It

2020 nienz 7 nyied 5 hauh, doihndei Ginhsuh dwk denva daeuj naeuz:“Yangh, Lauxyangz ranz gou mbouj youq lo.” Sing gangj de dingq mbouj ok miz maz linghyiengh.

Gou cam:“Mbouj youq lo, dwg maz eiqsei?” De naeuz:“Bae lo.” Seizneix ndaejnyi de daejsaekwk, gou roxnyinh de cingq haenqrengz nyaenx dwk, mbouj hawj swhgeij daej oksing. Gou youh cam:“De bae gyawz?” Sawqmwh, ndaejnyi de cuengqsing daejnga’nga, sing daej de saenq- doengh daemx mbwn, hawj vunz roxnyinh de daej ndaej bwt yaek dek、saej yaek goenq bae.

Seizneix gou cij rox “mbouj youq lo” “bae lo” dwg maz eiqsei. Gou doeksaek cam:“Lauxyangz ndeindindi, vihmaz baenz yienghneix?” Mbiengj de lij dwg daejnga’nga, mbouj dap, gou laebdaeb hemq:“Dauqdaej ok maz saeh? Baenzlawz naeuz bae couh bae ni?” Seizneix gou sim’in doihndei, gij saeh fwt daeuj neix, de dingj ndaej mbouj ndaej gvaqbae? Gaej laemx roengz nw! Gou naeuz:“Ginhsuh, gaej siengsim lailai, ndangdaej youqgaenj, gaej daej lo.” Gou gaem maenh souj- gih, dep gaenh goekrwz, lau lot saek coenz maz mbouj ndaejnyi. Gou mbouj rox aeu coenz maz daeuj nai de, couh gaen de daej.

Gvaq le yaep he, sing daej de iq di lo, de dingzdingz duenhduenh naeuz:“Haetneix Lauxyangz lij ndei, fwt laemx roengz couh bae lo.” Gou naeuz:“Suenq lo, Lauxyangz baenz- neix haenqsim biek raeuz bae, mbouj leix de, aeu ganq ndang swhgeij.”

Ginhsuh caeuq Lauxyangz dwg doeg Swhfan Yozyen seiz doxraen doxrox doxgyaez. Bi 1985, songde bizyez le gak boux faenboiq dauq mbanjranz swhgeij, cungj guh lauxsae. Ginhsuh youq Denzyangz Yen Yifung Yangh Cungsim Siujyoz, Lauxyangz youq Lingzyinz Yen Dunghhoz Yangh Cunghyoz. Bi 1989, Lauxyangz diuh daengz Denzyangz Yen Yifung Yangh Cunghyoz, song gvanbaz dauqdaej ndaej caemhyouq lo.

Gvaqlaeng geij bi, songde dox- lwnz youq gvaq geij aen hagdangz, doeklaeng Ginhsuh youq aen hag- dangz nyeznukngoemx guh lauxsae. Lauxyangz youq Minzcuz Cunghyoz guh lauxsae. Songde cungj dwg lauxsae maenhndei, 30 lai bi daeuj, doxhuz doxgyaez, noix doxceng.

Ciuhvunz Lauxyangz bingzciengz, hoeng, mbouj genjdan. 30 lai bi daeuj, de lai baez ndaej bingz guh lauxsae maenhndei、gungcanjdangj- yenz maenhndei ndaw singz. Lai bi daeuj de itcig dang lingjdauj, dawz hagdangz dajleix ndaej caezcupcup. Aeu bonjfaenh daeuj guh yienghndei, daezsang suijbingz sonhag bonjfaenh, yawjnaek beizyangj lauxsae bouxcoz, gaemmaenh gij cizlieng sonhag hag- dangz, gij cingzcik cunghgauj hag- dangz bi beij bi ndei. Ciuhvunz de gaenxguh, mbouj lau dwgrengz mbouj lau vunz ienq, gij cingzcik hagseng aen ban de son cungj mauhgvaq ban wnq.

