Mwh dou bang daxboh daxmeh soengndang cat yw, couh swnzgei naeuz gyoengqde lai cingj geij boux gunghyinz, hoeng, gij guhfap aeu aen leixyouz gvensim daeuj gaijgik neix yaeuh mbouj ndaej gyoengqde. Gyoengqde mbouj dingq gangj, dauq- fanj hongz dou unj lai gwn mbouj ndaej saek di haemzhoj. Gvaq geij ngoenz le, caj ndokndang mbouj in le, gyoengqde youh gwed gvak bae reih lo. Yienghneix fanfan foekfoek, angq guh mbouj rox mbwq.

Gomak ngoenz beij ngoenz maj sang, bungz daengz saehcingz hix yied daeuj yied lai, lumj dwkbwnh, aeu bae ranz nungzminz cawx bwnhvaiz haeuswngswng haenx. Gaej yawjsiuj gij saeh cawx bwnhvaiz neix, cawx ndaej ci bwnhvaiz ndeu caen mbouj yungzheih, hix aeu miz gihvei cij cawx ndaej, aenvih mbouj dwg ranzranz cungj miz bwnhvaiz. Vihliux ndaej youq aen mbanj ndeu comz geij ranz aeu ci bwnh ndeu, gou geiq ndaej, daxmeh dwk le baenzhaemh dienhvah, heuh gyoengq caencik lajmbanj bae dauqcawq dajdingq, doeklaeng cij youq aen mbanj liz ranzcoj mbouj gyae haenx cawx ndaej cidohlahgih bwnhvaiz rimrwt ndeu. Daeh bwnhvaiz daengz suenmak, daxboh youh caeuq geij boux banggoeng caemhcaez rap dam rap dawz bwnhvaiz coqroengz doi youq henz suenmak, daxboh aenvih guh hong neix youh deng niuj hwet; youh lumjnaeuz, youq ndaw suenmak ancang guenjraemx gienh saeh neix, vihliux bu diuz guenjraemx naekgywg cocat haenx daengz ndaw suenmak, daxboh daxmeh sien youq yienhsingz cuenq bae cuenq dauq cawx raemx- guenj, doeklaeng heuh vunz bang daeh ma lajmbanj, caiq daj lajmbanj rag daengz ndaw suenmak. Guh gij hong naek neix gvaq le, binghdangzniu daxmeh youh fukfat baez ndeu, youh deng bae yihyen youq aen singhgiz ndeu; youh lumjnaeuz, gomak miz non aeu dwkyw gaj non, daxboh daxmeh couh aemq aen bwnvugi naekgywg haenx bae dwkyw, baez cet raemxyw, daengx bouxvunz deng humx youq ndaw mokyw, dwk baenz daengx aen suenmak le, daxboh daxmeh gaenq deng raemxyw cehnyumx ndaej ndang naiqnueknuek, lumj dengdoeg nei, gwnz ndang hwnj nwnj, daengx ndang mbouj cwxcaih, gvaq geij ngoenz, couh lauxlaux saedsaed dingzgoeng, bae yihyen dwkcim gwn yw.

Sam

Yienghneix roengzbae mbouj dwg banhfap. Dou gienq、ienq daxboh daxmeh lai, doeklaeng bienqbaenz caeuq gyoengqde doxndaq. Daxboh daxmeh caeuq daegsam doxceng, ndaq daegsam mbouj sim’in bohmeh baenzngoenz bae diemqlaeuj guh- caemz, youq gwnzmuengx dwk youz- heiq……Ndaw ranz soqlaiz mbouj miz baenzlai mauzdun gvaq, lumj reih suenmak deng cae liux nei, lienz dawz gij mauzdun ndaw ranz caez byonjboek liux. Doeklaeng, dou naeuz nyienh ok ngaenz cingj vunz daeuj guh hong, hawj daxboh daxmeh soeng di, hoeng daxboh daxmeh lijdwg mbouj haengj. Dou hainduj ra gak cungj leixyouz mbouj caiq bae suenmak bang guhhong, aeu neix daeuj coi gyoengqde doengzeiq cingj vunz. Hoeng, daxboh daxmeh cawzliux doiq dou ciemhciemh saetmuengh, lij mbouj ciepsouh aensim caen doiq gyoengqde ndei dou, lij buekmingh dawz aen ndang nyieg neix bae ganq aen suenmak, bae guh gij saehnieb gyoengqde caengz guh baenz haenx.

