Cinz Youh ciengx miz song cien lai rongz rwi, ngoenzneix aeu dawz rwi buen daengz Runghgaeugat bae cuengq.

Haetromh, Cinz Youh caeuxcaeux couh hwnqdaeuj, de youq gyang rongz rwi cienq bae cienq dauq, yawjraen gij rwi neix, de sim’angq youh miz di you. Angq dwg, de ciengx rwi geijcib bi lo, baezneix ciengx ndaej ceiq lai, caiq gvaq ndwen lai dem couh ndaej sou dangzrwi lo; you dwg, baenzlai dangzrwi, gai haeuj gyawz bae, de caen mbouj rox.

Ciengx rwi mbouj ndaej cungj youq giz ndeu cuengq, aeu ndwen lai roxnaeuz cibgeij ngoenz couh vuenh dieg cuengq, baenzneix couh yied cuengq liz mbanj yied gyae. Cinz Youh mbouj miz ngaenz cawx ci, doenghbaez buen rwi bae cuengq cungj aeu ra ci daeuj rag.

Ngoenzneix boux daeuj bang de rag rwi dwg dahsau ndeu, dahsau neix dwg vunz ndaw singz, byoem ndaem noh hau, ndang reux aek hung, boux raen boux gyaez. De gaenq daeuj bang Cinz Youh rag gvaq song baez, mwngz heuh go, gou heuh nuengx, song boux couh sug lo.

Ci hai daengz lo, dahsau saet roengz ci daeuj, hemq:“Goyouh, gou daengz lubw, cang rwi lo.”

“Ei, daeuj lo.” Dingqnyi dahsau hemq, Cinz Youh doq han doq daj ndaw rwibang byaij okdaeuj.

“Mehloz ha, okdaeuj cang rwi hwnjci lo.” Cinz Youh hemq. Mehloz dwg mehyah Cinz Youh, daeglwg songde heuhguh Daegloz, vunzmbanj couh heuh de guh Mehloz.

Mehloz vunz daemq ndang biz, geij bi neix gaen Cinz Youh okdaeuj ciengx rwi, mbouj guh geijlai hongnaek, ngoenz beij ngoenz maj vang, ndang de engq luenz lo, Cinz Youh caeuq vunz gangjriu seiz ciengz naeuz:“Geij bi neix okdaeuj ciengx rwi mbouj ndaej maz ngaenz, ciengx ndaej mehyah maj cibgeij gaen noh hix dij ndaej lo.”

Cinz Youh lij iq couh maij duzrwi, de bae hagdangz, doengzdoih guhcaemz, de boux ndeu ra duzrwi gangjgoj, miz geij baez de deng duzrwi ndat ndaej naj gawh da foeg. De caengz ndaej 10 bi baez raen duzrwi mbin couh rox duzde daj gyawz mbin daeuj, youh mbin haeuj gyawz bae.

Miz ngoenz ndeu cuengqhag caeux dauqma, Cinz Youh doiq daxboh naeuz:“Boh, raeuz bae dwk rwi aeu dangzrwi ba?” Cinz Youh couh daiq daxboh hwnj goengq byalaeng bae, youq aen gemh dat he caen miz rongz rwi ndeu, haemhde aeu ndaej 5 gaen lai dangzrwi.

De nanz mbouj nanz ra ndaej rongz rwi ndeu, dangzrwi gwn mbouj liux couh dawz bae haw gai, baengh gai dangzrwi bi daengz haemh ngaenz gyu ngaenz lauz cungj mbouj you gyaq. De mbouj doegsaw le, couh ngoenzngoenz bae ra rwi, mizseiz ngoenz he ra ndaej, mizseiz song sam ngoenz cij ra ndaej.

“Dai lo meh ha, vaiq daeuj gouq gou ha!” Ngoenz he Cinz Youh cingq youq gyang rungh ra rwi, fwt dingqnyi miz dahsau he heuh gouqmingh, de riengz sing ra daengz dahsau. Dahsau de deng rwi ndat lo, mbouj rox ndat le geijlai cim, gwnz gyaeuj gwnz gen gwnz ga cungj deng caez, de noh foeg naj bienq saek liux, dot ndaej heuh gouqmingh mbouj dingz.

Cinz Youh naeuz:“Gaej you, gou bang mwngz ywyw.”

