Gyoengqvunz baiqnienz ngamq ok bakmbanj bae, Yahlaux couh daejfwtfwt lo. Sim de liengzsausau, engqlij gij raemxda riengz gemj lae roengzdaeuj hix dwg liengzsausau. Roegbuguz gwnzbya mbin bae mbin dauq, dingq hwnjdaeuj singsing cungj lumjnaeuz dwg nai de: “Gaej daej gaej daej. Gaej daej gaej daej……” Mbouj daej youh ndaej baenzlawz guh, cungj haicin lo, “cingeng cin nyaengq, cij miz seizcou haeux rim cang” ya, vunz ndaw bya dajndaem dwg caih mbwn yawj mingh, caeux ngoenz ndeu ndaem, ndaej lai sou cingz haeux ndeu ne, vahgaeuq “vunz nguh reih cin ndeu, reih haih vunz baenz bi” beij vwnzgen gyaeujhoengz lij diuz, vunz ndaw bya bibi dwg youq ndaw sing bauqrengh angqhoh bimoq bae doengh, nyaengqnyat beuj reih, dajndaem sat le, cij gwnlaeuj gingqhoh, caeuq ndwencieng coit caez angq- vauvau.

Ai, muengh cin daeuj, muengh cin daeuj, seizcin daeujdaengz lo, you hix daengz lo. Yahlaux naengh mbouj onj, baenqloekloek, byaij daengz gok ciengz, neix dwg gizdieg cuengq hongdawz. De aeu fwngz sawqsawq bakcax fagliemz, fwngz nyaemhnyaemh faggvak、faggvah, youh lumh fagcae ndongqndikndik, uetuet raemxda, moebmoeb diuzhwet naetyaenz de song baez, danq gaemz heiq raezrangh ndeu, dauq daengz gyangdangq, liuqliuq aenrug baihdoeng baihsae hoengqhanghang, gig fouznaih ngauz- ngauz gyaeuj, couh menhnyetnyet byaij daengz henz dou, ing fajdou muenghyawj bakmbanj haenx, ngawzngwnz muenghyawj goengqbya gizgyae mumjmumj gyumqgyumq.

Yahlaux youq aen Mbanjlungzlinz neix, lumj aen gei venj youq gwnzbya hung nei. Rangh ranz raezrangh ndeu depgaenh bya hung, gyonj daeuj cij miz roek hoh ranzvunz, cawzliux baknaj ranz gaiq diegbingz ngamq gaeuq faen guh suenbyaek, couh cungj dwg baenz dong rin lo. Ok bakmbanj couh roengz gemh bae, baihrog ciuqyiengh dwg goengqbya lienz goengqbya. Yahlaux mbouj rox liz aen Mbanjlungzlinz geijlai gyae cij dwg diegbingz, de cij rox de youq rog mbanj lij miz cib moux reih, faen youq sam aen rungh. Bouxvunz guh reih baenz ciuhvunz ndeu, cib moux reih beij aen mbwn dingj youq gwnzgyaeuj lij hung, ndaej vut fwz lwi? Cib moux reih neix, hawj de ngeix daengz geijlai saeh a!

Caengz daengz cieng faen reih bau guh, de hix nyaenx mbouj ndaej yaengx diuz gen lumj fwnzroz nei, caensim daemxcengj. De ngeix baenzneix guh cix ndei, vunzlai okhong nguh saeh lai, menhnyetnyet guh mbouj baenz maz hong, gaej naeuz reih byom ndaem mbouj baenz haeux, reiz biz hix ndaem mbouj baenz. Hoeng faen ndaej cib moux reih hawj vunz simgip yaek dai, de baenzlawz guh ne? Daegdaeuz gaenq gag baenz- gya de, youq gizgyae, faen reih de mbouj miz faenh; daegngeih dwg guekgya ganbu, mbouj faen hawj de. Cib moux reih neix, dwg de Yahlaux caeuq gyoengq lan de faen ndaej; deng lo, daegsam hix miz faenh ndeu, naeuz dwg dangbing liz ranz gyae, henhoh guekgya, hab miz faenh ndeu. Goenglaux caeux couh gvaqseiq lo; bawxngeih youh baenz le gijmaz bingh yw mbouj ndei, dai mbouj dai, lix mbouj lix, yw gwn bae geij loz, yied gwn yied mbouj baenzvunz, youq yihyen le lij deng ra vunz daeuj ciuqgoq, daeglan daeuz dahlan daeuz lij doeg cunghyoz, lwg’iq lij riz mug, geq hwnjdaeuj baenzgyoengq, couh mbouj miz saek boux ndaej guh hongreih. Gangj mbouj ndeidingq, de Yahlaux beij doenghboux lwggyax mehmaiq vujbaujhu haenx, lij lai youheiq dem!

Yahlaux gaenq ngeix gvaq cingj vunz daeuj bang, guh reih gonq. Hoeng baez ngeix daengz caengz neix sim couh luenh, dicuj funungz bihaenx, aen mauh de dwg baenzlawz daeuj? Lij mbouj dwg goq vunzhong bozsoz lwi? Cungj saeh neix ndaej guh lwi? De hix ngeix gvaq gouz caencik daeuj bang, ngamq ngeix daengz, hoeng gienh saeh sam bi gonq couh hawj de gyaeujdot……

Bihaenx ndwenlab ngeihngux, dwg ngoenzndaep iq sibgvenq gizneix, ndaw doih naeuz dwg vihliux hawj gak ranz gvaq aen cieng angqyangz ndeu, ce daengz ngoenzneix cij gietsuenq faenhoengz, ciuqlaeh dwg moix ranz cungj youz cawjranz camgya. Hoihciengz youq ndaw duibu gek song aen gemh, Yahlaux caeux couh gven gaeq yiengz ndei, bwh diuz bogfeiz duk song ciengh raez, byaijbyaij raihraih bae camgya daihhoih.