Gij you dou euq mbouj gvaq gij gyangq daxboh caeuq daxmeh, daengz couhmoz, dou lij rox lauxlaux saed- saed youq ndaw suenmak guh hong, dou dawz gij ienq gij you raenx baenz rengzak, mbouj gamsim mbouj cingznyienh dwk fwisaj youq gwnz benq reih haenx. Daxboh caeuq daxmeh raen dou nyiengh gyoengqde lo, youh angq youh sim’onj, gwnz naj dauqdaej loh riu lo.

Daihdeih caen goengbingz lai, sawj dou baez dem baez simhaemz simnyap、mbat dem mbat ndang baeg ndok in le cij ndaej cimz di van. Moix bi seizcin, daxmeh youq seiqhenz suenmak ndaem golwggva、goduh、golwgmanh、goho, doenghgo neix ndaej daengz gij namhbiz ndaw suenmak ciengx ndaej go oiq aen biz, dou ndaej gwn gij byaek neix hix habhoz raixcaix. Daxmeh seizbienh vanq geij gaem ceh gvehoengz coq ndaw suenmak, gvaq geij ndwen, gaeugve couh maj rim ndaw reih, dauqcawq dwg aen gvehoengz luenz- lulu. Gve miz lai gwn mbouj liux, dou heuh gyoengq caencik baengzyoux daeuj ndaw suenmak mbaet gve, gwn mbouj liux lij heuh gyoengqde aeu baema ranz. Youq ngoenzgyaj rox- naeuz ngoenzhoengq, dou cawx haujlai saejdaeuz, daengz ndaw suenmak daeuj bing, roxnaeuz coemh yiuzlwgmaenz, hawj gyoengq baengz- youx mbouj miz suenmak haenx yawjndwi youh hozhaenz dangqmaz.

Geij bi haenx, dou yungh sim ndaem gomak, lumj ndaem gohaeux daeuj gwn yienghhaenx yunghsim bae.

Youq haemzhoj caeuq angqyangz caez miz ndawde, dou dingj dwk mbouj doiqyamq, dauqdaej youq bi daihseiq, gwnz gomak giet baenz makgam henjrwgrwg lo. Bihaenx, yienznaeuz mak giet mbouj suenq lai, hoeng makgam ndei gai dangqmaz. Daxboh youq gwnz bakdou ranz sij hwnj cawxmak lienzhaeh dienhvah, mbouj geij ngoenz, couh miz geij buek vunz dwk dienhvah daeuj lienzhaeh cawx mak, hawj gyaqcienz hix mbouj doxdoengz. Dou caen angq lai lo, suenmak hainduj guh swnhleih lo, dou dawz gij youheiq geij bi neix gvengq gyae’gyangq bae liux caez. Bi daihngeih, seiqhenz benq lienz benq suenmak cungj giet mak lo. Doenghboux beixnuengx lajmbanj lij caengz ndaem mak haenx, yawj daengz gij seiqdaeuz neix, mbouj caiq yaemhywq, roengz gietsim hai reih ndaem mak. Bwzswng boh’au couhdwg buet vunz ndaem mak neix, yienznaeuz ndaem nguh geij bi, hoeng ndaw sim de miz maqmuengh rimrwg.

