Banringz song diemjcung, doek fwn iq, loh mbaeqsubsub. Dahngoz riengz Daegbauj byaij haeuj mbanj daeuj.

Baihnaj, aen ranzvax vaihvedved he youq ndaw fwnrumz yaek laemx mbouj laemx, hawj Dahngoz doeksaet yat.

Bohmeh Daegbauj hwet gaeuz ga goz ndwn youq bakdou riunyum- nyum angqcoux songde, gij riznyaeuq gwnz naj cungj mbehai lo.

Haeuj ranz, Daegbauj najmong naeuz Dahngoz:“Neix dwg ranz gou caeuq bohmeh gou.”

Daegbauj youh cam:“Siujlungz bae lawz guhcaemz, lij caengz raen haeuj ranz ne.” Ngamq dingz bak, laeq lwgsai caet bet bi baedauq he, ndang daenj uqnyueknyuek diuqyet cung gvaqdaeuj.

Laeq lwgsai neix baez raen Dahngoz couh nyengh lo, ndwn youq gizde mbouj guhsing.

“Siujlungz, vaiq heuh daxheiz.” Daegbauj naeuz.

“Hw!” Siujlungz gyaeuj hix mbouj ngeux couh ndonj haeuj ndaw rug bae lo. Dahngoz naj hoengzfefe ndwn youq gizde, de caen siengj sik- haek riuj daeh deuz. Daegbauj mbouj ndei eiqseiq naeuz:“Gou mbouj ndaej youq henz ndang son de, mwngz gaej gvaiq.” Dahngoz mbouj han, raemxda gaenq youq ndaw gvaengzda cienqlulu.

Dahngoz caeuq Daegbauj caez youq aen bouqngaiz he guhhong, Daegbauj dwg daeuzdajcawj, Dahngoz dwg boux cienmonz dawz byaek hwnj daiz.

Ngoenz ndeu, gyoengqde cingq guhhong nyaengqyetyet, miz dienhvah daeuj, naeuz daxboh Dahngoz oksaeh lo.

Daxboh Dahngoz bang Gouxngeih caep ranz, daj gwnz gyaq doek roengzdaeuj, diuz ndokhwet caeuq diuz gaswix raek lo. Gouxngeih guh ranz cienz yungh sat lo, mbouj miz cienz yawz bae yw bouxsieng. Dahngoz caeuq daegnuengx dauqcawq ciq cienz, hoeng lij ra mbouj gaeuq cienz bae yw daxboh. Dahngoz ngoenz- ngoenz daej, mbouj siengj guhhong, mbouj siengj gwn, ndang bienq byom, saeknaj hix bienq heu caez.

Daegbauj dawz 3 fanh maenz hawj Dahngoz, naeuz:“Gou cij miz di cienz neix, mwngz dawz bae yw doxboh gonq.”

Langh youq doenghbaez, Dah- ngoz mbouj gamj aeu, seizneix feiz doek daengz gwnz din, de mbouj aeu mbouj ndaej, mbouj aeu caen mbouj rox bae gyawz ra ciq lo.

Daegbauj vunzndei simsoh, Dah- ngoz mbouj rox mbouj nyinh couh doiq de miz cingzeiq. Daegbauj hix roxnyinh Dahngoz baenzsau youh gaenx hong, ndawsim de hix miz Dahngoz lo, songde couh doxndei lo.

Miz duenh seizgan he, Daegbauj baez raen Dahngoz couh ngaemgyaeuj ndojdeuz, hix mbouj nyienh caeuq de gangj vah. Dahngoz ngeix mbouj doeng, gyaep dawz Daegbauj cam.

Daegbauj naeuz:“Ngoz, gou mbouj siengj muenz mwngz, bohmeh gou geq lo, yah gou caeux couh gvaqseiq lo, miz boux daeglwg ndeu. Caiqlix, dou lij youq ranz vaih, caengz ndaej guh ranzlaeuz moq.” Daegbauj yied gangj sing yied iq, doeklaeng lienz swhgeij cungj yaek dingq mbouj nyi.

“Gou mbouj naemj lai, gou cij naemj caeuq mwngz gvaq ciuhneix.” Dahngoz riunyumj muengh coh Daeg- bauj. Daegbauj dingq le, angq ndaej got ndaet Dahngoz.

