Daeggangh ndaep aen veihsin le, daengx ndang lij lwed goenjcancan. De daengjhai youq gwnz congz, fan bae foek dauq ninz mbouj ndaek. Ndaw uk caenh yienh’ok aen naj gyaeundei Dahva daeuj.

Dahva dwg cuhcungh doengzhag Daeggangh. Daeggangh daj mwh cuhcungh couh maeggyaez Dahva. Dahva naj lumj yiengh lwggve, vunz sangseuq, youq ndaw ban dwg dah ceiq baenzsau. Daeggangh hix baenzmbauq, hoeng, ndang daemq di, ngamq miz mij roek lai, Dahva caeuq de sang ca mbouj geijlai doxbingz lo. Daeggangh miz di gag yawjsiuj bonjfaenh, caiqgya nienzgeij lij oiq, de mbouj gamj caeuq Dahva gangj vah gvaq. Hoeng, ndawsim caemrikrik ndiepniemh Dahva.

Daeggangh doeg 3 bi gauhcungh le, gauhgauj mbouj hwnj, couh maranz caeuq bohmeh guhhong. Dahva ranz gungz lai, cigciep bae doeg nungzyau 3 bi. Nungzyau bizyez le, youq ndaw singz dajgoeng bi ndeu couh maranz ndaem makgam, ndawranz baenzfouq lo. Gij saeh neix, Daeggangh geij ngoenz neix youq ndaw veihsin caeuq Dahva gangjgoj cij ngamq rox. Daeg- gangh caeuq Dahva doxbiek gaenq miz 6 bi lo. De ndaej 22 bi, caengz damz dahyoux gvaq, aenvih ndawsim de cij miz Dahva. Geij ngoenz gonq, miz doengzhag rag de haeuj aen veihsinginz bae, de cij dauq ndaej roebraen Dahva, songde couh doxgya veihsin, gangjgoj mbouj rox gaeuq.

Yienghneix, Daeggangh caeuq Dahva youq ndaw veihsin, yied gangj yied habhoz, yied gangj yied doxgyaez. Miz ngoenz he, Daeggangh sawq cam Dahva, naeuz:“Gou siengj raen naj mwngz.” Dahva mingz rox lij cam:“Raen naj gou guh maz?” Dingz yaep he, Daeggangh naeuz:“Gou siengj aeu mwngz guh yah.” Dahva fat aendoz caegriu he, cam:“Aeu gou guh yah, mwngz ciengx ndaej gou ha?” Daeggangh naeuz:“Mwngz gaej you, ranz gou yienghyiengh miz caez. Hwnq miz 3 caengz laeuz, daxboh gou rox buenq vaiz, daxmeh rox ciengx mou……” Dahva cam:“Mwngz ni, rox guh maz?” Daeggangh bakajsaengx. Dwg ha, gou rox guh maz? Daeggangh gag ngeix.

Daeggangh dwg lwgdog, bohmeh ungjcungh de lumj gaiqgim, gamz youq ndaw bak lau yungz bae, got youq ndaw fwngz lau lotdeuz. Daj iq daengz hung, di hongnaek hong’uq cungj mbouj hawj de nem fwngz, lau de bienq byom bienq ndaem, deng lwgsau yiemz bae. Gauhcungh bizyez maranz 3 bi lo, Daeggangh cawz le bang daxmeh guh di hongranz hong- mbaeu, ngoenznaengz cungj youzyouz laglag gvaq saedceij.

Daeggangh naemj yaep he, cij naeuz:“Gou bang daxmeh gueng mou.” Dahva youh fat aen doz caegriu he, naeuz:“Raeuz guh aen doxduenq he, baenz mbouj?” Daeggangh cam:“Doxduenq maz?” Dahva naeuz:“Youq ndaw 3 bi neix, mwngz danghnaeuz cauhnieb ndaej baenz gienh saeh he, gou couh haq hawj mwngz.” Daeggangh soengswt han- naeuz:“Baenz ha, mwngz deq gou, daengz seizde gangj vah yaek suenqsoq.”

