“Ha! Ha! Gangjriu ndwi, gangjriu ndwi.” Vuzcungj naeuz.

Songde cici haha gangjboq yaep he le, Vuz- cungj swqmwh nyinhcaen cam naeuz:“Beixnuengx, ga roen yaek hai guh haenx, aen duenh ndaw singz raeuz…… Mwngz naeuz……”

Yangz gizcangj yenzsuz naeuz:“Beixnuengx ha, duenh roen haenx, raeuz yaek guh, hix aeu lauxlaux saedsaed ciuq gij gvidingh caeuq iugouz bae douzbyauh, aeu goengbingz ceng’aeu, mbouj ndaej guh rwix guh yak, rox lwi?”

“Deng, gizcangj mwngz gangj ndaej deng, douzbyauh aeu goengbingz ceng’aeu. Mboujgvaq, raeuz dwg beixnuengx, aeu doxbang doxrex ne, Yangz gizcangj, mwngz naeuz dwg mbouj dwg yienghneix?” Vuzcungj riuhehe naeuz.

“Beixnuengx ha! Gou lij dwg coenz vah haenx, goengbingz ceng’aeu. Caiq gangj, couhsuenq raeuz dwg beixnuengx, gienh saeh neix mwngz ra gou, gou hix bang mbouj ndaej mwngz ha!” Yangz gizcangj gig haengjdingh naeuz.

“Ndei! Goengbingz ceng’aeu! Gou rox hane!” Vuzcungj gangj daengz neix, loh bongx gwnz mbaq Yangz gizcangj song mbat, youh naeuz, “Gizcangj, ngoenzneix caeuq mwngz gangjgoj baenzlai nanz lo, baenzneix gou couh mbouj caujfanz mwngz lo, mwngz youq gizneix menhmenh yiengjsouh, gou dauqbae gonq lo. Ha, ha……” Gangj le, Vuzcungj couh sim’angq deuz lo.

Banringz 3 diemj lai cung, ranzbingh dauqdaej ndaej caem yaep he lo. Seizneix yah Lauxliuz cingq bwnq Lauxliuz gwn souh. Canghyw naeuz geij ngoenz neix Lauxliuz caengz ndaej gwn haenxam, cij ndaej gwn souh, lij aeu gwn noix lai donq dem, mbouj ndaej baez he couh gwn boengj, lau ndangdaej Lauxliuz dingj mbouj ndaej.

Swnh Lauxliuz gvanbaz bwnq souh gwn souh, mbouj ndaejhoengq yawj coh baihneix, mehyah Yangz gizcangj laeglemx ndeuqdekdek hai aen daeh Vuzcungj dawz daeuj haenx daeuj yawj……

Lauxliuz gwn vanj souh caengz sat, youh miz vunz daeuj roq dou lo.

Mehyah Yangz gizcangj gipmuengz dawz doxgaiq gyang fwngz yo haeuj ndaw gvihdoengj bae, guh sat doq hwnj ndang bae hai dou.

Baezneix dwg dahsau lengj ndeu byaij haeujdaeuj. Dah neix byaij roen caeuq bouxwnq gig mbouj doxdoengz, gyaez niuj hwet niuj caekhaex, mboujgvaq de niuj ndaej cingqngamj daengz giz, yawj hwnjdaeuj gig ciu vunz. Gyang fwngz de gaem bog vameizgveiq hung ndeu, cigsoh byaij daengz henz ndang Yangz gizcangj, ndenq bogva haeuj ndaw rungj Yangz gizcangj bae, doq ndenq doq sing unqdedded cam naeuz:“Yangz gizcangj, mwngz ndei di caengz?”

“Caengz ne. Song ngoenz neix gou roxnyinh dungxraeng dangqmaz. O! Dwen daengz neix, gou cij ngeix hwnj. Mehyah ha, mwngz okrog bae cawx di maksanhcah dauqdaeuj hawj gou gwn, sawqsawq ndaej mbouj ndaej hawj dungx gou siu di.” Yangz gizcangj doiq mehyah de naeuz.

Mehyah de miz di mbouj cingznyienh bae, hoeng, bouxgvan baenzneix gangj, de mbouj ndaej mbouj bae.

Mehyah de baez okdou, dahsau neix couh naengh youq gwnz congz henz ndang Yangz gizcangj. Songde gangj vah da doxliuq swdswd…… Ngamq naengh yaep he, Yangz gizcangj couh heuh de dauqbae lo.

Dah neix lwgfwngz vix dog coh goekrumz Yangz gizcangj, guh’unj naeuz: “Cij geijlai nanz, mwngz couh gyaep gou dauqbae? Baenzneix simyak! Uengj’feiq gou simndei daeuj yawj mwngz!”

“Haetromh daengz seizneix, gou caengz ndaej yietnaiq saek yaep, gou aeu yietnaiq yaek he lo. Gvai! Dingqgangj.” Yangz gizcangj yaepda coh dahsau, lij aeu gencueg ungj de hwnj ndang.

Dah neix mbouj ndaej mbouj dauqbae lo. De ngamq ok bakdou, mehyah Yangz gizcangj couh haeujdaeuj lo, najlaep najndaem dawz daeh maksanhcah gveng youq gwnz congz, mbouj oksing.

“Aeu gaiq maksanhcah daeuj gou hamz. Daengx ngoenz cungj ing naengh gyaeuj mbonq, hwet gou in caez lo, gou ninz yaep he.” Yangz gizcangj naeuz.