Baezneix Daegbauj couh yaek daiq Dahngoz maranz. Bak gangj ndaej soeng, caen riengz bae Dahngoz lij dwg miz di mbouj onj. Haemhde, de fan bae foek dauq ninz mbouj ndaek, gag hwnqdaeuj naengh ndaw ding, de naemj: Daegbauj ranz vaih youh gungz, bohmeh geq couh suenq lo, lij miz daeglwg he dem, caen mbouj rox baenzlawz gvaq……

Daegbauj lumjbaenz rox aen sim Dahngoz nei, naeuz:“Ngoz, raeuz seiz- neix caengz lingx cwng, mwngz ienq- hoij lij ndaej gib.” Dahngoz youq ndaw laep mbouj dap vah, caenh danq gaemz heiq raez he.

Ranz ngamq rongh, Daegbauj bae cawj ngaizromh, Dahngoz naeuz:“Dwg mbouj dwg gwn can ngaiz neix le, couh gyaep gou deuz.” Daegbauj doeksaet muengh Dahngoz. 4 da doxmuengh, song boux cungj riu lo.

Mbouj geij nanz, Daegbauj caeuq Dahngoz doxyaeng bae dajgoeng, Dahngoz yawjyawj aen ranz mbouj baenz yiengh, naeuz:“Bohmeh geq lo, Siujlungz hix aeu goq, mwngz bae gonq, gvaqlaeng gou caiq riengz bae.”

Daegbauj ngamq bae, aen sim Dahngoz couh fouzfwdfwd lo. Song bouxlaux doiq Dahngoz ndei, bungz vunz couh haenh Dahngoz dwg bawx ndei he. Siujlungz gag guh faenh swhgeij, mbouj swt Dahngoz, Dahngoz roxnyinh gyaeuj in lai.

Siujlungz youq aen siujyoz gwnz haw doeg ngeih nienzgaep, youq hagdangz gwn ninz, singhgizhaj laj- byonghngoenz cij maranz. Dahngoz naemj: Aeu sim dag sim, gou mbouj saenq cungj dwg yienghneix.

Dahngoz dawz aen ranz ndaw rog baet ndaej cinghseuq, doenghyiengh baij ndaej cingjcaez, dawz buhvaq daengx ranz vunz saeg ndaej seuq- saksak, ndangdaenj Siujlungz hix mbouj lumj gaxgonq yienghde uq lo.

Siujlungz yaek maranz, Dahngoz couh nyaengq dajcawj hawj de gwn, naihsim son de guh cozyez, roxnaeuz caeuq de bae youzbyaij saek yaep. Muengh faj naj iq Siujlungz daj heu bienq ndaej hoengzfe, ndawsim Dahngoz diemzsisi.

Ngoenz he singhgizhaj laj- byonghngoenz, bingzseiz duenh seiz- gan neix, Siujlungz caeux couh maranz lo, seizneix lij caengz raen ngaeuz. Dahngoz simgip raixcaix, doq daj dienhvah cam lauxsae. Lauxsae naeuz Siujlungz gaenq hwnj yauceh ma lo. Dahngoz vueng ndaej hanh lae rim ndang, cam daxgoeng daxbuz bingz- seiz Siujlungz gyaez bae gyawz guhcaemz, roxnaeuz bae ranz caencik beixnuengx lawz lo? Daxbuz naemj yaep he fwt geiq hwnjdaeuj:“Roxnaeuz Siujlungz bae ranz daxdaiq de lo.” Geij boux couh ganj bae gizde lo.

Ranzdaiq Siujlungz mbouj gyae, naengh cidienh 10 lai faencung couh daengz. Dahngoz gyoengqde ganj daengz gizde, raen Siujlungz youq ndaw gyanghongh caeuq song daeg- nuengxbiuj guhcaemz. Daxdaiq Siuj- lungz baez raen Dahngoz couh najhaen lo, fok naeuz:“Mwngz dwg dah Daegbauj ngamq daiq maranz ba, vah naeuz 10 boux mehlaeng 9 boux doeg, lij caengz caeuq de doxaeu ne, couh doiq Siujlungz baenzneix yak!”

“Daxdaiq Siujlungz, mwngz dingq gou gangj gonq, mbouj dwg yienghneix law!” Dahngoz gej naeuz.

