Gou yo miz mbaw faex ndeu. Mbaw faex neix dwg mbawfaex makmaenj, mbaw faex neix yienz- naeuz caeuq gij mbaw wnq doxdoengz, hoeng youq ndawsim gou miz gij yiyi mbouj doengz, aenvih de cungj sawj gou siengj hwnj mboengq seizgan doenghbaez……

Laengranz daxbuz gou miz go makmaenj ndeu, gig hung, maj miz 80 lai bi lo, lij dwg goenggeq mwh iq ndaem ne! Laj faex miz duz ma geq caeuq gyoengq gaeqlwg ndeu, ma geq dwg duz hen gaeq ceiq ndei, gaeq cungj dwg bang duzma dot rum henz rongz seuq bae, gyoengqde doxcaez doxhuz youq laj gomakmaenj gvaq saedceij.

Baihnamz gomaenj miz baiz eij he, dwg daxgoeng aeu faex guh baenz, hainduj aen’eij cocat, naengh nanz le couh raeuz lo, aenvih gizde dwg giz gyoengq daxbuz ndaw mbanj naengh de gangjgoj. Seizhah, raemh gomaenj baez cw, beij gunghdiuz、denfunghsan cwxcaih lai lo, vunzlai cungj maij youq laj gomaenj aeuliengz. Gwnz faex baenz mak rim liux, daengz seiz mak cug lo, daxbuz cungj dwg aeu aenmak ceiq hung de cuengq haeuj bak gou daeuj, gou baez haeb, ndeigwn dangqmaz, gij feih de sawj vunz nanzlumz. Gomaenj daiq hawj daihgya angqyangz lailai, daihgya doiq go mak neix cungj miz gamjcingz naekna lo.

Hoeng mbouj geij nanz, ndaw mbanj naeuz yaek cekbuen, gaij guh ranzlaeuz, hainduj daihgya bouxboux cungj angq, hoeng doeklaeng siengj daengz gomakmaenj ……

Banhaemh, vunz ndaw mbanj ranznden cungj dwk dienhvah daeuj cam gij saeh gomakmaenj, “Baenzlawz ha, ndaej louz roengzdaeuj lwi?” “Hojsik ha!” …… Daxgoeng daxbuz cijndei han naeuz mbouj miz saeh law, hoeng gou rox gyoengqde gig siengsim. Daengx hwnz cungj ninz mbouj ndaek, lienz gou cungj dwg yienghneix.

Mbouj geij nanz, youq haemh vaiqhaemh daengngoenz yaek doekbya he, daihgya yiengjsouh haemh vaiqhaemh liengzsi ceiq doeklaeng. Doeng- ngoenz yat roengz bya bae, youq bien mbwn saj roengz benq fwjhaemh gyaeundei ndeu, gomakmaenj hawj daihgya henhoh haenx gaenq daengz doenqgeiq seizgan lo.

Ngoenz daihngeih, bouxgeq vunz ndaw mbanj cungj daeuj lo, daxgoeng yien ma, daxbuz gyaep gaeq, gofaex riengz sing gawq, riengz lwgda daihgya cimyawj, laemx roengzdaeuj lo. Gou buet gvaqbae, lumh ganjfaex, raemxda doek roengz gofaex bae. Mbawfaex mbwncup, gou mbaet aeu mbaw he, cuengq haeuj ndaw bonjbitgeiq bae guh geiqniemh.

Cigdaengz ngoenzneix, gij saeh dangseiz gou lij geiq ndaej gig cingcuj, mbawfaex yienznaeuz bienq henj lo, hoeng gou lumz mbouj ndaej gij mak vandiemz caeuq raemhfaex raemhrwd de. Gou itdingh lumj gofaex de ityiengh, mwh lix vih vunzlai cauh engq lai engq ndei gyaciz.

(roek nienzgaep Cwnz Sinh)

Doengjnyapnyaj Gaggangj

Daihgya ndei, gou dwg aen doengjnyapnyaj ndeu, ngoenzmoq he youh yaek hainduj lo, gij “doxgaiq” gou hix yaek soengq daeuj lo!