Bi 2016, hongfuzbinz hix dwg faenh hong youqgaenj gyoengq laux- sae. Lauxyangz couh gag bauq bangfuz 3 ranzhoj, 3 ranz neix cungj youq aen mbanj he, liz ndaw singz aiq miz 40 goengleix. Lauxyangz roengz mbanj haeuj ranz bae cam nit cam raeuj, senhconz cwngcwz hawj gyoengqde, lawh gyoengqde sinhcingj gak cungj bangbouj, gujli、cihciz caeuq dazyinx gyoengqde cauxnieb. Doeklaeng 3 ranz cungj ndaej duethoj, miz song ranz ndaej senj daengz Lauxyangh Gyahyenz ndaw yen.

Hongsonhag hongfuzbinz song yiengh cungj aeu guh, yiengh lawz cungj mbouj ndaej nguh. Lauxyangz cijndei yungh seiz roengzban rox- naeuz couhmoz bae guh hongfuzbinz. Bineix 4 nyied, miz raq fwnrumz hung ndeu, Lauxyangz yawj raq fwnrumz neix, gig gvaqniemh ranz Liengz Yifeih de bangfuz haenx. Ranz neix ngamq daengj ranzlaeuz mbouj geij nanz, conghmbaeklae gwnz ranz lij dwg aeu cien daeuj hoemq. Lauxyangz yousim cien deng rumz hung bongj vaih.

Ngoenz daihngeih lajbyongh- ngoenz roengzdangz le, fwn lij moenqfifi, Lauxyangz heuh Ginhsuh caeuq de ganj bae ranz Liengz Yifeih yawjyawj. Caen dahraix, gaiq cien deng rumz hung bongj vaih lo, raemxfwn roh haeuj ranz bae. Seizde, Liengz Yifeih mbouj youq ranz, Lauxyangz bae cam rox gaiq cien gai 130 maenz, de couh hawj mehyah Liengz Yifeih 200 maenz, daengq de naeuz sikhaek bae cawx lingh gaiq daeuj hoemq conghmbaeklae. Mehyah Liengz Yifeih gamjdoengh ndaej lae raemxda, doq ngaekgyaeuj doq naeuz “gyo’mbaiq”. Haemhde dauqranz gaenq 8 diemj lai cung. Lauxyangz couhdwg yienghneix saehsaeh haeuj- sim.

Ngeih

Gwn caeuz gvaq le, gou iu geij boux doihndei caemh bae nai Ginh- suh. Daengz ranz de le, cij raen bakdouranz venj mbaw baengzhau yiemzdou ndeu, baihndaw yiemzdou dwg gouhbenj, baihrog coq aen congz ndeu, mbawsiengq Lauxyangz daengj gwnz congz, mbawsiengq dangqnaj miz aen lozyieng ndeu, lozyieng song henz diemj lab, byaifeizlab seiz mbouj seiz bibuengq mbat ndeu. Gyoengq dauh youq yiemhranz cingq roq gyongraz、nam ging. Dou hawj Lauxyangz hwnj yieng le, miz boux caencik ndeu daiq dou bae yawj Ginhsuh.

Youq aen rug ndeu, Ginhsuh naengh aen daengqeij inglaeng he, aendaengq ing ciengz, gyaeuj de hix ing ciengz, aenhoz lumj yaek dawz mbouj ndaej aengyaeuj nei, songda sohswdswd yawj coh dingjranz, gij yiengh de hawj dou sim’in. Raen dou byaij haeujdaeuj, ndang de cij naengh soh hwnjdaeuj, raemxda gaenriengz rih ok, doq daej doq naeuz:“Sinhoj gyoengqsou lo.” Mbouj rox ngoenzneix de daej gvaq geijlai baez, seizneix sing gangj de gig hep, lumj sing bitboux nei. Dou mwngz coenz gou coenz nai de. Gou nyaenx mbouj ndaej youh cam, Ginhsuh menhmenh lwnh dou nyi——

