“Seizde gwn ceizraemxrouh、gaj bit cingj laeuj、siuyieng buiz cojgoeng, yienh’ ok haeuxgwn soucingz ndei. Yaleiz laebdaeb guh baenz sam ngoenz hozdung, gij heiqfaenh gvaq ciet gig naek.”《Dasinh Yenci》yienghneix gangj. Cietsuenggyangq Bouxcuengh dwg gij hozdung angqhoh haeuxgwn fungsou caemhcaiq caeq boux yinghyungz dingjhoenx vunzdig daeujciemq ndaw cienznaeuz haenx. Gij vunz Diendaengj、Dasinh、Dwzbauj daengj dieg cungj gvaq aenciet neix, aenciet laeng Dien- daengj Yen ceiq miz daibiujsingq. Moix bi cietsuenggyangq, gyoengq- vunz Bouxcuengh guh baenz bi hong haenx cungj aeu haeuxcid moq ma guh “ceiznaz” “faengx ciepsueng” ma daih bouxhek.

Gyoengqvunz nyinhnaeuz ciet- suenggyangq dwg daj Dasinh Yen Yaleiz Cin daeuj, caeuq gij gojgaeq ciuhgeq Bouxcuengh dingjhoenx vunzdig daeujciemq miz gvanhaeh. Cienznaeuz, Hij Vwnzyingh dwg lwnz saeqdoj daihcibseiq, mehyah de Cwnz Yiyinh hix dwg dahlwg saeqdoj Huzyin. Cingciuz Cwnz Yiyinh caeuq goenggvan de itheij gwih cwzvaiz bae henz haij Fuzgen hoenx bingzcaeg Yizbwnj daeujciemq. Aenvih Cwnz Yiyinh dwg gwih cwzvaiz bae hoenxciengq, gyoengqvunz couh heuh de guh “Yahmoz”. Songde ngoenz hoenx hingz ma ranz haenx cingq dwg ngoenzciet suenggyangq. Gij vunz Yaleiz couh guh aen miuh Yahmoz bae geiqniemh songde, binaengz baez daengz ngoenz suenggyangq, gyoengqvunz couh ram duzyou Yah- moz bae youz haw youz gai.

Yaleiz Cin cietsuenggyangq Bouxcuengh dingh youq ngoenz suenggyangq ndaw liggaeuq ndwen- gouj. Cietheiq itbuen guh sam ngoenz, baen gyaeujgyangq、gyanggyangq、rienggyangq, baumiz caeq saenz、ganj haw、bae guh hek、doiq fwen、yienj heiqdoj daengj. Ngoenz gyaeujgyangq cujyau dwg gingq cwzvaiz, ngoenzneix yaek hawj cwzvaiz yietnaiq. Gyang- haet, gyoengqvunz couh hainduj nyaengq lo, loengh faengx、ceiz、gaj gaeq gaj mou bae daih caencik baengzyoux. Ngoenz gyanggyangq, banhaet dwg gij hozdung gingq saenz: Gyoengqvunz dawz ceiz、noh、lab daengj doxgaiq bae daengz miuh Yahmoz cuengqcaeq、siu yieng, mbangj vunz cang guh bouxbing, yaengx mbawgeiz, roq gyong bang- bang, deq saeceij hai roen le couh dawz duzyou Yahmoz ram ok rog bae cetyouz. Yaek aeu daengx Gaiyaleiz ranzranz gvaq doh bae cij ndaej. Byaij daengz ranz lawz, ranz lawz couh aeu cuengq bauq. Doeklaeng couhdwg hawsuenggyangq lo. Vunzlaux cungj naeuz gij doxgaiq youq ciet- suenggyangq cawx haenx haemq naihyungh hix gitleih. Daengz doengxhaemh, gyoengqvunz couh dap aen daizheiq ndeu yienj heiqdoj, bouxcoz hix song sam boux doxcomz youq itheij eu fwen, eu daengz ngoenz daihngeih rienggyangq bae, yiengh- neix couh baenz aen hawfwen sueng- gyangq gveihmoz hungmbwk ndeu lo.

Cietsuenggyangq Bouxcuengh dwg aen ciet biujyienh gij vwnzva Bouxcuengh raeuz dajndaem haeux- naz singjsien haenx, ndawde miz gij vwnzva gihyinh caeuq gij lizsij ndaejgeiq Bouxcuengh. Bi 2010, Cietsuenggyangq Diendaengj ndaej senj haeuj buek daihsam swcigih gaep feihyiz mingzloeg; bi 2014, hix ndaej senj haeuj guekgya gaep buek daihseiq feihyiz mingzloeg; bi 2016, de ndaej senj haeuj Gueklienzhab gyauqgohvwnz cujciz vunzloih feih- vuzciz vwnzva yizcanj daibyaujcoz mingzloeg.