It

Daxmeh naeuz de siengj bae suenmak yawjyawj. Gou naeuz gou goj bae. Yienghneix, gou riengz daxmeh daj ranz mehsimj ranzcoj okdaeuj, byaij daengz henz goengloh baihrog mbanj. Doiqnaj goengloh dwg benq suenmak gvangqlangh ndeu. Danghnaeuz dwg gaxgonq, ndwn youq baihneix yawj baihhaenx bae, ndaej yawjraen gomak heuswdswd gwnz benq dieg gvangqlangh haenx youq ndaw rumz ngauznged bibuengq. Hoeng, seizneix, mboujcaiq ndaej raen gomak heuswdswd lo, cij ndaej yawjraen gohaz gorum nyaengqnyangq rozrangh youq gizde.

Baihrog suenmak ranz dou, gaenq deng benjdangj saeklamz miz song mij sang haenx humx liux, cawzliux miz gyaq gijdiugih sangngau duiqnangq ndeu dinghdingh daengj youq baih suenmak ndeu, baihndaw gijmaz hix yawj mbouj raen. Gvaengx benjdangj saeklamz haenx youq ndaw dieg suen saemnyamj neix engqgya yienhda. Diuzroen iq gaenq deng gohaz gorum beij vunz sang haenx mued liux lo, gwnz dieg maj rim gofaetvaiz, aen makfaetvaiz oenngangngang, dou baez depgyawj de, de couh nem ndang dou hwnjdaeuj. Mboujcaengz byaij geijlai gyae, daengx ndang cungj nem rim oen liux, naengnoh deng caengq dwk nanzsouh dangqmaz. Gou caeuq daxmeh cijndei ei roen gaeuq dauqma. Daj lingh diuzroen bae, van aen van hung ndeu cij bae daengz baihnaj suenmak.

Bihaenx, bohmeh gou youq baihnaj suenmak hwnj le aen ranz gvangqlangh ndeu, ndaw ranz cuengq miz doxgaiq dajcawj、gyasei gaeuq, lij miz faggvak、fagcanj、geuzdaedfaex、aenloz doenghgij hongdawz neix. Gizsaed, neix dwg aen ranz rwixyaez ndeu. Mwh dou youq ndaw suenmak guh hong, daxmeh couh baema gonq, youq ranzdajcawj cawj haeux cawj caz, caj gyoengq banghong dungx iekngaungau haenx ma ranz gwn haeux gwn caz. Baez daengz couhmoz, dou couh daeuj ndaw suenmak bang guhhong. Gyoengq bouxhung youq ndaw suen guh gak cungj gak yiengh hong, gyoengq lwgnyez youq seiqhenz ranz guh’angq, bouxhung lwgnyez cungj roxnyinh habhoz vaiqvued. Hoeng, seizneix, aen ranz daiq angqyangz lailai hawj dou neix, gaenq deng vutfwz liux lo, aenbungz baihnaj ranz haenx hix ngauzngwd bibuengq yaek doemqlak lo.

Suenmak caeuq ranz cungj co okbae lo, dou mbouj miz yaekseiz, dou daj bouxcawj bienqbaenz vunzrog lo. Daxmeh mingzmingz rox, aendou gaenq deng daep liux, lij bae gaex dou, mbouj rox de siengj sawqdamq gijmaz. Daxmeh gaex aendou mbouj hai, de couh daj aen conghcueng bohliz gaeuqgeq haenx yawj ndaw ranz bae, gag danq gaemz heiq ndeu. Mwhneix, dou ndaej nyi ndaw aen ranzsuenmak Bwzswng boh’au baihnaj goengloh miz sing yiengj, dwg gij sing daen hazsauj yiengjyoyo. Dou ngeux gyaeuj gvaqbae yawj, yawjraen Bwzswng boh’au cingq daj ndaw ranzsuenmak de byaij okdaeuj.

“Bwzswng, mwngz guhlawz hix youq gizneix?” Daxmeh cam.

