Mbwn fuemx roengzdaeuj lo, Aulingz ninz gwnz mbonq ndaw rug, hai da gaenq yawj mbouj raen saek yiengh, daengx ranz laepdik, geij duz bit gaeq swenjyauyau rog hongh haenx hix mbouj nyi sing lo, aiq gaenq haeuj rongz luba? Buenq bi gonq ngoenz ndeu, de sawqmwh roxnyinh dungxin, aininz roengzbae le couh caiq hix hwnq mbouj ndaej lo. Boux lwgdaeuz de Daegyi soengq de bae daengz aen yihyen ndaw singz hawj canghyw yawj gvaq, canghyw cix naeuz cungj bingh neix dauqma youq ranz gag ra di ywdoj cienq gwn couh ndaej lo, mbouj yungh daeuj ndaw singz yw, ndaw singz yw bengz lailai, sai nyaenx lai ngaenz mbouj dij. Nyi canghyw yienghneix gangj, de couh gag rox bonjfaenh cungj bingh neix yw mbouj ndaej ndei lo, soqlaiz canghyw baez bungz daengz bouxbingh naek yw mbouj ndaej haenx cungj dwg yienghneix daengq naeuz, coi baema ranz aeu ywdoj yw. Hoeng de dauqma ndawranz ninz baenz buenq bi lo, cix caengz raen dai.

Aulingz coh mbiengj mbonq baihndaw fonj mbat ndang ndeu, youh gyaenfofo lo. Lwg iq de Daegdoeng diemj aen daengmeiz coemh youzhaeu dawzyebyeb ndeu, gaem aen guenqyw haeuj ndaw rug daeuj. Bi’gvaq baih- gwnz bangfuz ganbu gaenq bang ranz de an dienh cang daeng ndei lo, hoeng Daegdoeng mbouj gamj hai dienh- daeng, lau Aulingz ndaq. Aulingz vang yaek dai, ciengzseiz ndaq naeuz hai dienhdaeng yungh dienh lai deng ngaenz lai. Gaxgonq Aulingz couh haengj damz:

“Hai dienhdaeng ronghsag,

Saisak geijlai ngaenz,

Mbaet ndaej maenz suenq maenz,

Gaej lumz haemz lumz hoj.”

Dangq vunz Aulingz neix cingq- caen gwnz ndaej haemzhoj, youq 50 nienzdaih aen sigij gonq, de couh camgya ciyenginh riengz bingdoih hamj gvaq diuz dah Yazluzgyangh bae Cauzsenj caeuq bing Meizgoz hoenx- ciengq. Mwhde bingdoih guek raeuz gijgwn gijdaenj cungj gaenjcieng dangqmaz, hoeng gyoengq guenbing Cungguek Yinzminz Ciyenginh ceiq- heiq giengiengz, hoenxciengq maenh’ak, doeklaeng lij dwk ndaej hingz Meijgoz. Gizsaed Aulingz de mbouj dwg mbouj miz ngaenz gyau denfei, faenh de ndwen lij ndaej saek cien maenz ngaenz youhfuzginh ne, de dwg in ngaenz mbouj sij ndaej yungh ngaenz hane.

Daegdoeng coq aen guenqyw youq gwnz daiz, yomjyomj byaij gvaq henz mbonq, sing saeq heuh naeuz:“Daxboh!” Mbouj raen de han, Daeg- doeng yaengx daengmeiz gvaq henz naj de bae yawj, raen de lij laepda, de youh ninz ndaek lo. Hab heuh de gwn yw lo, mboujnex caiq caj yaep he yw couh gyoet lo. Daegdoeng ngamq yaek yoengx de, fwt youh ngeix, hawj daxboh lai ninz yaep ndeu ba, buenq bi neix daeuj de hojsouh lai lo, ciengzseiz got dungx ringx youq gwnz mbonq, gyangzhemq yaek dai, ninz mbouj ndaej ninz, hanh conh mwd- mwd, lumj bouxvunz yaek gaenqcaw nei. Daegdoeng baezbaez yawjraen daxboh baenz yienghneix, hix rox- nyinh get dungx get saej, hoeng de hix mbouj miz banhfap, cij ndaej youq henz yawj ndwi, bang mbouj ndaej daxboh maz. Daegyi saekseiz cix gag ngeix: Daxboh yienghneix hojsouh, lauheiq bae ndaej yoeng di lij lai ndei. Hoeng daxboh lij caengz siengj bae. Gyoengq vunzmbanj bouxboux cungj rox, Aulingz caengz siengj bae, dwg cuengqsim mbouj roengz song daeglwg de, daegbied dwg Daegdoeng, lau de mbouj rox ra gwn, hoj gvaq ciuh. Miz vunz guh fwen yienghneix naeuz gvaq:

“Aulingz mbouj sij bae,

De gyaez song daeglwg,

Haeuj ok cungj mbouj dwg,

Lau lwg hoj ra gwn.”

Mbouj rox gvaq le geijlai nanz, Aulingz fonj mbat ndang ndeu, ndiu lo.

