Gij dinfwngz guh siuqdoi Bouxcuengh Cingsih youq Cingsih Si Sinhcing Cin Hawgiucouh、ndaw si gag aen segih caeuq Vadung、Sinhhih、Lungzlinz、Anhdwz daengj yanghcin. Ndawde, Giucouh dwg “mbanjranz aendomq” gyoengqvunz gyae’gyawj cungj rox haenx, hix dwg aen mbanj dog louz miz gij dinfwngz guh siuqdoi ndeu. Gij vunz gwnzhaw ranzranz hohhoh cungj rox aeu gij dinfwngz guh siuqdoi ma siuq aendomq.

Dingq vunzlaux gangj, gij lizsij siuqdoi laeng Cingsih aiq miz sam bak lai bi lo, gij gwndaenj gyoengqvunz cungj liz mbouj ndaej siuqdoi. Doenghbaez gij lwgmbauq、dahsau Bouxcuengh baenzranz seiz, gij doxgaiq bingzseiz yungh haenx cungj caeuq siuqdoi miz gvanhaeh, lumjbaenz gaenswiz siuqdoi、aennda siuqdoi、haizbaengzva siuqdoi、aendomq siuqdoi、gaen’gyaeuj siuqdoi daengj. Gij dinfwngz guh siuqdoi Bouxcuengh Cingsih gig fukcab、dozanq gyaqciq、gij raiz gwnzde hix saeqnaeh, gig miz lizdijgamj. Aenvih siuq okdaeuj lumj gij caen nei, soqlaiz couh miz gij mingzdaeuz fouzdeu yisuz haenx. Gij bouhloh siuqdoi miz: Dawz bet diuz maesei miz saek, gyaeuj ndeu lienz haeuj aenloek, gyaeuj ndeu hix cug haeuj bet gep gaeuvaiz bae; dawz bet gep gaeuvaiz gyauca mbouj dingz, yienghneix couh dawz bet diuz maesei gij saek mbouj doengz haenx san baenz diuz sailaisaek maqhuz na ndeu; aeu diuz sailaisaek neix daepciep youq gwnz doz gaenq veh ndei bae, caiq aeu maesei bae nyib ndei. Siuq siuqdoi dwg gij hong saeqnaeh ndeu, cuj mae ndeu ngamq song nga, diuz sailaisaek aeu bet cuj mae san baenz haenx cungj mbouj miz leiz ndeu gvangq. Dajdingh dwg boux lauxhangz he, yungh seiq diemjcung caemh ngamq san ndaej diuz sailaisaek aiq miz sam cik raez yienghneix. Gij doz siuqdoi itbuen miz va、doenghduz caeuq cihsaw daengj. Lumjbaenz aendomq siuqdoi, cawjdaez itbuen youq cungqgyang, baihgwnz dwg duz roxmbin he, baihlaj hix dwg duznyaen. Gij dinfwngz guh siuqdoi lai youh cab, hoeng gij doxgaiq siuq okdaeuj haenx cix gyaqciq gvaq siuqbingz. Gyoengqvunz cungj nyinhnaeuz de gyaeundei, cungj haemq haengj cawx.

Gij dinfwngz guh siuqdoi Cingsih youq gwnz lizsij siuqdoi Cungguek gag miz gij daegsaek de, gig noixraen. Bi 2016, siuqdoi Bouxcuengh Cingsih ndaej senj haeuj swcigih buek daihroek feihyiz mingzloeg.