoemx ndeu, vunz daemq gyaeuj hung lij miz di bizboj, lumjnaeuz aen uk hix mbouj ndei sawj geijlai, de gangj mbouj ok vah, baez raen vunz couh yaengx fwngz heuh “yiyi yaya”. De baez raen gou, couh yienghneix, hawj gou lau ndaej ndoj youq baihlaeng daxmeh mbouj gamj oksing, hwk ndaej naj bienq hau caez.

Moix baez daengz aen mbanj haenx, aen simdaeuz gou couh mbouj dingz diuqbwdbwd, youq ndawsim mbaenj: Mehmbwn, ciengeiz gaej hawj gou bungz raen Daegdwen bw! Ciengeiz gaej hawj gou bungz raen Daegdwen bw! Danghnaeuz gou bungz raen Daegdwen gonq, de caengz raen gou, gou couh rag fwngz daxmeh byaij daengz loh baihhenz bae, aeu liz de gyae’gyae bae.

Daegdwen mbouj oksing dauq ndei, de baez aj bak luenh swenj luenh heuh, gou sikhaek gotdawz gavaq daxmeh cuengq sing daejnga’nga hwnjdaeuj. Hix miz saek mbat doxbae seiz seizheiq ndei mbouj bungz raen Daegdwen, hoeng dauqma seiz youh yousim bungz raen de, raen le couh cuengqsing daej, mbouj raen couh angqvauvau riengz laeng daxmeh saetdiuq saetdiuq maranz.

Baezhaenx dwg ndwencieng congeih, daxmeh aemq daegnuengx daiq gou youh bae cunz ranzdaiq lo.

Ngoenzhaenx seizheiq caen ndei, mbouj bungz raen Daegdwen youq gyang mbanj. Mwh daj ranzdaiq ma daengz aen mbanj haenx seiz, aen mbwn gvengqyauyau sawqmwh bienq ndaej laepcupcup, rumz hung bongj ndaej gou yaek ndwn mbouj ndaej onj, da yawj couh yaek doek fwn hung lo. Daxmeh naeuz yaek doekfwn lo, haeuj ranz baengzyoux de ndoj fwn gonq. Gou mbouj nyienh, nyengh aeu byaij coh baihnaj. Gizsaed, gou lau deq youq gizneix baez nanz, couh yaek deng bungz raen Daegdwen, seizde gou caenh siengj vaiqdi lizhai gizde.

Couh youq dou 2 mehlwg byaij ndaej leix roen gyae seiz, doek fwn lo. Gizneix naj mbouj miz ranz laeng mbouj miz mbanj, daxmeh cij miz aen liengj ndeu, ngamq ndaej gang de caeuq daegnuengx.

Fwn yied doek yied hung, yied doek yied haenq, mumjmumj gyumqgyumq, muengh mbouj raen gyae, mbwn caeuq namh lumj lienz baenz benq ndeu nei, faen mbouj ok gyawz dwg mbwn, gyawz dwg namh. Gou deng fwn rwed ndaej buhvaq dumz caez, nit ndaej ndang saenzdwddwd, byaij roen mbouj baenz saek yamq bae.

Seizneix fwt yiengj sing “hwhw haha”, gij sing geizheih youh sug rwz he daj baihnaj ndaw ndoeng faexcoengz mwncup cienz okdaeuj. Gou sikhaek ndonj daengz baihlaeng daxmeh bae, cengq hung lwgda yawj coh baihnaj.

Dwg Daegdwen! Cij raen de gwnz gyaeuj gang aen liengj ndeu, cingq ganj duz vaizmeh caeuq duz vaizlwg he coh dou byaij daeuj. Daegdwen yied byaij yied gyawj dou, ndaw bak hix mbouj rox gangj maz, hix dingq mbouj ok de gangj maz. Gou lau ndaej da cungj daengx liux lo, aen bak hix aj ndaej luenzlulu, mbouj rox gangj maz guh maz. Cij raen Daegdwen youq henz ndang gou dingz roengzdaeuj, riengjret dawz aen liengj de ndenq hawj gou, doeklaeng baenqndang couh gyaep vaiz byaij coh ndaw mbanj bae.

Seizhaenx gou youh daemq youh iq, boux ndeu gang aen liengj ndeu, mbouj deng fwn rwed ndang, roxnyinh raeujrub dangqmaz, hix roxnyinh Daeg- dwen mbouj miz maz ndeilau ne.

Majhung le, gou ciemhciemh mbouj gyaez bae ranzdaiq, hix mbouj caiq raen Daegdwen gvaq lo. Doeklaeng dingqnyi Daegdwen gvaqseiq lo, hainduj gou miz di doeknaiq, doeklaeng couh ciengzciengz niemh de.

Seiqvunz ndawde byawz mbouj deng fwn rumz soemh gvaq rwed gvaq, danghnaeuz gizgiz cungj miz liengj daeuj bang vunz dangj fwn, daengx aen seiqgyaiq couh bienqbaenz ngoenzngoenz cungj dwg mbwn’gvengq.