Lungz Byauh hainduj byomreuq lo, baenzngoenz lumj vut hoenz le nei, naiqnueknuek, daxmeh de dauqcawq vih de cam saenz gouz baed caeuq boekgvaq, cawx ywbouj hawj de bouj yingzyangj, hoeng dwk yw mbouj deng bingh, mbouj miz saekdi yungh.

“Lungz Byauh ha, daeuj, caeuq daxmeh gangj lauxsaed.” Miz ngoenz ndeu, daxmeh de rag de daengz henz ndang, lumj lumh daeglwg ngamq ndaej haj roek bi nei unqswnh doxndiep cam de:“Dwg mbouj dwg siengj aeu bawx lo? W!”

“……”

Hoz Lungz Byauh najmong ndaej hoengzfwgfwg hwnjdaeuj, mbouj rox yaek baenzlawz dap daxmeh de cijndei.

“Mwngz mbouj han, couhdwg siengj lo!” Daxmeh de gig angqyangz nunu lwgda gaeq naeuz:“Mwngz yawj daxmeh ngawz lai lo, lwg majhung lo, gou baenzlawz cungj siengj mbouj daengz ne? Ngoenzcog, gou couh bae dak Buzsimjsam bae, yawjyawj seiqhenz miz dahsau ranz lawz sawmingh caeuq mwngz doxhab……”

“Meh!” Lungz Byauh dajduenh gij vah daxmeh, lwnh naeuz:“Mbouj dwg, mwngz ngeix loek lo——”

“Lwg, meh ngeix deng lo, mbouj loek!” Daxmeh de riunyumnyum byaij deuz lo.

Lungz Byauh nyengh ndwn youq gizde, de rox caeuq daxmeh gangj maz ne? Daxmeh cai ndaej deng, hojsik cij cai deng le dingz ndeu ndwi, daxmeh baenzlawz rox de gaenq maez boux dahsau lwgda hung he ne? Danghnaeuz daxmeh caen dak ndaej Buzsimjsam boux guh mehmoiz bae ranz dahsau haenx guhmoiz, de couh angq ndaej yaek gvih roengzdaeuj baiq daxmeh lo!

Hoeng, de ngamq caeuq daxmeh baenzde naeuz, youh baenzlawz caiq haibak ne? Caiq gangj, dahsau haenx singq maz, heuh maz? De cungj mbouj rox saekdi, youh daj gyawz gangj ne?

Siengj daengz doenghgij neix, Lungz Byauh gietsim aeu caenndang bae caz aen coh dahsau haenx okdaeuj, baenzneix hix ndei lwnh hawj Buzsimjsam daengz ranz de bae guhmoiz.

Yienghneix, gyanghaet ngoenz daihngeih, gyanghaet daihsam, gyanghaet daihseiq…… De youh daengz aen mbanj henz dah bae ra dahsau haenx.

(caengz sat)