Seizneix dwg banhaet roxnaeuz banngoenz? Dwg mbouj dwg ban- haemh? Mbouj deng, banhaemh mbouj nyaenx laep ha. Dwg doengxhwnz ba, baihrog caemrwgrwg, aen daengmeiz gwnz daiz duj feiz de deng gven ndaej iqetet daemqdedded, ronghdaeng myoxmyadmyad, rumz rog cueng ci haeujdaeuj duj feiz daengmeiz yaep ded yaep ded, yaek ndaep youh mbouj ndaep, caen lumj bouxvunz yaek dai cix caengz dai haenx ha. Caenh ndaejnyi daj goengq bya laeng ranz cienz daeuj aen sing roeggwj ndeu heuh gwq heuh gwq. Doenghbaez banlaux cungj naeuz, raen roeggwj heuh mbouj ndei, mbouj gitleih, haemhneix duz roeggwj neix heuh mbouj dingz, nanzdauh cingqcaen yaek ok maz saeh?

Lij geiq ndaej 7 bi gonq, couh- dwg youq fungh rug neix, hix dwg diemj aen daengmeiz myoxmywdmywd neix, goengq bya laeng ranz hix dwg roeggwj daengx hwnz heuh mbouj dingz. Simjlingz, daxmeh Daegyi Daegdoeng ninz youq aen mbonq neix ajbak ngabngab diemheiq fwfw, de couh yaek dai bae lo. De daengq Aulingz naeuz:“Boh Daegyi ha, gou bae gonq lo, Daegyi gaenq baenzranz, de rox guhhong, gou mbouj yungh gvaqsim, couhdwg Daegdoeng hawj gou cuengqsim mbouj roengz. Gou bae le, mwngz yaek mbaet gwn mbaet yungh, caenhliengh rom di ngaenz louz hawj Daegdoeng, gou lau de daengzcog guh mbouj ndaej gwn, deng dai iek……”

Gyoengqvunz aiq cungj ninz lo, Daegyi gvanbaz caemh bae ninz luba? Baenzlawz Daegdoeng mbouj youq ni? Baeznaengz cungj dwg Daegdoeng hwnzngoenz youq aen rug neix buenx bonjfaenh ha. Aulingz gag ngeix. Daegyi song gvanbaz caeux mbouj nem Aulingz caemh gwn lo, bae naz bae reih duh faenh songde, guhhong ra ngaenz soengq lwg doeg- saw, baeg lai, haethaemh cungj mbouj daih ndaej daeuj dajleix bouxlaux. Daegdoeng bouxvunz uk mbouj rim geijlai, miz di huk, mbouj daih rox guhhong, couh deng Daegyi coi de daeuj fugsaeh daxboh lo.

Hix veiznanz Daegdoeng lo, daj Aulingz hwnq mbouj ndaej daeuj le, soengq haeux soengq raemx, beuj haex beuj nyouh ceng mbouj geijlai cungj dwg Daegdoeng boux ndeu bau guh liux, Daegyi miz lwg miz yah, ngoenz nyaengq guhhong faenh de, baengh gaiq baiz “guh dangj laeb gaj” haenx ndaej daengz baihgwnz hawj mbouj noix ndeicawq, beijlumj bouj ngaenz hawj guh ndaem oij caeuq ciengx gaeq, hawj gij ndwenngoenz de ciemh ngoenz ciemh gvaq ndaej bae. De Daegyi ndei gvaq lo, hoeng Daeg- doeng baenzlawz guh? De boux vunz neix uk mbouj gaeuq lingz, dwk fwngz haeuj bak bae cungj mbouj rox haeb, seizneix baengh bouxlaux lij youq, miz youhfuzginh aen mboqsax neix dumz- yinh, mbouj suenq hoj gwn hoj daenj, bouxlaux caen bae le, de mbouj rox gag guhhong, yaek baenzlawz gvaq saedceij? Danghnaeuz lij dwg aen nienzdaih mwh swnghcanjdui haenx couh mbouj yungh causim lo, de miz ndang rengz ndeu, mboujlwnh swngh- canj duicangj coi de bae guh maz hong, de cungj lauxlaux saedsaed bae guh, couh mbouj you mbouj miz gwn lo. Hoeng seizneix bouxboux cungj gag goq guh hong bonjfaenh, bouxlawz ndaej goq daengz de?

Geij bi gonq Aulingz lij miz rengz, lij bae cae reih roengz naz, caemh heuh ndaej Daegdoeng bae gaen guh, gij naz reih de hix mbouj yaez gvaq vunz. Gaenh geij bi neix de laux lo, ndang nyieg mbouj ndaej bae naz bae reih le, Daegdoeng couh maz cungj mbouj rox guh lo, gij reih ndei naz biz ranz de couh menhmenh deng fwz lo. Aulingz yawjraen daeglwg iq baenz yienghneix, gag yousim gwdgwd.

Aulingz bingh engq naek lo, de dungxin ndaej got dungx youq mbouj ndaej, Daegdoeng daek vanj souh ndeu daeuj hawj, de cix gwn mbouj ndaej roengz. De song da cengq loet lumj davaiz, cinghdingh cimyawj Daegdoeng, fwijbak doenghdedded cix gangj mbouj ok saek coenz vah, caenh dwg raemxda laeveng’veng.

Daegdoeng naeuz:“Boh, haetneix bouxbangfuz raeuz dwk dienhvah daeuj heuh gou aeu mbaw sinh- fwncwng bae cunhveij banh soujsuz, naeuz baihgwnz yaek laeb aen vihhong goeng’ik ndeu hawj gou, cienmonz baet nyapnyaj ndaw mbanj……”

Aulingz dingq le, doenghdoengh fwijbak, fajnaj loq riunyumj, song buengzda loqloq haep roengzma, lumj youh ninz ndaek nei, de bae lo.

Gyo yinzminz cwngfuj,

Daeuj bang guh anbaiz,

Lwgbamz daz baenz gvai,

Dai hix ndaej da laep.