Dwg gijmaz sawj saedceij bienq ndaej engq gyaeundei, gou siengj moix boux vunz gamjsouh cungj mbouj doxdoengz, gou dwg nyinhnaeuz riunyumj sawj saedceij bienq ndaej engq gyaeundei.

Ngoenzde, bonjlaiz simcingz gou gig ndei, cix sawqmwh deng mbaw sigienj he yingjyangj daengz simcingz gou, yawj faensoq gwnz sigienj, simcingz gou sikhaek nyapnyuk raixcaix. Vunz gangj hux mbouj yiengh dog, bonjlaiz banhaet mbwn gvengqyauyau, daengz banringz le gingqyienz gwnzmbwn fwj ndaemndatndat, gou yawj youq ndaw da gip youq ndaw sim. Daengz mwh cuengqhag gaenq doek fwn iq lo. Fwn iq doek youq gwnz ndang gou, gyaeuj gou hix ngaem ndaej yied daeuj yied daemq. Fwn doek hung lo, lij yied daeuj yied hung, couh youq mwhde, gou fwt raen miz aen bouqgaihuq he, ndawsim gou baez angq, sam yamq gyoeb guh song yamq buet haeuj bouqgaihuq bae.

Ndwn youq bakdou, yawj baihrog fwn yied doek yied hung, sim gou lumj miz gijmaz doxgaiq dimz nei, naekgywdgywd. Cingq youq mwh gou siengj buet haeuj gyang fwn bae, sing haidou he sawj gou dingz roengzdaeuj. Dwg dahcej soungaenz, de riunyumj sing iq cam gou fatseng gijmaz saeh ha, hoeng gou cix mbouj swt de, simcingz engqgya nyap lo. De dauq haeuj ndaw bouq bae, gvaq yaep ndeu de ndenq hawj gou aen liengjva gyaeundei he le, youh riunyumj naeuz: “Mboujguenj bungzdaengz gijmaz dwgrengz, cungj yaek baujciz najriu o.” Gou gyaengj mbat he, cij singj gvaqdaeuj ngaek gyaeuj gyo’mbaiq de, liuxle baenq ndang buet haeuj gyang fwn bae.

Ma daengz bakdou ranz gou, naj gou youh saepsaeng lo, gauj ndaej baenzneix ca, aiq ndaej deng daxmeh ndaq bw. Itmienh siengj dwk itmienh hai dou haeuj ranz. Daxmeh raen gou najsaep najmij, couh naeuz: “Dwg mbouj dwg gaujsi gauj ndaej mbouj ndei ha? Mbouj youqgaenj law, dawz daeuj hawj gou yawjyawj.” Gou mbouj cingznyienh dawz gaujgienj okdaeuj, bonjlaiz siengj cunjbei deng daxmeh ndaq, hoeng daxmeh cix lumhlumh aen’gyaeuj gou, riunyumj doiq gou naeuz:“Mbouj youqgaenj law, baezlaeng gauj ndei couh ndaej lo.” Gou youh gyaengj mbat he, roxnyinh ndawsim raeujrubrub.

Ngoenz daihngeih daeujdaengz hagdangz, lauxsae heuh gou bae bangunghsiz de, gou youh nyouq aen najbyak, gamjdaengz lauxsae yaek miq gou, hoeng lauxsae cix riunyumj gujli gou, vix ok yienzaen loek hawj gou. Sim gou lumj deng doiq fwngz raeujrub he lumh gvaq nei, daengx ndang raeujrubrub. Gvaqlaeng, mboujlwnh gou bungzdaengz gijmaz dwgrengz, gou mbouj caiq doeknaiq, gou dwg riunyumj mienhdoiq de.

Gijmaz sawj saedceij bienq ndaej engq gyaeundei, dwg riunyumj, dwg de gujli gou, cihciz gou. De lumj rumzcin daeuj vaiqvet, bae hix vaiqvet; hoeng de youh lumj ndaundeiq gwnzmbwn ronghmyag lwenqda, hawj saedceij miz maqmuengh lailai.

(haj nienzgaep Mauz Yizvwnz)