Caeuq duzrwi guhcaemz lai bi le, Cinz Youh mboujdan raen duzrwi couh rox rongz de youq gizlawz, raen aen rongzrwi couh rox ndawde miz geijlai dangz, lij rox deng duzrwi ndat le, baenzlawz yw dem.

Cinz Youh daiq dahsau bae gizraemh he naengh yietnaiq, de bae ra rongzrwi haenx.

Yaep he, de aeu ndaej gaem nonrwi he daeuj, gij nonrwi neix youq gyang fwngz de duzduz doenghngaungau, dahsau lau ndaej youh heuh meh hwnjdaeuj.

Cinz Youh naeuz:“Gaej lau, aeu neix daeuj yw rwi ndat ceiq ndei lo, mwngz yaek mbouj siengj baenzneix dot, couh aeu gij non neix daeuj yw.”

Dahsau buenq saenq buenq ngeiz, yaengx iet gen gvaqdaeuj. Cinz Youh dawz geij duz nonrwi nyaenj dek le youq gwnz gen dahsau baedauq cat song baez, yaep ndeu, giz deng rwi ndat couh mbouj dot lo. Ciepdaeuj, Cinz Youh laebdaeb youq gwnz naj、gwnz gyaeuj dahsau cat, cungj mbouj dot lo.

Dahsau cim coh Cinz Youh, yaek gangj youh mbouj gamj gangj, Cinz Youh raen de song fwngz lij got gagoek supheiq sausau, rox gwnz gumq gwnz goekga de hix deng rwi ndat lo. Cinz Youh naeuz:“Lij miz geij duz nonrwi caengz yungh sat, danghnaeuz mwngz saenq gou, couh duet vaq roengzdaeuj, gou bang mwngz cat ba.”

Dahsau baez dingq, naj nding daengz goekrwz bae, de yawjyawj seiqhenz, yaep he cij yot vaq roengzdaeuj…… Gvaqlaeng Cinz Youh couh caeuq dahsau neix baenz gvanbaz, dahsau neix couhdwg Mehloz.

Cinz Youh ra rwi okmingz lo, vunz yaek cawx dangzrwi couh daeuj ra de, de ciengz mbouj miz dangzrwi gaeuq gai hawj vunz. De hwnzngoenz naemj baenzlawz cij lai sou ndaej dangzrwi, mbouj geijnanz de couh naemj okdaeuj lo. De hwnj bya bae ra rwi, aeu dangzrwi le hix aeu rwimeh dauqma ciengx. Mbouj geijnanz, laeng ranz、naj ranz、dingj ranz de cungj baij rim le gij sieng ciengx rwi.

Vunzmbanj cungj okbae dajgoeng, Cinz Youh gvanbaz laemxsim youq ranz ciengx rwi, souhaeuj mbouj suenq daih, hoeng saedceij gvaq ndaej lij baenz.

Ngoenz he, geij bouxdaeuz haeuj mbanj daeuj, gyoengqde naeuz cwngfuj naemj bang Cinz Youh ciengx rwibang, baez ndeu ciengx geij bak geij cien sieng rwi. Cinz Youh miz di doeksaet, de mbouj miz ngaenzbonj ciengx baenzlai rwi, engq mbouj saenq boux ndeu ciengx ndaej baenzlai rwi.

Laxlawz, mbanjranz Cinz Youh dwg diegrungh, bya lai reih noix, 20 lai ranz, couh miz 18 ranz dwg bouxgungz, miz mbouj noix bouxcoz cungj aeu mbouj ndaej yah. Cwngfuj naemj bang gyoengqde vaiqdi baenzfouq, youh ra mbouj raen roen byaij.

Cinz Youh ciengx rwi gienh saeh neix cienz daengz ndaw yanghfuj, bouxdaeuz nyinhnaeuz diuz roen neix hab guh, gietdingh heuh gyoengq vunzmbanj lai ciengx rwi. Naemj hawj vunzmbanj cungj maij ciengx rwi, couh aeu bang Cinz Youh ciengx baenz le hawj vunzlai raen, yienghneix diuz roen ciengx rwi baenzfouq neix cij byaij ndaej swnh.

