Daegnamz naengh youq gwnz ci- hek, yaep he muengh ok rog cueng, yaep he ngeng coh henz ndang ngonz Mehyah, raen de gaenq baiqninz gyaenfifi, ndawsim roxnyinh miz di doiq mbouj hwnj mehyah.

Aenmbanj yied ma yied gyawj. Rog cueng, gizgyawj, doenghnaz gvangqmiengmieng, haeuxcou gaenq sou caez, ndaw naz lij lw goenqnyangj caeuq nywjheu doxcab doxlienz. Gizgyae, ndoidaemq aen dem aen doxrangh raezrangrang. Gwnz ndoi reihgoij lumj ndoengfaex nei daengj- byoengbyoeng. Deih mbouj deih, suen makgam venj rim lwgmak duiq- doemdoem, coemjnaj gvaqdaeuj. Daegnamz ndawsim doq nyoenx hwnj raq raeujrub he. De gag nyaenx mbouj ndaej riu loh gwnz naj. De lumj yawjraen, gij makgam de caen fwngz ndaem haenx, cingq coh de ajbak riuhaha. De baezneix daj baihrog ma ranzmbanj, couhdwg dajsuenq ndaem makgam. Deng, de yaek maranz cauhnieb.

Daegnamz daj 20 bi couh bae Guengjdoeng dajgoeng, mehyah de Dahfangh hix dwg youq Guengjdoeng doxrox doxndei, doeklaeng doxaeu, 30 bi seng lwg. Daeglwg daj gekcij le couh cuengq youq lajmbanj hawj bohmeh bang daiq, seizneix gaenq ndaej 3 bi. Gvanbaz caemh youq aen gunghcangj ndeu guhhong, gij cienz- goeng song boux gya hwnjdaeuj, cawz bae gyau cienz ranzco, cawx haeux- donq, gizyawz cungj geiq hawj ndawranz, ciengx lwg ciengx bohmeh. Yienghneix guh roengzbae, ngoenz- lawz ndaej raen gij hamq de? Daegnamz naemj bae naemj dauq, couh naemj daengz maranz dajciengx dajndaem diuz roen neix, swnhbienh hix ndaej youq ranz ciengx lwg hauqgingq bohmeh. De dem mehyah doxyaeng, mehyah hix ndiep lwg lai, yaemhywx yaep he hix doengzeiq lo.

Ci daengz bakmbanj, Daegnamz gvanbaz ngamq roengz ci, couh dingqnyi miz vunz heuh de. De nyeux gyaeuj bae yawj, caenh raen youq laj goreiz hung, comz miz gyoengq vunz he. “Daegnamz, ma gvaqcieng ha?” Meh vunz loq biz he ndwn hwnjdaeuj, vah byotbyangbyang dongx de. Daegnamz byaengqda ngeizvaegvaeg muengh de. “Gou dwg Simjseiq, mwngz okbae nanz lo, mbouj gvaiq mwngz mbouj ndaejgeiq lo.” Simjseiq najriu saekrongh. Daegnamz aeu fwngz baez bongx najbyak:“O, Simjseiq, dwg mwngz ha. Ngoenzneix ndaejhoengq bw.” “Yaek gvaqcieng lo, miz maz hong guh dem, lij deq raemj oij ndwi lo.” “Gou dwg Ausam, rox lwi?” Daegnamz swnh sing ngonz bae, raen goenglaux he bak gamz yenhcaij, fwngz gaem fouqbej, riuyaeng’yaeng ndomq de. Simjseiq ciepvah naeuz:“Mwngz dwg goengged, byawz mbouj rox.” Ausam dingjbak naeuz:“Gou couh ged lo. Gou louz rimmwdmwd, nyengh mbouj hawj mwngz, caih mwngz humznyapnyap bae.” “Ri, byawz ngah gij mwngz, gag louz oemq bwnh ba.” Gyoengqvunz simhai riuhaha. Ausam mbouj swt Simjseiq, cienq vah youh cam:“Mbatneix gvaq- cieng le, geijlai ngoenz dauqbae.” Daegnamz han naeuz:“Ausam, baez- neix mbouj bae lo.” “Yu, guhmbwq la, roxnaeuz deng cawzmingz la.” “Mbouj mbwq hix mbouj deng cawzmingz, baezneix ha, gou maranz ndaem makgam.” Daegnamz sangjswtswt han naeuz. Ausam baez saekndaek, caengzraurau Daegnamz:“Mwngz, ndaem makgam? Naengbyau noh’oiq, mwngz rox gwn makgam couh mbouj loek lo.” Daegnamz fit miz di remjnaj. Simjseiq ganjvaiq naeuz:“Yu, goeng- ged neix, mwngz couh ak lai, gaej yawjcuij boux hauxseng. De youq baihrog raen lai raen gvangq, beij mwngz rox guh.” Naeuz sat, cienqnaj doiq Daegnamz naeuz:“Mwngz maranz yawj lwg gonq, gaej leix de.” Daegnamz doq byaij doq coh vunzlai vadfwngz:“Daihgya menh youq guh- caemz nw.” Ausam daegdaengq sing goksadsad:“Raeuz deq gwn gij mak- gam mwngz bw.”

