Aen rek aeu miz fa,

Aen gyong miz laz boiq,

Ci mbawfaex ra doih,

Coi nuengx okdaeuj eu.

Sing fwen rwenzrwdrwd,

Duzdangh fwt bienq lungz,

Go nuengx ndaej doxbungz,

Lumj rumzcin ci naj.

Daeggo ci mbawfaex,

Dahnuengx ndaejnyi sing,

Caenh angq youq ndawsim,

Di ning hix mbouj nyienh.

Daeggo ci mbawfaex,

Dahnuengx gyaez henz dingq,

Faenh cingzeiq baenz cingh,

Eufwen nyinhcaen dap.

Daeggo ci mbawfaex,

Dahnuengx gyaez eufwen,

Aen sing doh ronghndwen,

Menhmenh lwenz ndawsim.

Daeggo ci mbawfaex,

Dahnuengx gyaez daeuj gaen,

Bak van lumj dangz gaem,

Nyienh baenzciuh mbouj liz.

Daeggo ci mbawfaex,

Dahnuengx gyaez eufwen,

Aen sing gizgiz cienz,

Cam nuengx nyienh haq lwi?

Daeggo ci mbawfaex,

Nazreih haeux cungj ndei,

Nuengx sou haeux ma seiz,

Guh laeuj bae soengq go.

Daeggo ci mbawfaex,

Dahnuengx eufwen caeuq,

Sing fwen cienz gvaqdaeuj,

Ndawsim raeuj lumj feiz.

Daeggo ci mbawfaex,

Dahnuengx gyaez eufwen,

Goengq bya diuz dah rwenz(daenh),

Gij sing cienz ndaw doengh.

Daeggo ci mbawfaex,

Dahnuengx daeuj guhdoih,

Byaek ndaw suen maj oiq,

Ndaw reih oij maj sang.

Daeggo ci mbawfaex,

Byaleix diuq ok dah,

Danghnaeuz nuengx rox va,

Dawz ma daemz raeuz ciengx.

Daeggo ci mbawfaex,

Iu nuengx bae guh doengz,

Lumj duzroeg caemh ndoeng,

Caez roengzrengz cauh ranz.

Daeggo ci mbawfaex,

Naz caeuq reih bienq ndei,

Dangh nuengx miz sim’eiq,

Daeuj caeuq beix guhcaemz.

Daeggo ci mbawfaex,

Nuengx dingq ndaej sim maez,

Ndaej caeuq go doxgyaez,

Nem lumj ceiz caeuq faengx.

Daeggo ci mbawfaex,

Nazreih cungj bienq gim,

Dangh nuengx caen mizsim,

Gij cingz neix naekned.

Daeggo ci mbawfaex,

Nuengx rox geiq ndawsim,

Nyienh bienq doq bienq dinz,

Doengzcaez mbin guhdoih.

Daego ci mbawfaex,

Nuengx dingq ndaej hozcaez,

Dangh raeuz ndaej doxgyaez,

Nem lumj ceiz haeuxcid.

Daeggo ci mbawfaex,

Nuengx aeu geiq daengz mwngz,

Song raeuz fwngz gaem fwngz,

Dai roengz gumz mbouj gveng.

Daeggo ci mbawfaex,

Nuengx dingq ndaej sim vuen,

Haibak daeuj eufwen,

Siengj doxbuenx ciuh vunz.

Daeggo ci mbawfaex,

Nuengx roxleix cibfaen,

Caez aeu sim doxgaen,

Cingz’eiq caen vah caen.

Daeggo ci mbawfaex,

Nuengx dingq ndaej doenghsim,

Doxrex caez yamq din,

Cingz beij rin lij naek.

Daeggo ci mbawfaex,

Rox simsaeh daeggo,

Nuengx sing fwen doh bo,

Rum maj coz(caz) doek coz(caz).

Daeggo ci mbawfaex,

Sing deih cij vih cingz,

Dangh nuengx hix mizsim,

Gvaqdaeuj ging yaep he.

Daeggo ci mbawfaex,

Dahuengx ngeix fwen riengz,

Sim go yied diuq bieng,

Siengj cam nuengx nyienh lwi?

Daeggo ci mbawfaex,

Nuengx rox ndaej cibfaen,

Caez aeu sim doxgaen,

Doxaeu laeng gvaq ngoenz.

Daeggo ci mbawfaex,

Dahnuengx geiq ndawsim,

Fwen dahnuengx mbouj dingz,

Gij din go mbouj yamq.

Mwngz geiq gou hix geiq,

Fanh seiq mbouj doxliz,

Caez gyaeuj ninz bak bi,

Dai le giz ndeu cangq.

Raeuz faenmingz doxgyaez,

Gaej hawj sei duenh ngaeux,

Daihfueng bae damzyoux,

Boux gyaez boux cij van.

Yied gangj lai miz lai,

Camh baiz daengz neix ceij(sat),

Dangh song raeuz miz eiq,

Gaej hawj sei duenh ngaeux.

Sing fwen cungj mbouj duenh,

Raeuz ciengzlwenx doxndei,

Miz cingz youh miz eiq,

Giet bak seiq gvanbaz.