Diuq Gamvuengz dwg cungj foux caeqbaiq ndeu. Cien lai bi doxdaeuj, moix bi liggaeuq caet nyied ngeihbet couhdwg ngoenzseng Gamvuengz. Ngoenzhaenx, gij vunz Bouxcuengh ranghdieg Ginhsiu Yauzcuz Swciyen Dacieng Yangh cungj doxcomz youq baihnaj miuh Gamvuengz, youz goengsae bae cujciz caeqbaiq Gamvuengz, diuq foux Gamvuengz, angqhoh ngoenzseng Gamvuengz, mbaenjgouz ndaej siu cai cawz nanh, baujyouh gyoengqvunz bingzan.

Gamvuengz dauqdaej dwg byawz? Vihmaz gij vunz dangdieg baenzlai coengzbaiq de? Gij gojgaeq Gamvuengz youq ranghdieg Siengcouh、Ginhsiu cienz dwk bouxboux cungj rox. Vunzbiengz cungj heuh de guh “Goenggamvuengz”. Gamvuengz yenzlai singq Loz coh Ying, doeklaeng gaij singq Gam, guh daihciengq seiz youh heuh Gam Den. Bi 394, Loz Ying seng laeng Ginhsiu Dacieng Yangh Mbanjgojdoeng seizneix, dwg boux daihciengq daiq bing Ciuznamz, de sim ndei raixcaix, haengj dawz cienzngaenz bae faen hawj bouxhoj, youh baujhoh guekgya、maij mbanjranz de. De gvaqseiq le, aen ciuzdingz Ciuznamz gamjniemh gij goenglauz de, couh bued ngaenz youh baij vunz youq henz Dahgujceh Mbanjgujceh ingdep goengqbya guh le aen miuh hung ndeu. Aenvih vunzlai gizhaenx ndaej Gamvuengz coengh lai, vunzbiengz cungj gig gamjgik de, gij gojgaeq de hix yied cienz yied gyae. Miuhgamvuengz guh baenz le, gij vunz bae caeqbaiq bae siuyieng haenx gak giz cungj miz, daeuj dwk mbouj dingz mbouj duenh. Nanz le, Gamvuengz couh bienqbaenz vunz Bouxcuengh ranghdieg Ginhsiu、Siengcouh cungj coenggyauq saenqyiengj daegbied ndeu lo.

Youq ngoenz miuhhoih Gamvuengz liggaeuq caet nyied ngeihbet haenx, goengsae aennaj daep mauhngeg, fajfwngz dawz diuzfaex, youq seiqhenz byaij bae gvax dauq, yienh’ok gak cungj cingzgingj yiengh guhhong daeuj. Riengzlaeng goengsae aeu gij yienglab ma caeqbaiq cojgoeng, caiq dawz fagnaqgung hwnjdaeuj, gij vunz gizyawz hix dawz gaiq fabaizdangj he, caeuq goengsae cang ok gij cingzgingj Gamvuengz dingjhoenx vunzdig daeuj ciemq haenx. Gij yamqdin gyoengqde miz rengz dangqmaz, onjdwt maenhsaed, hix gig riengjret, hawj vunz ndawsim saenqdaenh. Gyoengqde doq diuq doq dawz duzyou Gamvuengz soengq haeuj Miuhgamvuengz.

Bi 2010, diuq Gamvuengz ndaej senj haeuj buek daihsam swcigih feihvuzciz vwnzva yizcanj mingzloeg.