Guhlawz mbouj mbin daengz gyangmbwn sangsang bae ne? Ronghrib gwnzgwnz lajlaj cungj mbinfengfeng.

Mbin bae gyangmbwn sangsang de bae ne, mwngz couh baenz aenndaundeiq ronghmyabmyab lo.

Vihmaz cungj gyaez mbin daemqdetdet ne?

Youq henz naz, daemqdetdet mbin bae mbin dauq, rongh- myabmyab. Rongh garoen hawj bouxguhnaz gyanghaemh bae doengh- naz yawj raemx naz, dwg lwi?

Youq diegdangz gyoengqdou langhliengz de, daemqdetdet mbin bae mbin dauq, youq henz ndang gyoengqdou mbin bae mbin dauq, ronghmyabmyab. Yaek caeuq gyoengqdou guhdoih guhcaemz, hawj lwgnyez dou ngoenzngoenz gyanghaemh cungj angqvauvau, dwg lwi?

Youq byoznywj henz suen, daemqdetdet mbin bae mbin dauq, youq ndaw ndoengfaexndoek henz dah mbin bae mbin dauq, ronghmyabmyab. Gyaez youq ndaw byoznywj, ndaw ndoengfaexndoek caeuq duznon duznengz caemh fwen caemh angq, dwg lwi? Gyangmbwn sangsang de, mbouj miz duznon duznengz caemh fwen caemh angq, nyaenx cix mbwqmyatmyat bw.

Youq gwnz ndoibya, daemqdetdet mbin bae mbin dauq, youq ndaw doenghnaz mbin bae mbin dauq, ronghmyabmyab. Hawj gyanghaemh bya ndoi raeuz lai gyaeundei, dwg lwi? Hawj doenghgij ndaundeiq gwnzmbwn yawjraen, bya ndoi raeuz goj miz haujlai ndau- ndeiq ronghsagsag lumj gyoengqde nei, geq cungj geq mbouj liux.

Ronghrib rongh- myabmyab, dwg gij ndaundeiq rox mbin rox diuqfoux ndaw bya ndoi raeuz.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwg- fwngzmeh/卢奋长 hoiz）