“Beixsauj mwngz mbouj dwg hix youq gizneix ma?” Bwzswng boh’au riumbw naeuz.

Daxmeh hix riumbw yaep ndeu, mbouj gangj vah. Gou rox, daxmeh caeuq Bwzswng boh’au cungj rox ndaw sim gyoengqde siengj gijmaz. Bwzswng boh’au beij bohmeh gou nienz nomj geij bi, de heuh daxboh gou guh godaih, heuh daxmeh gou guh beixsauj, geij bi gonq bang ranz dou ndaem gomak, doeklaeng liujgaij ndaem mak hangzcingz le, hix youq doiqnaj suenmak ranz gou ndaem le benq reih gomak ndeu, hix lumj ranz gou nei, youq henz goengloh guhbaenz aen ranz ndeu, caeuq ranz dou doiqnaj cingqcek bae.

Gyoengqde caiq hix mbouj gangj gijmaz. Bwzswng boh’au youh vang haeuj ndaw ranzsuenmak de bae, mbouj rox de cingq gip gijmaz doxgaiq. Daxmeh hopngomx suenmak byaij hop ndeu, doeklaeng yawjraen giz banjgek ndeu ce miz aen congh doeng haeuj ndaw suen ndeu, daxmeh mbouj lawq saekdi couh haeuj ndaw bae, lumj gaenjgip haeuj ndaw aenranz swhgeij lizhai nanz lai haenx nei.

Suenmak ranz gou miz cibhaj moux, seizneix ndaw suen cang rim denlanj, lij miz haujlai aen gihgi yendaiva hunglot mbouj rox mingzcoh haenx. Sam bi gonq, suenmak deng aen funghliz fazden gunghswh ndeu co bae lo, yungh daeuj cang gij doxgaiq hungloet haenx.

Aen suenmak heuswdswd haenx caeux couh mbouj miz lo.

Ngeih

Cib bi gaxgonq, gou youq aen singz iq haenx, vunz ndaem mak lai raixcaix. Haujlai vunz dauqma lajmbanj co dieg daeuj ndaem gomak, daengz mak cug le, baenz buek gai okbae, couh canh ndaej bit ngaenz ndeu. Cingqngamj ranzcoj dou hix miz geij moux reih, daxboh daxmeh doxyaeng, roxnyinh ce fwz hix uengjndwi, caeuq gyoengq beixnuengx seiqhenz doxvuenh diegreih, hix guh ndaej cib geij moux daeuj ndaem mak. Seizhaenx, daegsam ngamq dangbing dauqma, hong lijcaengz onjdingh, daihgya cungj siengj doxhaeuj, benq suenmak neix, daengzcog dwg aen saehnieb hoenghhwd roennaj gvangqlangh daegsam. Mbouj gvaq geijlai nanz, bohmeh dawz doenghgij reih neix cingjhab baenz gaiq ndeu dahraix, youh cawx ndaej cien lai go dinfaex, youq ndwencieng gvaqlaeng ngoenz hoiznyinh ndeu, dou dawz dinfaex neix nyinhcaen ndaem roengz gij gumz vat ndei haenx bae, rwed raemxmaenhrag, gyoengqgo dinfaex daemqdet haenx youq ndaw rumzcin bibuengq hwnjdaeuj.

Gyoengq beixnuengx ndaw mbanj hix ciuq fuengfap dou bae guh, dawz reih seiqhenz gvat ndei hwnjdaeuj ndaem gomak. Bi ndeu song bi, benq doenghnaz sang daemq mbouj bingz baihrog neix, cungj deng gihgi gudvat vat doh liux. Doenghgij dinfaex daemqdet haenx, lumj ngava dahsien vanq roengz deih nei, yaepyet caezcingj baizlied youq gwnz dieg namhhenj neix, rumzbya liengzsisi, ci dwk mbawfaex yied daeuj yied mwn haenx bibi buengqbuengq, sanqfat heiq rangfwdfwd.

