Daihgya ndei! Gou heuh Vangz Veiyij, gou dwg boux maezsawq iq ndeu. Ngoenzneix gou caeuq daihgya faenyiengj haenx dwg gij goj maezsaw gou.

Daj mwh gou hainduj yiyi yaya hag gangj vah, daxmeh ngoenzngoenz cungj youq gou mwh ninz gaxgonq gangj gojgaeq hawj gou dingq: 《Mienhbau Dujfwj Saenzgeiz》、 《Mouiq Beigiz Lingzsingj》”、《Gofaex Simgyaez Mbouj Gouz Hoizbauq》…… Gij gojgaeq neix couh lumj gaiqfaex fapswd saenzgeiz, dazyinx gou haeuj ndaw seiqgyaiq saw bae, buenx gou haeujninz.

Hwnj youwzyenz le, daxmeh ngoenzngoenz ciep gou ma ranz, de bae ranzdajcawj cawj haeux, gou couh youq henz guhcaemz. Hoeng cij yaep ndeu, daxmeh couh mbouj dingqnyi sing guhcaemz gou lo. “Veiyij, Veiyij!” Daxmeh deng hwk dwk dauqcawq ra gou. Gou ne, gizsaed couh naengh youq gwnz sahfaz, roxnaeuz gwnz mbonq, youh roxnaeuz ing youq henz gvihsaw, dinghdingh yawj saw ne! Caih daxmeh baenzlawz heuh, gou couh lumj mbouj ndaejnyi nei. Moix baez daxmeh ra raen gou, cungj dwg youh hozndat youh ndeiriu. Dwg ha, gou hix mbouj miz banhfap, gou couhdwg boux maezsaw iq ndeu, gou couhdwg maij doegsaw. Cijaeu maez haeuj saw bae, cawzle byajraez, gij sing wnq gou cungj dingq mbouj nyi.

Mizmbangj doengzhag aiq yienghneix naeuz: “Raeuz lwgnyez youh mbouj rox geij cih saw, doeg ndaej geijlai saw ne? Mwngz cejdaihbauq ba?” Gou cij mbouj cejdaihbauq ne! Daihgya dingq gangj gvaq bonj sawveh ba, couhdwg saw veh okdaeuj haenx, daj iq daengz hung, gou doeg le song bak lai bonj sawveh. Mwh iq, dwg daxmeh gangj, gou dingq gou yawj; doeklaeng ha, dwg gou doeg, daxmeh dingq; seizneix ne, gou doeg it nienzgaep lo, gou ndaej angqyouz youq ndaw haijsaw lo, lauxsae lij hawj gou vih gyoengq doengzhag doeg doegsaw cangyisuh hagdangz fat haenx ne!

Gou ceiq gyaez dangz doegsaw ngoenz singgeiz ngeih, aenvih gou ndaej swyouz doeg saw engq mizyinx de. Gou cingqcaih doeg 《Dinhung Diuq Bahleiz》《Bijdwz· Banh》《Sanhgoz Yenjyi》《Lizsij Seiqgyaiq》…… Gou gig gyaez dahsau dinhung, aenvih de itcig daihdamj genhciz guh gij saeh de gyaez haenx；gou hozhaenz Bijdwz· Banh, aenvih de rox mbin, mbin ndaej gig sang……

Gou hix dwg dahniq gyaez guhcaemz gyaez liuh, mwh mbouj miz saw doeg, couh lumj boux lwgnyez manz nei dauqcawq liuh caeuq guhcaemz. Hoeng mboujlwnh liuh caeuq guhcaemz ndaej geij lai guengz, cijaeu miz saw, gou couh sikhaek bienqbaenz dahniq caemdingh ndeu, dinghdingh doeg saw. Saw, mboujdan hawj gou baenz boux hagseng maenhndei, engq hawj gou yawjraen seiqgyaiq gvangqlangh. Gak boux doengzhag, danghnaeuz sou miz saw ndei, gou nyienh caeuq sou vuenh daeuj doeg, hawj saw baenz baengzyoux ndei doxcaez dou ba.

Gou dwg maezsaw iq Vangz Veiyij, muengh daihgya gyaez gou, gyo’mbaiq daihgya!

(it nienzgaep Vangz Veiyij）