10 hauh ranzbingh miz song boux vunzbingh. Songde cungj dwg guh gvaq soujsuz lanzveijyenz. Boux ndeu ndaej 40 lai bi, lingh boux ndaej 60 bi baedauq.

Gyoengqvunz daeuj damqyawj boux ndaej 40 lai bi haenx gig lai, boux bae boux youh daeuj, haeujhaeuj okok, ningcumcum. Mehyah de boenq ciudaih gyoengq vunz daeuj damqyawj, boenq ndaej baenqlulu. Hoeng, mbouj raen de miz saekdi mbouj naihfanz, gwnz naj dauqfanj cungj dwg lumj dujva nei haiangj. Daj gij vah gangjgoj gyoengqde couh rox, bouxbingh neix singq Yangz, dwg boux gizcangj gunghlugiz ndaw singz.

Lingh bouxbingh ndaej 60 bi baedauq haenx, cawz le daeglwg caeuq lwgbawx de daeuj yawj gvaq baez ndeu le, mbouj raen lij miz byawz daeuj yawj de gvaq lo, cij miz yah de youq henz ndang buenx de. Songde gangj vah sing daemq, hengzdoengh hix mbaeumbengq, noix gauxca daengz bouxwnq.

Mehyah Yangz gizcangj ngamq soengq boux daeuj damqyawj he daengz bakdou, youh miz bouxsai cungnienz ndeu byaij haeuj ranzbingh daeuj. Boux neix vunz haemq daemq haemq bi, aiq dwg dak ndit lai ba, naj miz di fonx, dungx luenzlulu, lumj mehmbwk mizndang ndaej caet bet ndwen nei. Fwngzgvaz de riuj lamz mak ndeu, baez haeujdaeuj couh cigsoh byaij daengz henz mbonq Yangz gizcangj, sing unq doxndiep cam naeuz:“Gizcangj, mwngz ndei di caengz?”

“Aiya! Vangz lauxbanj, mwngz baenzneix nyaengq, lij daeuj yawj gou ha? Sinhoj mwngz lo.” Yangz gizcangj cang ndaej gig doeksaet.

“Mbouj nyaengq mbouj nyaengq. Mwngz youq neix, gou wnggai daeuj yawjyawj.” Vangz lauxbanj gangj sat, yienh lamzmak hawj mehyah Yangz gizcangj. Mehyah Yangz gizcangj doq ciep aeu doq riunyumj naeuz:“Ya! Daeuj couh daeuj lo, lij dawz huq daeuj, baenzlai aeusoq!”

“Vangz lauxbanj, mboengqneix gou mbouj ndaej bae dieghong dawz, mwngz aeu dawz hong haeujsim di, aeu baujcwng cizlieng bw, gaej guh gij hong yaez hong nyap okdaeuj. Mboujnex, gou itdingh mbouj hawj naj hawj mwngz bw!” Yangz gizcangj daegdaengq sing daemq gangj vah haenq gingjgauq Vangz lauxbanj.

“Gizcangj, mwngz cuengqsim youq gizneix ciengx ndang ba. Danghnaeuz bouxboux lumj mwngz yienghneix nei……” Vangz lauxbanj yawj boux- bingh bangxhenz da ndeu, dingz bak yaep he, youh naeuz, “ngoenzneix dienheiq haemq ndei……” De doeng gangjboq sae gangjboq yaep he le, roxnyinh mbouj miz vah gangj lo, couh yaek dauqbae lo. Hwnq ndang seiz, de aeu ronghda naeuz hawj mehyah Yangz gizcangj, haeujsim aen lamz mak de soengq.

Mehyah Yangz gizcangj mbouj miz maz fanjying, gyajcang mbouj rox gij eiqsei Vangz lauxbanj. Vangz lauxbanj baez okdou, mehyah Yangz gizcangj couh dawz aen lamz mak Vangz lauxbanj soengq haenx daeuj yawj. Cij raen de bak riu ndaeng riu, mbouj guhsing. Yaepyet couh riuhihi naeuz:“Cawx baenzlai mak daeuj!” Gangj sat, dawz song aen makbingzgoj hung yienh hawj mehyah bouxbingh bangxhenz, naeuz:“Dahcej, cimz gij mak yawj van mbouj van.”

Mehyah bouxbingh bangxhenz bi fwngz ledled doq naeuz:“Mbouj aeu lo, cungj gwn mak sou, dou mbouj maz huq ndei hawj dauq, najmong lai lo.”

“Gaej aeusoq lai ndwi.” Mehyah Yangz gizcangj naeuz.

“Deng, mbouj yungh aeusoq lai ndwi, raeuz dwg binghyoux, miz yienz cij ndaej doxraen doxyouq ne.” Yangz gizcangj ciep vah mehyah de naeuz. Gangj sat, de haeujsim bae yawj binghyoux da ndeu, cij raen fouqda binghyoux yaek laep mbouj laep, de ing gyaeuj mbonq ciengxsaenz. Yangz gizcangj ndawsim gag ngeix: Baenzlai ngoenz daeuj, gou cungj mbouj ndaejhoengq haeujsim yawj boux binghyoux neix saek da, seizneix nyinhcaen baez yawj, yienghnaj de haemq sug, lumjbaenz youq gyawz raen gvaq nei. Hoeng, siengj mbouj ok dwg youq gyawz raen gvaq.