Mehyah de ciuq gij vah de guh, doeklaeng ing bien congz laepda ciengxsaenz.

Lauxliuz gwn souh gvaq le, ing gyaeuj mbonq hix laepda ciengxsaenz. Mehyah de couh gyaeuj bamq bien mbonq ninz.

Ranzbingh dauqdaej ndaej caem aiq aen cungdaeuz lo, daihgya cungj ndaej yietnaiq yaep he.

“Dog dog” song sing, youh miz vunz roq dou. Mehyah Yangz gizcangj bae hai dou.

Ndaejnyi dwg song boux vunz byaij haeujdaeuj. Lauxliuz gvanbaz yawj cungj mbouj yawj, laihnaeuz mbouj dwg daeuj damqyawj songde.

Byawz rox, songde gawqyienz byaij daengz henz mbonq Lauxliuz, doengzseiz sing daemq hemq:“Liuz dinghcangj.”

Lauxliuz dingq le, hai da daeuj yawj, doeksaet yat, doq naeuz:“Loz cujsiz! Nungz misuh! Sou baenzlawz rox gou youq aen ranzbingh neix ne?”

Loz cujsiz ndaw fwngz riuj sieng cijvaiz ndeu, Nungz misuh riuj lamz mak he. Songde dawz doxgaiq cuengq youq gwnz gvih henz congz Lauxliuz.

Mehyah Lauxliuz gipmuengz ra daengq hawj songde naengh.

“Dinghcangj, mwngz baenzlawz daeuj aen yihyen iqet neix ne? ” Loz cujsiz geizheih cam.

“Dieg neix ndei, dieg neix dinghrwd.” Lauxliuz riunyumj dap naeuz.

Loz cujsiz naeuz:“Dinghcangj, baenzlai ngoenz cij ndaej daeuj yawj mwngz, neix dwg gou guhhong guh mbouj daengz dieg, gou roxnyinh najmong raixcaix. Mwngz gaej geiq haeuj ndawsim bae nw!”

“Ndang gou bienq ndei lo, daeuj yawj gou guhmaz ne? Danhvei hong baenzboengj baenzdong, haeujsim guhhong couh baenz lo.” Lauxliuz naeuz.

Loz cujsiz naeuz:“Gou daibyauj gunghvei daeuj damqyawj mwngz, wnggai ne, neix hix dwg gij hong faenh gou. Bingzseiz mwngz mbouj dwg daengq gou gvaq, naeuz danhvei miz byawz baenzbingh, gunghvei itdingh aeu bae damqyawj、bae camnai, hawj ndawsim cizgungh roxnyinh raeujrubrub, danhvei lij dwg niemh gyoengqde ne!”

“Gou dwg baenzneix gangj gvaq, hoeng, di bingh gou mbouj suenq dwg bingh ndwi, mbouj yungh daeuj damqyawj!” Lauxliuz naeuz.

“Dinghcangj, baezneix mwngz cungj haeuj yihyen daeuj lo, gou wnggai daeuj damqyawj.” Loz cujsiz naeuz. Lauxliuz dingq le itseiz mbouj rox baenzlawz dap vah cij ndei.

Loz cujsiz caeuq Nungz misuh veibau gij hong ndaw danhvei caenhneix coh Lauxliuz. Sam boux de doxlwnh gij saeh danhvei, lwnh ndaej mizyinx dangqmaz. Gyoengqde gangj ndaej aiq miz 40 faencung yienghneix, Lauxliuz couh gyaep songde dauqbae lo, lij naeuz:“Roen gyae, dauqbae caeuxdi. Gwnz roen aeu menhmenh hai ci, haeujsim ancienz nw. Gaej niemh gou. Aen bak aeu maenh, mbouj cinj hawj bouxwnq rox gou youq neix bw!”

“Dinghcangj, mwngz cuengqsim lo, gou seiz- lawz mbouj dingqgangj gvaq? Muengh mwngz vaiqdi ndangcangq! Vaiqdi dauq danhvei cijdauj dou guhhong.” Loz cujsiz naeuz.

Lauxliuz caeuq songde gaemfwngz……

Yangz gizcangj yienznaeuz laepda ninz gwnz mbonq, hoeng, Lauxliuz gyoengqde gangj vah, de coenzcoenz dawz haeuj rwz.

Loz cujsiz、Nungz misuh okbae le, Yangz gizcangj lumj siengj daengz maz nei, sikhaek hwnqdaeuj naengh dwk, siujsim riri cam:“Liuz dinghcangj! Mwngz couhdwg boux dinghcangj moq gyauhdunghdingh, Liuz Bingjyungz dinghcangj ha?”

Lauxliuz ngaekngaek gyaeuj.

“Gvaiq mbouj ndaej miz di sugnaj. Gou siengj ndaej daengz lo, gou youq ndaw densi raen mwngz gvaq.” Seizneix Yangz gizcangj najgaej najmong dangqmaz, mbouj rox mbouj nyinh lij dungx mbaeu sim saenz dem. Hwnzde, de daengx hwnz ninz mbouj onj, cungj guh loqyak.

Ngoenz daihngeih, Yangz gizcangj daezgonq okyen lo. Gvaq le 3 ndwen, Yangz gizcangj deng roengzmbaek, doeklaeng lij deng gyaeng dem……

（sat）