Caeklaiq aen mbanj iq neix vunz mbouj lai, caemhcaiq seizneix dingzlai vunzmbanj cungj hwnj bya haeuj naz bae guhhong lo, ndaw mbanj cij lw geij lwgnyez ndaej haj roek bi caeuq geij yahlaux daemh dwngx. Lungz Byauh mbeihung gvaengz gvaq henz bya, youh dauq daengz bakdou ranz dahsau haenx moq, hoeng lij dwg saetmuengh daj naj dou byaij gvaqbae.

De caiq hix mbouj miz mbei gvaeh roengzbae lo, cijndei dauqma lo.

Gwnz roen dauqranz, daengngoenz dingj gyaeuj dak ndaej de gyaeuj ngunh sim vueng, de yied siengj yied simnyap, yied siengj yied ndatheiq, ndawsim mieng caiq hix mbouj daeuj yawj de lo, byaij le geij leix roen daeuj guhmaz? Vih boux dahsau mbouj rox coh? Gawq mbouj dwg caencik youh mbouj dwg baengzyoux, dwg mbouj dwg baenzbag lo?

Vahmieng de dingj ndaej geij ngoenz dahraix, daengz ngoenz daihhaj, de lij caengz lumz ndaej dahsau haenx, ndawsim hoengqvangvang, gwq naemj hwnj song lwgda hung haenx, faj naj lengj haenx, diuz mengq raez haenx caeuq aen bak ak caemhcaiq naengbak iqet haenx!

Aen mbanj gyae’gyawj caeuq henz doenghnaz, hix miz mbouj noix dahsau ndaej cibroek caet bi, Lungz Byauh siengj daj doenghgij dahsau ndawde ra boux daeuj lawh gij ngaeuz ndawsim. Hoeng boux ndeu hix mbouj baenz, yied cimhra、yied doxbeij, dauqfanj yied roxnyinh boux dahsau haenx gyaetnyaed ndeigyaez, de saedcaih mbouj miz banhfap daj ndawsim uet de bae, yied uet yied cingh, yied daeuj yied niemh de.

Cij miz aen banhfap ndaej cawz gij siengjniemh, couhdwg youh daengz aen mbanjranz de bae, cijaeu ndaej caiq yawj de baez he couh hozhaih lo, couhsuenq cij ndaej yawjyawj gij ngaeuz de hix roxnyinh angqfwngfwng, mbouj gamj maqmuengh ndaej caiq caeuq de gangj vah lo.

Hoeng, aen maqmuengh iqet neix de hix mbouj miz banhfap guh ndaej daengz, gonqlaeng youh bae le haj roek baez, lij mbouj ndaej raen de baez he.

(caengz sat)