“Yawj bingh dwk yw!” Coenz vah neix hawj Lungz Byauh singj lo, de roxnyinh daxmeh gangj ndaej deng, wnggai bae yawj bingh dwk yw, simnyap cij ndaej sanq.

Baenzneix, de youh ra roen byaij le geij leix, dauqcungz daeuj daengz aen mbanj henz dah haenx.

De daengz laj gorungz ngoenzde raen dahsau guhsaeg haenx, raemxdah laelek, ndaek rin ciuqgaeuq, cij dwg ngaeuz vunz gaenq fouz, dan lw gij ngaeuz Lungz Byauh gyaxgedged ingj youq ndaw raemxdah heuswd- swd.

“Ngoenzde de couh youq henz ndaek rin neix guhsaeg.” Lungz Byauh gag nam byaij daengz henz ndaek rin haenx, iet fwngz maeuq roengzbae bued raemxdah, youq ndaw uk dauq- ngeix geij ngoenz gonq youq gizneix baez daih’it raen dahsau haenx.

Youq henz dah maeuq le yaep he, de roxnyinh gig mbwq, youh cienq ndang hwnj haenzdah, daeuj daengz bakdou aen ranzcien dahsau haenx, baedauq byaij le geij baez, vanzlij mbouj ndaej yawjraen gij ngaeuz de, youh mbouj ndei gwq ndwn youq rog dou, engq mbouj gamj seizbienh damq haeuj ndaw dou. Duz ma hung cimyawj de, cijaeu de caiq byaij yamq ndeu, aiq couh yaek yat coemj de.

Miz boux lwgsai he daj ndawranz buet okdaeuj, nyaeuq bwnda cimyawj de.

De miz di simhaw, vuengmuengz byaij deuz, boux lwgsai haenx ndwn youq bakroen, itcig yawj de byaij, de byaij ndaej gig gyae le lij ndwn youq gizhaenx gamyawj.

(caengz sat)