●Duenh neix, Bwzswz Si Minzcunghveij、Minzyij Cunghsinh gyoebbaenz aendoih genjcaz, daengz Bwzswz Si Fazgaijveij daengj 20 aen danhvei cienmonz genjcaz gyoengqde ciuq《Aen Diuzlaeh Hong Vah Saw Siujsoq Minzcuz Gvangjsih Bouxcuengh Swcigih》hengz ndaej baenzlawz yiengh, gungh heuh vunz gaij 30 gaiq(aen) baiz(aenyaenq) yungh Sawcuengh mbouj doiq、3 diuz byauhyij yungh Sawcuengh mbouj doiq.

(Lij Hungzlanz)

●9 nyied 18 hauh, Dasinh Yen Vujsanh Yangh Vwnhsinh Cunh doenghgij 500 moux naz youz reihrengx gaij baenz nazraemx de ndaej sou haeuxnaz lo, neix dwg reihrengx gaij baenz nazraemx le mbat daih’it ndaej sou. Dangqnaj daengx yienh gaij reihrengx baenz 1700 moux nazraemx. Vunzlai dangdieg baengh gaij dieg ndaem haeuxnaz le daihgaiq moux lai ndaej 1000 maenz.

（Cau Sibiz）

●Daj bi 2016 nienz daeuj, Denzyangz Gih gungh miz 9285 ranz ndaej doenghgij daigvanj iq banggungz 41174.56 fanh maenz, cienzbouh yungh daeuj coengh ranzgungzhoj gij hanghmoeg hwngfat gij canjnieb dajndaem dajciengx miz daegsaek、gunghsangh、fugsaeh daengj. Ndawde, bineix 1 daengz 8 nyied, aen gih neix gyoepsuenq lai banh ndei gij daigvanj neix 1850 bit(faenh) 8453.08 fanh maenz.

（Vangz Gozsun）

●9 nyied 8 hauh daengz 11 hauh, Swcigih Minzcunghveij baij aendoih diuyenz bae Mungzsanh Yen、Dwngzyen, cienmonz genjcaz doenghgij hanghmoeg aeu cienzngaenz hawj siujsoq minzcuz hwngfat.

（Sih Yuz）

●9 nyied 16 hauh, Lingzconh Yen hai aenhoih yenveij cangzveijvei, cienmonz lwnhyaeng gij hongsaeh daengx yienh cauhlaeb minzcuz doxgiet baenaj.

（Ciengj Mungzhanz）