●10 nyied 16 hauh, Swcigih Liengzsiz Caeuq Vuzswh Cuzbei Giz、Nungzyez Nungzcunh Dingh、Gyauyuz Dingh、Fulenz daengj 5 aen bumwnz, caeuq Gveigangj Si Cwngfuj guhdoih youq Gveigangj gawjbanh aen hozdung hoihciengz daeuz ngoenzhaeuxgwn seiqgyaiq bi 2020 caeuq guh cou senhconz haeuxgwn ancienz.

（Danz Cozvwnz）

●10 nyied 16 hauh, Luzconh Yen Danhmen Cin banh aen yizsi doenghgij giyez gyaez coengh bouxwnq okrengz coengh gunggeng duetgungz fat bitlwg, mbouj sou cienz fat 2000 lai duz bitlwg hawj 100 lai ranzgungzhoj. Ranzgungz- hoj ciengx gij bit neix, aen cin neix bauj coengh ok gisuz, ciengx bit baenz gai le, ranzgungzhoj gag gai hix baenz, hawj gunghswh soucawx hix ndaej, aenq moix ranz ndaej 2000 lai maenz haeuj daeh.

（Loz Cwnghbauj）

●10 nyied 16 hauh, aen hozdung Daih’It Gaiq Gvangjsih Doxcomz Gaicawx Gova Gofaexlwg youq Gveilinz haiduj, baez neix gungh langhbaij 1000 lai yiengh 30 lai fanh bat gova gofaexlwg, gak si miz 109 aen giyez daeuj langhbaij, gij soq gaicawx baenz de miz 2.1065 ik maenz.

（Vuhmeij Gyauzhungz）

●Ciuq Yungzyen Fuzbinzban gyoepsuenq, bineix 1 nyied daengz 10 nyied ndawcib, daengx yienh 1590 ranzgungzhoj ciengx 9102 duz mou, ndaej ciengjbouj 621 fanh maenz, bingzyaenz ranz ndaej 3900 lai maenz. 5120 duz mounoh ndaej gai gvaq, 1036 duz mourauh, gungh ndaej cienz 2800 fanh maenz; cawz bae cienzgoek, ndaej cienzseuq 1630 fanh maenz, bingzyaenz ranz ndaej 10251 maenz.

（Cinz Cungzgvangj）