Gofaex deng bingh mbouj caengz lai seiz, bohmeh cingj ciengya daeuj, dawz buek faex deng nonhaih ceiq gonq haenx lienz rag ciemz hwnj raemj liux bae. Vihliux mienx deng lah bingh, lienz gofaex seiqhenz depgyawj haenx hix deng ciemz hwnj raemj bae. Hoeng mbouj miz yungh, binghcingz lahdawz. Gyoengq duz “raeufaex” haenx lumj duzhoenz nei dauqcawq youzlangh, hawj baenz benq gofaex deng lah bingh liux.

Gofaex deng lah yied daeuj yied lai. Vihliux fuengzre goekbingh sanj lai haih daengz gofaex seiqhenz, daxboh daxmeh dou cijndei daj suenmak swhgeij hainduj, nyaenx in dawz daengx benq suenmak lienz rag ciemz hwnj, dawz sojmiz gofaex doi baenz boengj aeu feiz coemh bae. Cib lai moux gofaex heuswdswd neix couh yienghneix yaepyet mbouj miz lo. Doenghgij gumzfaex hoengqvatvat haenx, lumj aenaen baksieng, lwed- yaengyaeng baij youq dangqnaj dou, mbouj nyaenx yawj de. Bingh- vangzlungz lij mbouj dingz lah daengx benq suenmak. Youq bi song bi dinjdet ndawde, seiqhenz sojmiz suenmak gyoengq beixnuengx laj- mbanj hix baenzbenq laemxboemz liux bae. Suenmak Bwzswng boh’au hix doxhaeuj, makgam dangzsa de ngamq baenz aen, hix cungj deng haih dai liux. Suenmak lij caengz ndaej bonj dauq couh yienghneix mbouj miz lo. Goem ceiq hung dwg doenghgij suenmak ngamq ndaem bi song bi lij caengz baenz mak haenx, lah bingh le doeklaeng hix mbouj ndaej mbouj deng lienz rag ciemz ok. Benq suenmak heuswd gvangqlangh neix couh yienghneix benq rangh benq laemx bae lo, bienqbaenz benq dieg ndoqndaq henjndaem ndeu.

Gou yawjraen boux ndaemmak deng goem camj haenx, goengzyongq youq naj gomak deng coemh raemxda laebyoegbyoeg. Gyoengqboux beix- nuengx dawz gij ngaenz daengx ranz rom miz cienzbouh daeuzhaeuj suen- mak haenx, bouxboux saetmuengh dangqmaz. Gij maqmuengh rongh- sagsag haenx lij youq ndaw fangz- hwnzloq, hoeng caengz caj mbwn rongh, gij ronghsagsag neix couh deng ciengz fangzhwnz yak gatgoenq lo.