Bak han yungzheih, caen guh cix hoj lo. Daeggangh naemj bae naemj dauq, cungj ra mbouj raen yaek guh maz saeh. Hoeng, gaenq gangj gvaq daihvah, gwih hwnj laengmax, mbouj buet mbouj ndaej lo. De naemj, daxmeh ciengx mou, gou bae ciengx yiengz ba.

Daeggangh bae haw cawx ma 5 duz yiengzlwg, gyaeng youq ndaw riengh ciengx. Byawz rox, ngamq ciengx ndaej 3 ndwen, 5 duz yiengzlwg couh ok siq bingh dai liux. Daeggangh youh bae cawx duzdouq ma ciengx, duzdouq engq hoj fugsaeh, caengz rim ndwen, hix duz gaen duz ngunhngi- ngi, gvaq mbouj geijlai nanz, couh iet din iet linx dai seuqsat. Daeggangh mbouj fug, youh ciengx bit, ciengx roegdoxgap…… Couh yienghneix, nyaengq baenz bi, de maz cungj ciengx mbouj baenz, lij goem bae bohmeh fan geij maenz cienz. Daeggangh miz di simnaiq lo. Daxmeh raen de cojgvaq, heuh de riengz bonjfaenh hag ciengx mou. Daeggangh simngeix, caemh ndaej, ciengx baenz couh ndaej, Dahva rox dwg byawz ciengx. Gvaq yaep he, de youh foujdingh aen siengjfap neix. Mbouj ndaej, yienghneix guh, mbouj suenq gij bonjsaeh swhgeij, Dahva rox le haengjdingh riugae de guhgyaj.

Haemhneix, Daeggangh ngamq roengz ninz, Dahva fat vah daeuj cam:“Baenzlawz yiengh, guh maz lo?” Daeggangh naeuz:“Baujmaed, ciengx baenz caiq lwnh mwngz nyi.” Dahva naeuz:“Gaej muenz gou lo, gou miz bouxdiemjseiq.” Yaep he, youh fat vah naeuz, “Dajciengx mbouj baenz, gaij guh dajndaem mbouj ndaej ha.” Daeggangh cam:“Seizneix ndaem maz canhcienz?” Dahva naeuz:“Mwngz sawq ndaem go’gyoij yawj- yawj.”

Daeggangh naemj, ndaem go- gyoij miz maz hoj, daj iq de couh gwn makgyoij, youq laj go’gyoij guhcaemz, majhung. De sikhaek cawx ma gomak- lwg, nyaengqnyinyi vat gumz, daeh bwnh, rwed raemx. De caeuq daxmeh goedgoed gaexgaex guh buenq ndwen, ndaem ndaej 5 moux go’gyoij. Byawz rox, gvaq geij ngoenz haeuj reih baez yawj, Daeggangh doeksaetyat, go’gyoij lumj vunzbingh fatndat nei, reuqratrat caez. Daeggangh ganjnaeuz rwed raemx mbouj gaeuq, vaiqdi aeu doengj rap raemx bae dwk. Hoeng, raemx ngoenzngoenz dwk, mbawgyoij dauq mbouj raen bienq heu saekdi. Gvaq ndwen lai, gomaklwg hixnaengz mbaw roz goek naeuh liux. Daeggangh ra mbouj raen gij yienzaen de, nyap- swdswd gwn mbouj roengz, ninz mbouj onj. Cingq youq seizneix, Dahva fatvah daeuj, naeuz:“Ndaem gyoij mbouj yungzheih ba. Seizneix guh maz cungj yaek miz gisuz. Mwngz bae nungz- gican ndaw cin, cam boux gisuzyenz baenzlawz guh.”

Daeggangh daeuj daengz nungz- gican ndaw cin, baez cam, cij roxyiuj ndaem makgyoij lij aeu baenzlai gisuz, bonjfaenh gag ndaengndiengq lo. Daeggangh hixnaengz bae ndaw yienh camgya aen beizyinbanh ndaem makgyoij he. Dauqma le, de ndaem baenz lo. De youh co reih lai ndaem 10 lai moux. Daengz bimoq, de couh ndaej sou lwggyoij, hix ndaej sou gij cingz Dahva lo. Daeggangh ndwn youq henz reihgyoij, simhai lumj fwjhau gwnzmbwn.