“3 hoh ranzhoj Lauxyangz bang- fuz haenx, miz ranz ndeu coh heuhguh Vangz Lijcungz, ranz vunz neix mbouj boiqhab geijlai, geij ngoenz neix Lauxyangz cungj dwg vih ranz neix nyaengq. Ranz neix miz 4 boux vunz, song goenggeq caeuq song dahlan. Bohmeh song dahlan gaenq gvaqseiq lo. Dahlandaih gauhcungh bizyez le youq ndaw singz dajgoeng, dahlan’iq doeg cuhcungh, youq ranzcoj caeuq goengbuz youq. Ranz neix dwg ranz- senjdieg, youq Lauxyangh Gyahyenz ndaw yen miz dauq ranz ndeu, dahlandaih caeuq godangz de youq ndaw. Song goenggeq boux he miz binghfeigezhwz, boux he miz bingh- cenzlezsenyenz, hainduj songde lij muenz gij bingh mbouj hawj Laux- yangz rox. Sojmiz gij cwng ranz de, lumjnaeuz souhaeuj cwng、yihbauj cwng daengj cungj youz lwgdaih song goenggeq baujguenj. Aulungz、mehbaj ciengznienz youq rog dajgoeng, gij caizliu fuzbingz couh ce youq ndaw ranz Lauxyiengh Gyahyenz. Dahlan- daih vahnoix, mbouj haengj ciep denva, nanz ndaej daj aenbak de rox gij cingzgvang ndawranz. Moix baez roengz mbanj bae guh hongfuzbinz, cungj aeu buet gwnz buet laj geij baez. Ngoenzbonz lajbyonghngoenz roengz- dangz le, Lauxyangz youh heuh gou caeuq de bae ranz Vangz Lijcungz, cingqngamj aulungz mehbaj hix youq, dou lwnh gak cungj gij cwngcwz sinhnungzhoz hawj songde, maq- muengh songde daiq song goenggeq bae ywbingh……

Daj ranz Vangz Lijcungz okdaeuj daengngoenz gaenq roengz bya, dauq daengz ndaw singz, gaenq 8 diemj- cung, dou genjdan gwn haeuxcaeuz le, Lauxyangz youh bae ranzhag gyaban lo, daengz 11 diemj cij maranz. Ngoenzlwenz dwg singhgeizloek, hag- dangz lij aeu hwnjdangz. Gyanghaet Lauxyangz miz 2 dangz go, banringz miz 2 dangz go, de dawz banzringz 2 dangz go caeuq lingh boux lauxsae doxvuenh, youq banhaet hwnj sat 4 dangz go. Banringz dou youh bae Lauxyangh Gyahyenz ra dahlandaih, siengj aeu gij caizliu fuzbinz daeuj ciuq fangh’an moq gaij, de mbouj youq ranz, hix mbouj ciep denva. Dou youq aen siujgih de baenqlulu, simgip dangqmaz, raen byawz cungj cam, rox mbouj roxnaj de? Doeklaeng dajdingq ndaej rox godangz de youq hanghci ndaw yen gai ci. Dou ganj bae hanghci, dauqdaej ndaej raen de lo. Dou youh lwnh gak cungj cwngcwz hawj de, dawz gij souhaeuj caeuq bangbouj ndaw ranz naeuz de nyi, heuh de guh bouxvunz mingzbeg ranzhoj. Aeu ndaej caizliu daengz fwngz gaenq dwg 5 diemj lai cung, dou hix naiq liux lo.

Ngoenzneix dwg ngoenz yietnaiq, dou gwn ngaizromh gvaq le, Laux- yangz yaek bae hagdangz cingjgaij, liuh mbouj daengz, ngamq yaek yamq okdou couh laemx roengz, caizliu gyang fwngz de sanq youq gwnz dieg, cigouqmingh gig vaiq couh daengz, hoeng……”

Ginhsuh gangj daengz neix, youh hozndaet lo. De gangj vah miz heiq mbouj miz rengz, hawj dou sim’in raixcaix.

Caencik baengzyoux bang dem bang daeuj nai Ginhsuh, dou cijndei dauqbae lo. Yaek dauqbae seiz, dou youh hawj Lauxyangz hwnj yieng, daengq de ndei byaij, youq baihde ndeindei yietnaiq. Song diuz lab yaek coemh sat lo, hoeng, labfeiz lij hwng.

Lauxyangz bineix ngamq ndaej 54 bi, de ciengzgeiz nyaengq hong lailai, mbouj rox mbouj nyinh gak cungj binghnaiq daeuj ciemq ndang. Ngoenzneix de fwt laemx roengz, lizhai gij hongson’gyauq de gyaez, lizhai hongfuzbinz de cingq haenqrengz bae guh, lizhai gyoengq hagseng de ganq, lizhai vunzranz de ndiep……