“Meh, boh, heuh ha, vaiq heuh.” Caih daxlaux baenzlawz son, daeg lwgnyaeq caenh cim gvanbaz Daeg- namz. Daegnamz iet fwngz siengj umj de, de dauq linq dwk baenqhangz doq deuz. Dahfangh buet bae song yamq, vaxdawz daeglwg, gotumj ndaet- fwdfwd, raemxda hix loenqbyoegbyoeg:“Niq ha, gou dwg daxmeh, mwngz lumz la.” Daegnamz vaiqdi ndenq aen vanzgi he haeuj fwngz lwg bae. Lwgnyaeq fwngz ciep vanzgi, naj cij riuhihi. “Baenz bi mbouj raen sou lo, baenzlawz mbouj lumz.” Daxlaux gvaiq naeuz.

“Gvaqcieng le, ngoenz lawz dauqbae?” Daengx ranz vunz dox- humx daizluenz gwn caeuz, daxboh ndoet gaemz laeuj sat, cam vah Daeg- namz. Daegnamz yawjyawj daxmeh, ngonzngonz daxboh, gwx yaep he, naeuz:“Gvaqcieng le camhseiz mbouj bae lo.” “Vihmaz?” Daxboh ngeiz- vaegvaeg cim de. “Song dou siengj maranz gag cauhnieb.” “Maz? Cauh- nieb, youq lajmbanj cauhnieb?” Daxboh rub ndumq gaemz laeuj, saekwk dwk naj hoengzgoedgoed. Daxmeh doq bongx hwet de doq naeuz:“Menh di ndumq, mwngz gip maz? Dingq daeglwg lwnh mwngz nyi.” Daegnamz nip gaiq soenjgaeq cuengq roengz vanj daxboh bae, naeuz:“Dwg yienghneix, dou youq baihrog daj- doeng, ndaej cienz cix mbouj lai, bi daengz haemh, lwg mbouj raen meh, meh mbouj raen lwg, hix mbouj ndaej ciuqgoq bouxlaux sou.” “Dou mbouj caengz geq daengz hawj sou ciuqgoq. Gyaez lwg lai, sou daiq lwg bae.” “Mbouj ndaej ha, boh, song boux hwnjban, byawz dawz lwg ha.” Dah- fangh bang Daegnamz naeuz. “Boh, meh, song dou naemj ndei lo, gvaqcieng le, youq ranzmbanj ndaem makgam.” Daxboh ndatheiq fodfod:“Ndaw mbanj geij hoh ndaem makgam haenx, miz hoh lawz ndaej fatcaiz, mbwnrengx yiemqsou, mbwn mbouj rengx lo, youh gai mbouj gat. Mwngz gaej guh fangzhwnzloq lo. Ranz raeuz daihdaih ndaem naz ndaem reih, guh dwk nohndaem nohndongj, raen saek gumz ngaenz ha.” “Raeuz guh caeuq gyoengqde mbouj doxdoengz, raeuz mbouj dwg ndaem geij moux, ndaem couh ndaem geijcib、geij bak moux, ndaem lai cij ndaej canhcienz.” “Geij bak moux, bae lawz aeu gij reihnaz?” “Laeng vunzmbanj co.” Daxboh veq- gyaeuj sigsig:“Miz byawz haengj co hawj mwngz?”

“Caen liuh mbouj daengz, baenz ngaih couh ciem ndaej cibgeij hoh lo.” Daegnamz angqvauvau byaij haeuj ranz, “Simjseiq ceiq ndei gangj lo, boux daih’it gag ra gou ciem coreih habdoengz.” Daxboh nyap- swdswd cam:“Ranz Ausam hix ciem la?” “Gwnringz caiq bae ra de. Ausam heih gangj, de baeznaengz raen naj gou cungj riuhehe.” “Mwngz gaej angq caeux lai, ra raen de menh gangj.” Daxboh ngauzgyaeuj riumbw.

