Nanzdanh Yen Cunghbauj Myauzcuz dwg Myauzva, gyoengqde youq laeng Nanzdanh Cunghbauj Myauzcuz Yangh caeuq Yezlij Cin comzyouq lai. Dinfwngz guh ndangdaenj Myauzcuz dwg gij dinfwngz fwngzguh conzdungj Myauzva, gij buhvaq vunz diegde daj ciuhgonq daengz seizneix cungj riengz gij fuengsik fwngzguh conzdungj ma guh, gij doz baenz cim baenz cim siuq okdaeuj de cix miz gojgaeq lizsij ndei youq ndawde.

Myauzva miz aen fungsug ndeu: Lwgmbwk daj caet bet bi doxbae, daxmeh de couh hainduj son gij dinfwngz guh ndangdaenj Myauzcuz hawj de lo. Aenvih guh hwnjdaeuj haemq fukcab, yaek hag ndaej baenz dauq dinfwngz ceiq noix cungj yaek aeu hag haj roek bi roxnaeuz engq nanz cij ndaej. Itbuen cungj dwg aeu baengzdoj ma guh, caiq faen miz geij bouh: Boiq gij liuh veh doz、 veh gij doz ndangdaenj、boiq liuhnyumx、nyumx lab、duet gaunem、siuqva、nyib ndei daengj. Guh dauq ndangdaenj ndeu yaek guh baenz bi doxhwnj. Ndaej ok sae le, gyoengq lwgsau cungj aeu guh dauq buhvaq bawxmoq ndeu hawj swhgeij, daengz ngoenz okhaq daenj.

Gij ndangdaenj lwgmbwk Myauzva daegbied gyaqciq, baenz dauq buhvaq baugvat miz buh gwnz、vunjbaebnyouj、fandox、sai- hwet、sainda caeuq goenhsoij ngaenz daengj. Saihwet、dinvunj、saigeujga cungj miz sam ciengh roek cik raez, siengcwngh baenz bi cungj aeu maz ndaej maz; diuzvunj miz haj goenggaen naek, baenz ndang gungh miz cib goenggaen naek; ndangdaenj youh faen miz dauq- saekdog、dauqlaisaek、dauqnding sam cungj, guh hong cix daenj dauqsaekdog, bae ranz caencik baengzyoux cix daenj dauqlaisaek caeuq dauqnding. Gij vunj Myauz- cuz miz vunjloengz、vunjsai caeuq vunjbaebnyouj geij cungj neix, ndawde gij minzcuz daegsaek vunjbaebnyouj ceiq naek lo. Cungj vunj neix gij baebnyouj de saeq- fwdfwd, mbangj diuz cungj miz cien diuz baebnyouj doxbae. Baenz diuzvunj sohvidvid, gij liuh de hix gig ietrwt, gwnzde vanzlij siuq miz gij doz raiz gyaeundei haenx. Bouxsai itbuen cix daenj buh raez saek o’ndaem haenx, youh duk aen’gyaeuj hwnjdaeuj, goenhhoz、goenhfwngz daengj cix dwg aeu ngaenz ma guh baenz, daengz hoengzsaeh ngoenzndei cij daenj.

Seizneix, yienznaeuz gij siengjfap、sibgvenq bouxcoz Myauzcuz gaenq caeuq ciuhgeq mbouj doengz geijlai lo, hoeng baez daengz ndwencieng, roxnaeuz miz cietheiq hung haenx, gyoengqde cungj daenj gij buhvaq gyaeundei, yienh’ok gij minzcuz daegsaek gyoengqde okdaeuj. Bi 2010, din- fwngz guh ndangdaenj Myauzcuz ndaej senj haeuj buek daihsam swcigih gaep feihvuzciz vwnzva yizcanj mingzloeg.