Baenzneix, Yangz gizcangj siujsim riri cam:“Daeggo, mwngz singq maz ne?”

Binghyoux hai da, cienq naj coh Yangz gizcangj han naeuz:“Gou singq Liuz.”

“Youq aen danhvei lawz guhhong ne? Dingq vah gangj sou lumj mbouj dwg vunz bonjdieg ni.” Yangz gizcangj cam.

Lauxliuz riunyumj, de bonjlaiz yaek hoizcoenz Yangz gizcangj, hoeng, seizneix youh miz bouxsai aiq ndaej 30 lai bi he byaij haeuj ranzbingh daeuj. Lauxliuz baez raen couh mbouj gangj vah lo.

Boux daeuj haenx, gyang fwngz riuj daeh doxgaiq he, mbouj rox ndaw daeh cang miz gij huq maz. Baez haeuj dou daeuj couh bak raeuzredred dongx mehyah Yangz gizcangj, heuh de guh mehsauj, caemhcaiq yienh doxgaiq gyang fwngz hawj mehyah Yangz gizcangj.

Mehyah Yangz gizcangj ciep aeu doxgaiq, naeuz:“Daeuj couh daeuj le, lij dawz doxgaiq daeuj dem, baenzlai aeusoq bae, cungj dwg beixnuengx, lij baenzneix aeusoq. Baezmoq mbouj ndaej yienghneix nw!”

“Mbouj miz maz huq bengz.” Boux daeuj haenx naeuz, “gizcangj mwngz ndei di caengz?”

“Gou ndei lai lo. Siujmaj, mwngz baenzneix nyaengq lij daeuj yawj gou, mazfanz mwngz lo.” Yangz gizcangj naeuz.

“Wnggai ne, wnggai ne.” Siujmaj doq gungj hwet doq riu naeuz.

Mehyah Yangz gizcangj aeu daengq hawj Siujmaj naengh youq henz mbonq. Siujmaj goenggoeng gingqgingq caeuq Yangz gizcangj gangjgoj, yaep he, de gazgwdgwd cam naeuz:“Gizcangj, duenh roen hung yaek coih ndaw singz haenx……”

“Dawz fangh’an daeuj gou yawjyawj. Gou vah gangj youq baihnaj gonq, fangh’an byawz ndei, couh hawj byawz bae coih.” Yangz gizcangj naeuz.

“Ndaej! Ndaej! Mboujgvaq lij aeu gizcangj mwngz lai goq gou di……” Siujmaj lawq yaep he, naengbak ningning, yaek gangj mbouj gangj, doeklaeng cij naeuz:“Gizcangj mwngz caemsim ciengx ndang nw, gou dauqbae gonq lo.” Gangj sat goenggoeng gingqgingq caeuq Yangz gizcangj gaem fwngz.

Siujmaj cienq ndang dauq coh mehyah Yangz gizcangj naeuz:“Mehsauj, mwngz youq neix ganq Yangz gizcangj sinhoj lai lo, di doxgaiq neix hawj mwngz boujbouj ndang, uk gou ngamz di, seizneix hix mbouj rox cawx maz huq wnq ndei hawj mwngz lo.” De doq gangj doq aeu fwngz bae bongx aen daeh cang doxgaiq 3 mbat.

“Aiya! Mwngz aeusoq lai lo.” Mehyah Yangz gizcangj soengq Siujmaj daengz bakdou, dauqdaeuj le sikhaek dawz aen daeh cang gij doxgaiq bouj ndang daeuj yawj, baihlaeng cienq coh Lauxliuz song gvanbaz.

“Gwnz fan laj boek guh maz ne? Dauqranz caiq yawj mbouj ndaej la? Lau huq bouxwnq soengq mbouj dwg huq ndei ha?” Yangz gizcangj sing daemq naeuz yah de.

“Gou seibienh yawjyawj dwg maz doxgaiq bouj ndang ndwi.” Mehyah Yangz gizcangj naeuz, gangj sat de couh dawz daeh doxgaiq bouj ndang yo haeuj ndaw gvih bae, naj de haiangj lumj daengngoenz nei.

Ranzbingh ngamq caem mbouj geij nanz, youh miz bouxsai aiq ndaej 60 bi he haeujdaeuj. Boux vunz neix ndang sang ga maengh, naj hoengzfefe, najbyak ndongqlili, dingj gyaeuj mbouj miz saek diuz byoem, ndongqngaeuz ndaej yaek ciuq raen ngaeuz vunz bae. De riuj aen daeh suliu fonx ndeu, ndaw daeh cang aen hab seiqfueng he, lumj hab bingjronghndwen nei, yawj mbouj ok ndaw daeh cang maz doxgaiq.

Boux neix baez yamq haeuj dou daeuj couh riuhoho naeuz:“Yangz gizcangj, mwngz caen rox yiengjsouh, ndoj daeuj gizneix daeuj ciengx ndang, mbouj aeu yousim gij hong, cwxcaih lai lo!”

Yangz gizcangj naeuz:“Vuzcungj, mwngz hozhaenz gou mwngz hix daeuj vei, raeuz song beixnuengx guhdoih yiengjsouh.”

（caengz sat）