Gig mbouj yungzheih byaij sat diuz roenbya ngutngeuj gumzgamx, ganj daengz duibu, liz seiz haihoih lij nanz ne. Gij hoih lajmbanj gig hoj caj, lwgnyez youq baihlaeng gyoengq mehmbwk boux dem boux ninz ndaek lo, vunzlai cij daengz caez. Duicangj raemh gangj buenq ngoenz, bouxgvaigi Dahfungh cij cug hoh cug hoh senhbu soqgoengfaen, caeuq gij cienzhaeux ciuq goengfaen faen ndaej haenx. Baihneix senhbu, baihhaenx gvaq caengh diemjsoq, caj daengz gaeq haen baez daihngeih, gyoengqvunz baihlaeng mbouj miz geijlai boux, Dahfungh cij bengrag aen suenqbuenz baez ndeu, haenqrengz hemq naeuz: “Yahlaux!” Ciep dwk yiengq de senhbu: Ranz Yahlaux gaenq lingx gvaq, yaek doiq dauq 60 gaen haeuxyangz, bouj gyau cienzhaeux 120 maenz, nienzdaej yaek gietsoq lo, seiq ngoenz dauqndaw aeu ciuqsoq gyau liux.

Yahlaux lumj deng rwed bat raemxgyoet ndeu nei, daengx ndang saenzdwddwd, siengj cam gijmaz, youh gangj mbouj ok. Dahfungh dauqfanj ndawsim miz soq, cekgej naeuz: “Mwngz dingq cingcuj lo, yaek ciuq ginhsuz suenq, lij miz cienzhaeux lingx. Hoeng ausam mbouj dwg mwngz caenseng, goeng’au youq seiz, bibi ndaej ciuq ginhsuz ciuqgoq, seizneix goeng’au mbouj youq dem lo, couh mbouj ndaej cungj dwg ginhsuz lo. Bonjlaiz bi’gyai couh hab ngaeu deuz bit cienz neix lo, mbouj ngaeu bae, couh sat lo. Daj bineix hwnj, mbouj caiq ciuq ginhsuz fat hawj, ndaw doih gungz, aemq lai le aemq mbouj ndaej, daihgya gaenriengz ngaizgungz ngaiziek……”

Yahlaux vunz geq hoeng rwz mbouj nuk, gij vah Dahfungh de caiq hix dingq mbouj haeuj rwz lo, de mbouj guenj vunz bangxhenz baenzlawz gangjnyibnyib, mbouj guhsing diemj dawz bogfeiz, gyaeuj hix mbouj ngeux dauqlaeng ok dou baema lo.

Lauheiq dwg vunzraeuz ndaw dungx miz heiq ndaej dem rengz, diuz bogfeiz duk song ciengh lai raez caengz dawz sat, de couh bin gvaq song aen gemh ma daengz ranz lo, song dahlan iq hwnz neix mbouj miz vunz guenj, naj din mbouj swiq, ninz youq gwnz mbonq, boux vang boux raeh ninz ndaek lo. Yahlaux yawj le sim liengzsau, got boux neix cupcup, got boux haenx cupcup, raemxda nyaenx mbouj ndaej doekswdswd, de gag gangj gag naeuz: “Lan’gvai ya! Miz meh dangq mbouj miz, boh youq diegrog nyaengq, Yahlaux mbouj miz yungh dem lo, dangbaenz baufug aemq lo. Lan’gvai ninz ndei, raeuz mbouj you, gvaqcieng ausam sou dauqma couh baenz lo, raeuz yaek gvaq cieng ndei.” Gangj dwk gangj dwk, ga hwet lumj raih rim duzmoed, de rox dwg byaij loh benz bya naet lai, hix goq mbouj ndaej song faj din gyuek boengz, hujdengdeng fid haiz deuz, bin hwnj mbonq bae lomx buh ninz. De ninz mbouj ndaek, bakaek lumj oet ndaek faiq ndeu, beng baenz mae sam hwnz sam ngoenz hix beng mbouj liux.

Yahlaux gaxgonq miz gvaq mingzcoh bw, seizneix gyoengqvunz ranghdieg Mbanjlungzlinz ca mbouj lai cungj lumz liux lo, bouxhung bouxiq cungj heuh de guh Yahlaux. Daih’it de gaenq ndaej 80 bi, baizban youh ceiq sang, gyoengq banlan haenx heuh de guh yah (couhdwg Vahgun naeuz daxbuz), haenx dwg hab dauhleix; gyoengqvunz caemhban lij ndangcangq lixyouq haenx ciuq gij fungsug Mbanjcuengh, ciuq banlan heuh de hix dwg miz dauhleix, caiqlij Yahlaux baenzneix cwngheuh gig hab gij bouxvunz bonjlaiz de, youq ndaw Vahcuengh yah dwg maex, yahlaux、yahcoz, hix faenbied dwg heuh maexlaux maexcoz.

（1）