“Mbouj siengj dingq mwngz meh iucing neix gangj baenz lai lo, mwngz gangj mwngz ndei, Siujlungz lij ma gizneix guh maz!” Daxdaiq Siujlungz youh laebdaeb fok Dahngoz.

Baez Daih’it bungz daengz gij saeh neix, Dahngoz ndwn anj youq gizde mbouj rox baenzlawz guh. Daxbuz ganjvaiq ragdawz Siujlungz caeuq Dahngoz, buetdeuz lo.

Gyanghaemh haeuj ninz, Dah- ngoz baenzlawz cungj ninz mbouj ndaek, raemxda mbouj roxnyinh lae roengz najgemj daeuj. Dang mehlaeng vunz hoj guh lai lo, Dahngoz caen siengj coenz vah he hix mbouj ce, buhvaq hix mbouj gienj, laeglemx deuz bae. Hoeng de naemj daengz Daegbauj doiq swhgeij baenzneix ndei, lauheiq lajmbwn caiq ra mbouj raen bouxsai yienghneix lo. Siengj daengz neix, Dahngoz uet bae raemxda, netsim ninz lo.

Daj mbatneix le, Siujlungz lumj- baenz dingqvah le haujlai, Dahngoz gag caegcaeg angq.

Ngoenz ndeu, Daegbauj daj ndaw singz maranz, de lwnh Dahngoz nyi, seizneix rom ndaej ngaenz yaek gaeuq guh ranz lo, danghnaeuz mbouj gaeuq hix mbouj you, seizneix guekgya cwngcwz ndei, cek ranz naeuh guh ranzlaeuz moq goj miz ngaenz bouj- diep. Caj guh ranz ndaej le, caiq bae daenggeiq hix mbouj nguh. Dahngoz dingq le, sim’angq ndaej lumj va hai nei.

Cuengq sujgyaj miz ngoenz ndeu, Dahngoz baenzngoenz cungj mbouj raen ngaeuz Siujlungz. Dahngoz youh dingj naj na bae ranzdaiq Siujlungz ra, hix mbouj raen. Mbouj yungh gangj, Dahngoz youh deng daxdaiq Siujlungz ndaq can haenq ndeu. Ra lwg youq- gaenj, Dahngoz nyaenx raemxda, singgip singgaenj heuh coh Siujlungz yiengj doh ndaw mbanj.

Ra mbouj raen Siujlungz, Daeg- bauj youh mbouj youq ranz, Dahngoz simgip lumj feiz coemh ndang. Dahngoz naengh cidienh bonghfafa ganj daengz gwnz haw bae ra, raen bouxsai caeuq mehmbwk cungnienz he cingq yaek daiq Siujlungz caeuq dahniq he hwnj aen ciiq he bae.

Dahngoz cung gvaqbae couh hat: “Sou dwg byawz, yaek daiq lwg gou bae gyawz?!” Dahngoz baez hat, songde hwk ndaej muengz ndonj haeuj ndaw ci bae, “fw” sing he, aen ciiq buet bongh bae naj mbouj raen lo.

Dahngoz ganjvaiq mbon soujgih bauqgingj. Mbouj yaep ndeu, bouxsai caeuq mehmbwk haenx couh deng gingjcaz humx dwk gaemhdawz lo.

Songde dwg canghbuenq lwg- nyez, cienmonz gai lwgnyez aeu ngaenz, raen Siujlungz caeuq dahniq haenx dandog youq gwnz haw guhcaemz, couh yaeuh gyoengqde bae diegwnq guhcaemz.

Siujlungz caeuq dahniq haenx caengz ndaej bae gizwnq guhcaemz gvaq, baez dingq couh angqvauvau yaek riengz bae. Caeklaiq Dahngoz ganj daengz, mboujnex couh hwnj- dangq lo.

Gaemhdawz songde le, gingjcaz swnh gaeu lumh gva, gouq ndaej haujlai lwgnyez gaxgonq deng gai, gyoengq bohmeh raemxda laeboegboeg angqcoux lwgnyez swhgeij maranz, hix gig gyo’mbaiq gingjcaz caeuq Dahngoz.

Doeklaeng Siujlungz engq dingq gij vah Dahngoz lo, hix roxnyinh aiq mbouj dwg sojmiz mehlaeng cungj simyak!