Daxmeh ciengzseiz cingj Bwzswng boh’au daeuj suenmak bang guhhong. Bouxcoz ndaw mbanj dingzlai vunz ok bae dajdoeng, cij lw lwgnyez bouxgeq youq ranz. Caeklaiq youq lajmbanj, boux hajcib lai bi lij suenqguh boux guh hong cungnienz, ceiqsiuj beij gyoengqdou soqlaiz mbouj guh hongreih hongnaz gvaq ak lai lo.

Guh bouxndaemmak sinhoj lai, daj bonjcaet daeuj gangj couhdwg dauq guh bouxguhnaz. Daxboh daxmeh ciengzseiz youq laj ndit haenq、rumz nit fwn hung guh hong naek. Suenmak geizgonq roengz ngaenz lai, ndaem gomak le sam bi gonq caengz baenz mak, cij ok ngaenz mbouj miz souhaeuj. Daxboh daxmeh siengj mbaet bonjcienz, haujlai saehcingz, gyoengqde cungj caenfwngz bae guh. Lumjbaenz, youq mwh ngamq coih bingz dieg suenmak, ndaw suenmak deng vat ok haujlai gaiqrin hung iq mbouj doxdoengz haenx, daxmeh nyaenx mbouj ndaej gij rin gaz din neix, aeu gip rin deuz bae. De cingj geij boux beixnuengx ndaw mbanj daeuj, youh heuh daegnuengx、 dangzcej dangzgo geij boux daeuj bang buendaeh. Hoeng, hong buendaeh cix dwg hong aeu mingh vunz ha, ndaek rin ndeu miz geij gaen naek, ndaek iq di lij ndei, gou dawz hwnjdaeuj, gveng coh suenmak bae, lumj ndungq aen giuzyienz nei naek dangqmaz, buen ndaek rin hung, dou couh youq gwnz dieg yaep ringx yaep dingz, yaep dingz yaep gaex, yungh sat rengzhung cij dawz ndaekde loengh daengz henz suenmak. Nditndat dak ndaej vunz gyaeuj yaek conh feiz bae, mizseiz daengj hwet hwnjdaeuj yawj benq suenmak gvangqlangh baihnaj neix, ndaw sim sawqmwh roxnyinh doeknaiq dangqmaz. Gij hong naek dwgrengz neix guh ngoenz ndeu cungj nanz gvaq. Gou fouzfap siengj, aeu gvaq geijlai ngoenz lumj yienghneix cij caj daengz gomak majhung, caj daengz gwn gomakgam baenz aen henjrwgrwg.

Mwh daengngoenz doekbya, guh hong liux le, daengx ranz vunz lumj boux fumhduet youzraemx gvaq haij gvaq dah, daj ndaw raemx dumzsubsub benz okdaeuj nei, diuqgah dangqmaz. Bwzswng boh’au caeuq song boux banggoeng naengh youq naj ranz gwn raemx, buhvaq gyoengqde dumzsub liux, hoeng, gyoengqde mbouj lumj dou yienghneix naiqnueknuek, gyoengqde lij miz gangj miz riu, lumjnaeuz gwn raemx roengz dungx le ndang youh miz rengz hwnjdaeuj lo.

Hoeng, doiq hong naek hong dwgrengz neix, daxboh daxmeh goj mbouj lau saek di, aensim hoenxfug aen suenmak gyoengqde mbouj bienq. Dou couhmoz cij bae ngoenz ndeu song ngoenz, hoeng, daxboh daxmeh aen singgeiz ndeu aeu bae geij baez, sijsaeq dajleix suenmak. Nienzgeij mbouj rox yaeuh vunz, ceiqheiq caiq hung bungzdaengz yienhsaed cungj nanz guh. Daxboh daxmeh ndokndaih gaenq geq, ndangdaej gaenq nyieg, sam ngoenz haj ngoenz gizneix get gizhaenx in, mbouj dwg ngoenzneix deng mbit hwet couh dwg ngoenzcog deng niuj din, gyoengqde aeu naengnoh getin neix naeuz daxboh daxmeh nyi, nienzgeij geq lo mbouj ndaej angjak. （1）