Ciepdaeuj, bouxdaeuz daiq Cinz Youh okrog bae yawj vunz baenzlawz ciengx rwibang, lij ok ngaenz hawj de guh bonj. Miz cwngfuj daeuj bang, de ciengx rwi yied ngoenz yied lai, gai dangzrwi souhaeuj ndaej di ngaenz le, de couh hwnj geij caengz ranzlaeuz, youh youq ndaw singz cawx dauq ranz bak lai bingzfueng ndeu. Vunzmbanj bouxboux haenh ndei, boux doenghbaez okbae dajgoeng cungj dauqranz haeuj rungh bae ciengx rwi.

Geij baez gonq Cinz Youh ciengx mbouj rim cien sieng rwi, dangzrwi youq bonjdieg cingqngamj gaeuq gai. Seizneix de ciengx le cien lai sieng rwi, gya hwnj gyoengq vunz ndaw mbanj ciengx, miz fanh lai sieng rwi, daengz sou dangzrwi seiz, baenzlai dangzrwi gai bae gyawz? Cinz Youh mbouj ndaej mbouj you.

Buen rwi vuenh dieg bae cuengq aeu sai ngoenz ndeu, cang ci roengz ci aen hong neix mbouj vei guh, ranz ndeu gag buen guh mbouj hau. Doenghbaez buen rwi, gyoengq vunzmbanj ciengx rwi cungj guhdoih doxbang, ngoenzneix Daeggenh、Lungzseiq、Minjgiz cungj daeuj lo, couh noix Cinz Denhbinh mbouj raen daengz.

Cinz Denhbinh caeuq Cinz Youh dwg gyahoh, bohmeh de ndang bingh, ndawranz gungzhoj, vunz dwg miz rengz youh baenzmbauq, couhdwg 30 geij bi lo lij caengz aeu ndaej yah. De ciengx rwi geij bi, gai dangzrwi hix canh ndaej di ngaenz, doenghbaez de buen rwi, Cinz Youh mbouj ndaej bae bang hix heuh Mehloz bae, bouxwnq mbouj daeuj mbouj geizgvaiq, de mbouj daeuj Cinz Youh couh roxnyinh miz di geizgvaiq.

Lungzseiq naeuz:“Cinz Denhbinh mbouj daeuj miz maz geizgvaiq, ranz de daeuj boux he couh ndaej lo, mwngz lij naemj heuh daengx ranz de cungj daeuj cij habsim ha? ”

Cinz Youh naeuz:“Ranz de couh de boux ndeu miz rengz guhhong, ranz de lij miz bouxwnq daeuj gvaq.”

Lungzseiq vix coh dahsau gizgyae haenx naeuz:“Dahsau haici haenx couhdwg dahyoux de, ndwenlaeng couh cingj raeuz gwn laeujvan lo, de daeuj bang mwngz mbouj suenqsoq ha?”

“A!” Cinz Youh doeksaet ndaej mbouj rox gangj maz. Hix mbouj gvaiq de, de song gvanbaz okdaeuj ciengx rwi le, yaep buen gvaq neix yaep buen gvaq haenx, gij saeh ndaw mbanj noix rox. Cinz Youh gag naemj: Dahsau daeuj rag rwi geij baez lo, saeklaih mbouj gangj gvaq maz vah loengh de.

Runghgaeugat ndoeng laep vacwx lai, rwibang buenq daengz gizneix le, duzduz rwi haeujhaeuj okok muengz gip va. Ngoenz he haetromh, bouxdaeuz ndaw yangh youh daeuj lo, gyoengqde cam Cinz Youh baezneix aiq sou ndaej geijlai gaen dangzrwi, Cinz Youh naeuz aiq ndaej fanh lai gaen.

Gyoengq bouxdaeuz naeuz:“Seizneix cwngfuj gaenq caeuq aen gijyez baihrog he lienzhaeh bang sou gai dangzrwi, gaen 80 maenz. Gyoengqde baez ndeu couh yaek aeu 10 fanh gaen, dou lauheiq mbouj gaeuq soq hawj vunz, couh gvaqdaeuj cam sou yawjyawj.”

Sou dangzrwi geij ngoenz haenx, gij ci daeuj rag dangzrwi aen haeuj aen ok, aeu gij dangzrwi ranz neix le, youh aeu gij dangzrwi ranz haenx. Baezneix Cinz Youh ndaej souhaeuj 70 geij fanh, dawz ngaenzbonj ok, canh ndaej 30 geij fanh. De doeksaet youh sim’angq, gag gangj gag naeuz:“Aen seiq neix caen ndei ha!”