Gwnringz sat, Daegnamz ganjvaiq bae ranz Ausam. “Caen doiq mbouj hwnj, gij reih gou mbouj ndaej co hawj mwngz lo.” Ausam naj mbwn- gyaugyau naeuz, “Gou senqdi couh dajsuenq ndaem sawzminz lo.” Daeg- namz naeuz:“Ausam, ndaem sawzminz mbouj gvaqsuenq law, mwngz co hawj gou, ndaej cienzco lij ndaej faen- hoengz bw.” “Faenhoengz yienz ndei, hoeng mbouj rox ngoenzlawz cij ndaej raennaj gij cienz de. Suenq lo, mwngz bae ra bouxwnq ba.” Daegnamz naeuz mbouj gvaq de, cij ndaej bae ranzwnq. Doeklaeng, Daegnamz cij ndaej song fwngz hoengqvatvat maranz. Daxboh cam:“Baenzlawz yiengh, daemdengj lo ba.” Daegnamz uetheiq naeuz:“Audaih, Aungeih, Auseiq, Aungux, ranz lawz cungj mbouj ciem, lienz aen gyog de cungj mbouj saek hoh ciem. Baenzlawz yienghneix?” Daxboh naeuz:“Mwngz bae cawx diuz ien ndeu ma, ngoenzcog gou caeuq mwngz bae ra Ausam.”

Ngoenzlaeng haetcaeux, Daeg- namz bohlwg byaij haeuj ranz Ausam, Daegnamz riuying’ying ndenq diuz ien hawj Ausam. Ausam da rongh naj hai, iet fwngz doq ciep doq riuyaeng- yaeng:“Aeya, guhhek baenzlai, daeuj ranz couh daeuj lo, soengq ien guhmaz.” Daxboh Daegnamz riu naeuz:“Seizneix ngamq ciq cienz ndaem mak, mbouj miz maz doenghyiengh ndei nyok mwngz, caj mak ndaem baenz le, caiq soengq di doenghyiengh ndei hawj mwngz.” “Gaej yienghneix naeuz, Bohnamz, ranz sou caen miz sim ndaem mak, gou couh co geij moux reih hawj sou. Hoeng……” Daegnamz cam:“Ausam, mwngz lij miz maz yousim dem, naeuz okdaeuj, gou yawj baenzlawz bang mwngz.” “Hix mbouj miz maz saeh hung, caenh dwg, cienzco ndaej mbouj ndaej hawj lai di.” Bohnamz sing’unq naeuz:“Ciuq naeuz, gya di cienz dwg hableix liux, mbouj gvaq, Ausam, lwgnyez seizneix cungj dwg ciqcaiq ma guh. Yienghneix ba, daengz mwh ndaej sou mak, gai ndaej cienz le, caiq gya di cienz, baenz mbouj?” “500 noix di lo, Mbanjleix bi’gvaq co hawj vunz, cungj ndaej cien maenz lo.” Bohnamz naeuz:“Gij reih mbanj raeuz baenz- lawz ndaej caeuq Mbanjleix doxbeij, mbanj vunz reih biz dieg bingz. Caiq naeuz, raeuz lij miz faenhoengz.” Ausam lij veq gyaeuj sigsig: “500 daemq lai, gya di dem.” Daegnamz naeuz:“Gya di couh gya di, 600, baenzlawz yiengh?” Ausam mbouj soeng bak:“Caeuq mbanj wnq ca mbouj geijlai cij baenz. Gou couh mbouj aj bakguk lo, 800. Sou guh couh ciemcih.” Daegnamz yawj daxboh baez he, raen daxboh hix mbouj ndwet, couh naeuz:“800 couh 800, Ausam, mwngz bang heuh gyoengq beixnuengx daeuj ciemcih nw.” Ausam riuhehe:“Ndei gangj, ndei gangj.”

Reih co ndaej lo. Baez gvaqcieng, Daegnamz din mbouj dingz yamq bae diegrog cawx ma gomaklwg. Mbwn mbouj deq vunz, yaek cagaenj haeuj- cin ndaem maklwg. Geq bae geq dauq, Daegnamz gvanbaz, bohmeh, caiq gya daegnuengx caeuq dahnuengx dem, daengx ranz 6 boux vunz baenzlawz ndaem 60 moux mak. Vat gumz, daeh bwnh, rwed raemx, yiengh dem yiengh hong lai. Daegnamz cij ndaej cug ranz cug hoh bae gouz vunz daeuj banghong.

（caengz sat）