Seizcou mbwn gvengq fwj mbang, hoeng bouxboux ndaw sim naek- gywggywg. Menhmenh ciepsouh aen saedsaeh neix le, daihgya rib liemx rib gvat, dawz loqsiengj caezcaemh daiq baema ranz, fouznaih dwk cuengq youq gehgungx bae, caih gohaz go- nywj hainduj ciemq benq suenmak gvangqlangh haenx. Hix miz vunz vuenh liux siengjfap, go makgam deng raemj liux le, ndaem go makleiz、makmaenj roxnaeuz gofaex wnq, miz- mbangj beixnuengx lajmbanj sawq ndaem go ywdoj, mbouj hawj benq dieg neix bienq fwz. Hoeng mboujcix binjcungj mbouj hab, mboujcix dajleix mbouj deng, caemhcaiq gveihmoz mbouj gaeuq hung, daengz doeklaeng, lij deng gohaz go’nywj seiqhenz haenx hoemqcw bae. Benq dieg gvangqlangh neix couh yienghneix deng fwz lo. Gvaqbae haujlai nanz, mbouj miz vunz gamj dauqcungz bae ndaem gomak. Dauqcungz ndaem gomak couh deng dauqcungz vat gumz, dauqcungz cawx dinfaex, dauqcungz ndaem, riengz- daeuj ngoenzngoenz rwed raemx、dwkbwnh、gaj non, caiq caj geij bi caj ndaej lwgda yaek conh bae cij ndaej baenz mak. Dwgrengz geij bi, cajmuengh geij bi, caj daengz doeklaeng mbouj itdingh aeu ndaej raeuz siengj ndaej haenx. Lij miz gvat rumz doek fwn liuh mbouj daengz haenx, lumj doek ciengz lwgbag ndeu mak deng dwk loenq liux, doek ciengz mwigoem ndeu, gomak deng nit dai, mbwnrengx nanz lai, mak maj mbouj baenzaen baenz gwn……Ceiq dwglau lij dwg binghvangzlungz, binghhaih fouzfap cawzraeg neix, ndaej hawj boux ndaem mak dwgrengz guh hong haenx uengjfeiq goenglauz. Gyoengq beixnuengx lajmbanj mbouj gamj daiq doenghfwngz haifwz, lauheiq dwg baksieng gaxgonq lij caengz ndei, lauheiq lij caengz guh dagrau guj ndei fungyiemj caeuq leih’ik ba.

Benq suenmak neix couh yiengh- neix deng vut fwz lo, ndaw suen maj rim gohaz go’nywj beij vunz lij sang haenx.

Haj

Daxmeh youq ndaw suenmak byaij hop ndeu, byaij haemq nanz cij daj ndaw boengj hung gihgi sezbi ndawde byaij okdaeuj. De dauqdaej youq ndaw boengj gihgi haenx ra gijmaz, gou mbouj roxyiuj. Funghliz fazden gunghswh co yungh suenmak gaenq miz sam bi lo, gaen loekrumz fatdienh hungloet youq gwnz benq dieg suenmak neix gaen dem gaen daengj hwnj, daiqdoengh seizgan coh ngoenzcaj gvaqbae foenfoen.

Daxmeh gyaez benq dieg neix, de sij mbouj ndaej benq dieg neix, youq suenmak co okbae geij bi neix ndawde, de cungj ra gak cungj leixyouz, seiz mbouj seiz bae suenmak yawjyawj, lumj ndaw suenmak rox youq ngoenzlawz loeklak majok benq gokmak ndeu daeuj nei. Gou yawj daxmeh ndwn youq gyang suenmak gohaz gaenq cw vunz haenx, ndawsim hix bienq ndaej youh fwz youh liengz.

Caj daengz aen gunghswh neix dawz funghliz fazdengih buen bae liux le, suenmak baenzlawz guh? Gou siengj cam daxmeh, hoeng yaek cam youh mbouj cam lo. Suenmak daj hainduj haifwz daengz seizneix, gaenq gvaqbae cib bi rimrwt. Daxboh daxmeh gaenq geq lo, lienz byaij roen yamq cungj menh lai lo, gaej yungh gangj bae causim gij hong naek haenx. Ndaem mak saetbaih le, gyoengqde hix naemj gvaq saetbaih yienzaen, vanzlij gag gvaiq swhgeij mbouj daiqdaeuz guhndei fuengzre bingh- doeg. Gyoengq beixnuengx lajmbanj deng goem haenx, daxboh daxmeh gou hix mbouj miz rengz bangcoengh gyoengqde caiq guh. Youq ndaw duenh seizgan haemq raez ndeu, daxboh daxmeh cungj roxnyinh doiq mbouj hwnj gyoengq beixnuengx lajmbanj haenx. Itcig daengz doek- laeng rox daengz, cungj cingzgvang neix mbouj dwg swhgeij guhloek, hix mbouj dwg dan dwg benq dieg neix deng nonhaih, aen sim gyoengqde cij ndaej dingh di. Geij beixnuengx dou, gak boux gak miz saehnieb, baenz- ngoenz nyaengqnyannyan, mbouj miz simcingz caeuq cinglig daeuj dajleix benq dieg neix lo.