Gvaqlaeng laebdaeb sam bi, suenmak deng gak cungj yinhsu yingjyangj, yienznaeuz soucingz mbouj suenq ndei, hoeng cungj ndaej canh di ngaenz, dou lijdwg gig angq. Hong suenmak bienq ndaej cingqciengz le, dou youq damqra ndawde menhmenh ra ndaej swnghcanj gvilwd gomak, daxboh daxmeh gou gaenq suglienh rox guh gviveh caeuq cingjdaej suenqveh, sawj hong ndaem mak bienq ndaej guh noix ndaej lai. Aen suenmak dwg dieg ndaem gomak caemh dwg dieg guh’angq neix, cingq aeu gij yienghceij gyaeundei de cumxnyinh saedceij raeuz. Moix bi daengz seiz mbaet makgam, gij yienghceij gyaeundei neix couh lumj aen makgam baenzcug nei raengri caenciet. Youq ndaw suenmak gvangqlangh haenx, ci daeh mak baebae dauqdauq, aen makgam henj- rwgrwg youq laj ndit rongh- myabmyab, lwenq da dangqmaz. Mwh aen cigajceh cang rim mak haenx siusaet youq gwnz loh bae yienhsingz, ndaw daeh roxnaeuz ndaw gaj- ngaenzhangz gyoengq bouxndaemmak couh lai haeuj geij fanh maenz ngaenz roxnaeuz engq lai dem, gyoengqde naj riunyumnyum, gij riu neix, cang rim ronghgim caeuq feihrang lwgmak.

Ngoenz haenx banhaemh, mwh gou yawjraen Bwzswng boh’au dawz dab cienz ndeu coq daengz ndaw fwngz daxboh, gou cij sawqmwh rox lo, vihmaz daxboh daxmeh naeuz lawz cungj mbouj doengzeiq lai cingj saek boux gunghyinz, gyoengqde dawz di ngaenz rom ndaej haenx, faenbied ciq hawj gyoengq beixnuengx ndaw mbanj, hawj gyoengqde hix caeuq dou doxhaeuj, miz gihvei youq gwnz benq dieg neix hai ok maqmuengh.

Seiq

Hoeng, lajmbwn caihux nanz liuh daengz.

Guh suenmak daengz bi daihbet, cingq dwg seiz giet mak ceiq lai, ciengz binghvangzlungz ndeu lemx daengx suenmak, sojmiz makgam cungj deng bingh liux. Bingh- vangzlungz dwg cungj bingh aeu mingh go makgam, saekngoenz deng sanqgvangq, mbouj miz yw lawz yw ndaej, cawzliux lienz rag ciemz ok coemh bae, mbouj miz fuengfap lawz gouq ndaej.

Daxmeh fatyienh gomak mbouj cingqciengz ceiq gonq. De yawjraen miz song sam gomak gwnzbyai go miz mbawroz dai bae, gij mbawroz haenx mbouj dwg cingqciengz gag bienq roz, aenmak hix maj ndaej mbouj baenz yawj, saek monghenj gap saek heuaeuj, yienjok cungj saek ndaemdai ndeu. Daxmeh liuh daengz gode dwg baenzbingh lo, hoeng daxmeh laih- naeuz, cien lai gomak ndawde dai go ndeu song go hix suenq cingqciengz, ndigah, mbouj bae haeujsim de. Cig- daengz miz ngoenz ndeu de raen seiqhenz youh miz geij go hix baenz yiengh doxdoengz, daxmeh cij dawz saeh neix dwen hawj daxboh. Daxboh gip buet bae yawj, bae suenmak henzgyawj yawj, yawjraen ca mbouj geijlai ranzranz cungj miz di gomak deng bingh. Daxboh saeknaj bienq liux.

Dou mbouj rox doenghgij binghdoeg neix daj gizlawz daeuj. Dingq gangj cungj bingh dwglau neix heuhguh “raeufaex”, dwg cungj nonhaih binghlah ndeu, duzde bak lumj duznyungz, lumj cim nei dawz binghdoeg dwk daengz gwnz ndang gofaex bae, liuxle dauqcawq luenh mbin luenh cienzboq, gyoengq duzneix mboujdanh nanz cawzraeg, lij nanz gaemhanh dangqmaz.

（2）