Bi daihsam, haeuj sam seiq nyied faenh, lwggyoij gaenq hung lumj gaemgienz lwgnding, heuraurau veij youq gwn go doengqnumnum. Caiq gvaq song sam ndwen dem, lwggyoij couh henjrwdrwd lo. Daeggangh lumj mup daengz gij heiqhom lwggyoij diemzsubsub, hix mup daengz gij heiqhom gwnz ndang Dahva fizfwd- fwd.

Seizhah baihnamz, aenmbwn lumj fajnaj lwgnyez, yaek bienq couh bienq. Ngoenzgonq lij ndit gvengq- yauyau, ngoenzlaeng sawqmwh fwt laepngaungau, yaepyet, raq rumzgeuj- gaeq he lumj raemxrongz nei daj baihbya haenx bongj daeuj fofo. Doengh reihgyoij Daeggangh deng gienj ndaej siksik sangxsangx. Daeg- gangh yaek daej mbouj miz raemxda, de simcieg lo, ndaw hoz gag swenjdai: Gou caeuq Dahva caen dwg mbouj miz yienzfaenh lo, dwgrengz sinhoj song bi lai, couh yienghneix deng raq rumz- geujgaeq gvet deuz seuqsat.

Daeggangh youq ndaw veihsin sij naeuz:“Doiq mbouj hwnj, gou mbouj miz bonjsaeh guh baenz saeh.” Sij sat couh raek buhvaq ninznag.

Lajbyonghngoenz, Daeggangh ninz youq gwnz congz buenq laep buenq ndiu, mumjmumj gyumqgyumq dingqnyi miz vunz dog dou. De ganjnaeuz dwg daxmeh heuh de gwn caeuz, couh sing duemhdumdum han:“Gou mbouj dungxiek, sou gwn lo.” De fonj ndang youh ninz, aendou lij yiengj dogdog. Daeggangh gig mbouj cingznyienh hwnqdaeuj hai dou. Baez yawj, de youh doeksaet youh sim- angq. Dahva riunyumnyum cingq ndwn youq dangqnaj de:“Yu, mwngz haengj ninzngoenz ha, haeuxcaeuz cungj mbouj gwn.” Daeggangh miz di najmong riuhehe naeuz:“Mwngz baenzlawz daeuj lo, daeuj riu gou luba.” Dahva riunyumnyum cim de:“Gangj maz? Doeknaiq la, mbouj siengj guh la?” Daeggangh naeuz:“Mwngz caiq deq gou bi dem, gou itdingh guh baenz saeh.” Dahva ngaemgyaeuj nyaenqndimndim naeuz:“Caiq deq bi dem, gou couh baenz saulw lo.” Naeuz sat, song gemj naj fwt mbin hwnj duj va’nding he, hoengzuu. Dingq de coenz vah neix, Daeggangh simcaem simnaiq. De riumbw naeuz:“Yienghneix, gou hoh mwngz gvaq ndaej vuenyungz lo.” Dahva cehda sawdikdik cim de:“Guh maz? Mwngz siengj gyaep gou deuz, mbouj coux gou guh vunz ranz mwngz ha?” Daeggangh singjsak gvaqdaeuj, doq iet song fwngz lamx Dahva haeuj ndaw rungj daeuj, gotdawz ndaej ndaetndetndet bae.

Haemh rugmoq, Daeggangh gaem fwngz Dahva unqswnh cam:“Gou guh mbouj baenz saeh, mwngz vihmaz lij haq hawj gou?” Dahva doenghcingz naeuz:“Vunz gik mbouj rox guh, vunz gaenx cix baenz gvai. Raeuz bouxcoz mbouj gag cauhnieb ra gwn, baengh gaet bohmeh gvaq saedceij, ngoenz- laeng bohmeh gvaqseiq le, raeuz baenzlawz guh? Seizneix mwngz bienq gaenx lo, song raeuz doxbaengh doxcoengh, lij lau guh mbouj ndaej gwn ha, lij lau ndaem makgyoij mbouj baenz ha.”

Daeggangh fwtfat singjuk, umj- dawz Dahva youh angq youh cup, baegfofo naeuz:“Deng, raeuz mbouj- dan ndaem gyoij baenz doengh, lij yaek seng lwg baenz rouh dem……”