Hoeng, gyoengq beixnuengx ranzmbanj maqmuengh baengh benq dieg aeu ndaej gwn haenx baenzlawz guh? Benq diegfwz gvangqlangh neix dauqdaej wnggai baenzlawz sousib?

Ndawbiengz miz mbouj miz go faexmak lawz seng roengzdaeuj couh dingj ndaej nditndat nitgyangj raemx dongj rumz gvat, hix mbouj lau saek cungj binghdoeg nonhaih, cij aeu dajleix di ndeu, couh ndaej hawj gwnz benq dieg neix daiq daeuj maq- muengh? Lij roxnaeuz, miz mbouj miz cungj gohgi moq ndeu, ndaej haekfug gij binghdoeg ndaw doenghgo, hawj nungzminz onjsim ndaem geijcib bi gomak? Hoeng, ndawbiengz cawzliux doenghgij gohaz go’nywj mbouj rieg- leh dienheiq、mbouj riegleh deihseiq hoenghhwd maj sang, mbouj miz cungj doenghgo lawz seihbienh youq yiengh vanzging lawz cungj maj ndaej hung, gyoengqde caeuq bouxvunz doxlumj, miz souhmingh, miz yaezrwix, aen swyenz gvilwd ce ndei gveng yaez neix gode hix aeu ei guh, ndojdeuz mbouj ndaej.

Byaij okbae haemq gyae lo, daxmeh caiq ngeux gyaeuj dauqbae yawj benq suenmak. Youq giz gyae haenx, Bwzswng boh’au boux vunz dog ngawzngwd, dinghdingh ndwn youq cungqgyang reih, de lumj cingq naemj gijmaz nei.

Rumz ci gvaqdaeuj, giz mbouj gyae haenx, aenloekrumz rengzrumz fatdienh hausak haenx cingq hainduj menhmenh cienq dwk, baenz benq gohaz youq ndaw rumz bibi buengq- buengq yaep ndeu le, youh dauqfuk yiengh gaeuq, lumjnaeuz yaek gangj gijmaz youh mbouj gangj, couh lumj gou seizneix nei.

Miz haujlai saeh fouznaih, gyoengqvunz lij fouzfap gaijgez ndaej, baez raemxhaij boekfanj ndeu, baez deihdaenq ndeu roxnaeuz ciengz binghraq ndeu, cungj rox gienj bae gij vwnzmingz caeuq maqmuengh raeuz caeux laebbaenz haenx. Gij fouznaih haenx, lumj raemxgeujgaeq conghndaem okyienh youq ndaw seizgan caeuq hoenggan, rox seizseiz gyangwn raeuz bae. Deng siengnaek、 dingznywngh、doiqdauq…… Doengh- gij saeh neix, rox youq vunzloih fazcanj ginggvaq ndawde okyienh lai baez. Raeuz guh ndaej daengz couhdwg youq ndaw seizgan ra ndaej gaijgez fuengfap, caeuq aen seiqgyaiq mboujduenh bienq geizheih aeu engqlai lixmingh hoenggan, bae ndojdeuz caeuq dienzbouj doenghgij diegfwz conghndaem cauxbaenz haenx.

Caijsoq ndei dwg, doenghgij bi neix daeuj, gou youq aen singz iq neix, moix bi cungj dawz fuengzre binghvangzlungz dangguh aen goq- daez youqgaenj daeuj yenzgiu, caemhcaiq aeundaej cingzcik haemq ndei. Ndaw singz iq, dingzlai suen- mak, mwh youq seizcou daeuj daengz, lij dwg mak henj gve rang, dwg aen gingj fungsou gyaeundei ndeu.

Gou lij nyienh saenq, cungj miz ngoenz ndeu, ranzmbanj benq dieg deng vut fwz neix, lij rox caiq heuswd mwncup hwnjdaeuj.(3 sat)