Mwngz yawj! “Boux soengqhuq” daih’it daeuj lo, de dwg boux boh’au miz mumh he. De itmienh byaijngatngat, itmienh ngaem gyaeuj yawj soujgih, ndaw bak lij gamz geu ien yaek cit liux he. De byaij coh gou daeuj, yienzhaeuh vut ien coq gwnz dieg caij ndaep bae, ciepdwk gip hwnjdaeuj, yaengyaeng cuengq haeuj “bak” gou daeuj. Haha! Ngoenzneix sou yiengh “huq” daih’it gig swnh bw! Mbouj deng? De baenzlawz cuengq haeuj mbiengj “ndaej soudauq” bae ne? “Ai, mwngz cuengq loek lo! Vaiq di dauq lingh cuengq!” Gou sing hung hemq de. Hoeng boux boh’au neix cij goq ngaem gyaeuj yawj soujgih, swt cungj mbouj swt gou saek mbat, gou cijndei suenq lo.

Ciepdwk, baihnaj byaij daeuj dahsau gyaeundei he. Cij raen de fwngz he goemq aen ndaeng, fwngz he riuj daeh nyapnyaj iet liz ndang swhgeij gyae’gyae bae. Bonjlaiz gou nyinhnaeuz dahsau neix itdingh dawz nyapnyaj cuengq haeuj“bak” gou daeuj, byawz rox de cix swnh fwngz gveng youq gwnz dieg baihnaj gou, gyapnyaj ndaw daeh sikhaek sanq rim daengx dieg, aenbak lij nam “haeungoemngoem” coenz ndeu! Ai! Yiengh “huq” daihngeih youh mbouj cuengq deng.

Gvaq yaep ndeu, youh byaij gvaqdaeuj dahniq fwngz gaem mbaw ceij gaeuq he. Gou gag siengj: Vunzhung cungj guh mbouj daengz dawz nyapnyaj cuengq haeuj “bak” gou daeuj, couhcinj guh daengz lo, hix mbouj rox baenloih, engq gaej naeuz dahniq neix lo. Hoeng byawz rox daengz, de cix byaij daengz baihnaj gou, dawz ceij gaeuq cuengq haeuj ndaw “ndaej soudauq” bae, lij dawz nyapnyaj sanq gwnz dieg haxbaenz dahsau gyaeundei vut haenx gip hwnjdaeuj, lij sijsaeq baenloih dem. Cawqceq daengx dieg nyapnyaj le, de couh ma ranz lo.

Gvaq cib faencung, dahniq neix youh dauqdaeuj lo, de lij youq “gwnz ndang” gou nem mbaw ceij he, gwnzde sij “baujhoh vanzging, bouxboux miz cwzyin” geij cih saw gig yienhda neix! Nem mbawceij sat le, de couh itcig souj youq henz ndang gou.

Ngoenz he gvaqbae lo, hong gou hix guh sat lo, gou daegbied gyo’mbaiq dahniq neix. (sam nienzgaep Giuh Yaujyiz)

Simsoh

Dwg gou mbouj roxsoq ma? Meh ha!

Gou dan doiq boh’au naeuz coenz “mbouj ndaej!” ndeu ndwi bw.

Boh’au ranznden soengq duzbya daeuj hawj daxmeh seizde, cam lwg “Haemhneix miz duzbya gwn bw, boh’au youq ranz mwngz gwnhaeux, ndaej lwi?”

Gou gag han boh’au naeuz: “Mbouj ndaej!”

Meh couh naeuz gou: Mbouj roxsoq, mbouj roxlaex.

Hoeng, meh ha, ndaw ranz boh’au goj cawx miz duzbya bw, de mbouj ndaej gangjgyaj lai go. Meh mbouj dwg naeuz gvaq, simdam mbouj ndei ga?

Nanzdauh, gij saeh gou raen mbouj ndei de, goj hawj gou naeuz ndei ga?

Meh naeuz boh’au dwg daeuq gou guhcaemz ndwi, mbouj dwg yaek daeuj caemh gwnhaeux dahraix.

Hoeng, meh ha, boh’au langhnaeuz mbouj yaek daeuj caemh gwnhaeux dahraix, de vihmaz yaeuh vunz ne? Meh mbouj dwg naeuz gvaq, yaeuh vunz mbouj ndei ma?

Nanzdauh, gou goj lumj boh’au nei, ndawsim baenzneix naemj, ndaw bak cix baenzde naeuz ha?

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）