Aeu gij bwn duzroeg caeuq bitgaeq guh yienzliuh ma guh mbawveh, yaek ginggvaq 30 lai bouh cij “veh ok” duzmax biu- cauj bonghbuet haenx、duzgungq youzyekyek haenx caeuq gij gingjsaek gyaeundei daengj, gaiq- gaiq cungj lumj gij caen nei. Haenx couhdwg vehbwn Yilinz. De dwg aen dinfwngz fwngzguh daedsaek Yilinz ndeu. Gij dajcang de gyaqciq, gij vehnda de giuj- miuq, gyoengqvunz cungj haenh dwk mbouj dingz. De dwg guek raeuz aenbaij vehbwn ndeu, hix dwg aen daiqbiuj vehbwn dog laeng Lingjnamz.

Vehbwn Yilinz baen guh song cungj, bingznem caeuq buenqdoednem. Guh fuk vehbwn ndeu cujyau baumiz veh doz、genj bwn caeuq cawqleix bwn、daet nem、dajcoih、cangbiuj daengj, bae guh veh seiz daegbied yaek yawj gij daegdiemj、 hung’iq caeuq gij saek bwncingq、bwnnyungz、bwnfwed ma veh. Gij bwn daj gizlawz daeuj ne? Gij bwn dwg daj gij bitgaeq caiqlij gij roeg rox mbin vunz dajciengx haenx daeuj, lumj gungjcoz daengj. Gij bwn yungh guh veh bingznem haenx dingzlai cungj dwg mbouj yungh nyumx saek, cijmiz gij bwn yungh guh veh buenqdoednem haenx dingznoix cij aeu nyumx di saek. Genj gij bwn lawz ma guh vehbwn gig gangjgouz, gij saek caeuq gij yiengh cungj youqgaenj dangq- maz. Mbangjbaez fuk veh he ca diuz bwn ndeu ra mbouj raen, daengx fuk veh couh mbouj aeu ndaej lo. Linghvaih, gij bwn duzroeg caemh baen geiqciet, itbuen haicin le gij bwn duzroeg cungj mongmumu hix mbouj nyangq lo, couh mbouj ndaej aeu lo. Dangyienz, genj bwn ngamq dwg bouh daih’it, liux le lij yaek dawz gij bwn bae swiq、siudoeg、dak hawq、cawz gij heiq de bae daengj, doeklaeng lij aeu ciuq gij hung’iq、yienghsiengq、saek bae faen loih cuengq haeuj ndaw hab bae. Fuk veh ndeu aiq yaek yungh bae gij bwn sam seiq duz gaeq yienghneix, guh fuk veh itbuen haenx aiq ngamq yungh ndwen daengz song ndwen, hoeng guh fuk vehbwn guh ndaej cingsaeq ndeu yaek guh baenz buenq bi roxnaeuz bi ndeu cij ndaej.

Vehbwn miz gij daegdiemj veh Cungguek caeuq veh suijcaij, cij gag baenz funghgwz, gij gisuz de gig sang, dinfwngz gig cing- saeq, vehguek、veh suijfaenj、vehyouz cungj beij mbouj gvaq de. Vehbwn youh saedyungh youh miz gij gyaciz souyo, gyoengqvunz cungj haengj daeuj cawx. Aen sigij gonq bet、goujcib nienzdaih, vehbwn fat dwk hoengh’oenoen, lij gai daengz gij guekgya Oucouh Meijcouh bae. Hoeng aen haw- ciengz vehbwn bienq iq le、ngaenz hix mbouj ngaeuq、cix mbouj miz vunzcaiz daengj, gij hwngfat caeuq cienzciep de couh miz di hoj lo. Vih ciengjgouq gij dinfwngz conzdungj yaek miedsiu haenx, Yilinz Si Cwngfuj caeuq bouh- monz miz gven haenx gaenxmaenx bae baujhoh caeuq hwngfat veh- bwn. Seizneix, vehbwn Yilinz gaenq bienqbaenz Yilinz mbaw mingzben daegbied ndeu lo.