Gou byaij hwnjbae, iet fwngz bae gaemh Cin Lieng, siengj mbouj daengz gij ga gou dauqfanj deng Cinz Cangfeih got dawz lo, gij fwngz gou swhyienz gaemh mbouj ndaej daengz Cinz Lieng.

“Cinz Lieng, vaiqdi buetdeuz ho!” Cinz Cangfeih hemq naeuz.

“Cuengq de, cuengq de, hawj de daeuj gaemh gou, gou youh mbouj famhfap, mwngz vaiq cuengq de ya, dingqnyi lwi!” Cin Liengz mbouj naihnanz dwk yiengq daxboh de hemq naeuz.

Daxboh de mbouj cuengq gij ga gou, dauqfanj yied got yied ndaet. Gou hujheiq bonjlaiz dwg aenvih Cinz Cangfeih deng hoenx le cij nyex hwnjdaeuj, seizneix de yienghneix got dawz gij ga gou, gou roxnyinh de mbouj dijndaej gou hojsik de lo. Hakndei hoj duenq saeh ndaw ranz, cijaeu mbouj dai vunz, guenj de guh gijmaz. Gou mbouj bae gaemh Cinz Lieng lo, mbouj caiq leixlangh gij saeh gyoengqde.

Gyoengqde song vunz boux gonq boux laeng byaij deuz lo, yawj baihlaeng gyoengqde byaij bae gyae le, gou ngeizvaeg lo, aen banhaet neix, Cinz Lieng vihmaz gyaep hoenx daxboh bonjfaenh.

Laj gorungz caemrikrik, cawz daeglwg caeuq goenglaux boux ndeu nyienh hoenx boux ndeu nyienh deng hoenx gaenq byaij gyae nem boux gingjcaz rox sij sei ngamq daeuj le, mbouj miz bouxlawz hwnq baenz caeux.

Neix couh dwg Yizgyangh.

Raq rumz ndeu bongj gvaqdaeuj, gou daengx ndang saenznaenggaeq. Gou naemj, gou daeuj daiq caeux lo, boux gingjcaz ndeu hwnq baenz caeux, aiq mbouj dwg gijmaz saehndei. Seizneix naeng gyaeuj gou miz di in he, daxbaenh youq bakdou cin cwngfuj, gou yungh cien bek bonjfaenh seiz yungh rengz gvaq lai lo, gaiq cien ndeu gou yungh gij rengz song gaiq cien, dawz aen gyaeuj bonjfaenh dangguh aen gyaeuj vunzvaih haenqrengz bek lo. Baezlaeng gou mbouj ndaej yienghneix guh, bek gaiq cien ndeu couh yungh gij rengz bek gaiq cien ndeu. Linghvaih, gou mbouj ndaej youq banhaet baenzneix caeux daeujdaengz gizneix.

Mbaw ceijhau ndawsim gou, veh roengz bitmaeg caemnaek ndeu.

Hoeng dang gou banringzgvaq caiq daeuj- daengz gizneix seiz, gizneix ciuqyiengh caemrikrik.

Doumonz ranzranz hohhoh dwg hai dwk, hoeng mbouj yawjraen gijmaz vunz. Gou naemj, vunz ne, vunz cungj bae gizlawz gvaq la? Gou cingqngamj bungzdaengz codaeuz dazyinx gou daeuj gizneix gaemh vunzvaih bouxcuznaz ndaw cin Vangz Yizgvangj, gou cam de: “Gij vunz gwnz gai cungj bae gizlawz liux la?”

Vangz Yizgvangj vix giz fuengyiengq ndeu, naeuz, Cuhmuzlangjmaj. Yienzhaeuh caij danci lumj mbin nei deuz lo. Cuhmuzlangjmaj dwg aen ndoi Yizgyangh ceiq sang ndeu, bonjlaiz wnggai heuhguh Ndoigya’gvangq, hoeng vunz Yizgyangh daihmoq roxnyinh heuh Ndoigya’gvangq mbouj gvaqyinx, couh heuh de guh Cuhmuzlangjmaj.

Gou swnh giz fuengyiengq Vangz Yizgvangj vix haenx benz hwnj Cuhmuzlangjmaj, ndonj gvaq benq faex ndeu le, couh yawjraen baenz bang vunz.

Gyoengqde cingq guhdoj.

Boq Ndaep Gij Fugfauz Seieiq

Gou deng sieng lo.

Gou mbouj siengj daengz, gij vunz gunghoenx gou dwg bang lwgnyez cibngeih cibsam bi haenx, youq mwh gou cung gvaqbae yaek mbouj cinj gyoengqvunz guhdoj, gyoengqde vaiqvit gietcomz youq baihnaj gou, gyoengqde yungh ndaekdoem caeghoenx gou, mbouj hawj gou depgaenh gyoengqvunz guhdoj. Gij ndaekdoem Cuhmuz- langjmaj geng raixcaix, gab dwk rumznit yiengq gou mbin gvaqdaeuj, gou lumj bouxyienjheiq bungz- daengz yungyiemj seiz, fwt rox henhoh gwnz ndang giz ceiq youqgaenj bonjfaenh nei, yungh song fwngz gothoh fajnaj gou—— Mboujdan dwg fajnaj bouxyienjheiq youqgaenj, fajnaj boux gingjcaz hix dwg youqgaenj raixcaix bw. Yienghneix guh le, gizyawz gwnz ndang gou gwnvi lo. Ndaekdoem youq gwnz mbaq、aek、din、ga gou caq gvaqdaeuj, in dwk gou mbouj ndaej mbouj maeuq roengzdaeuj. Gou youq cibngeih cibsam bi seiz ceiq lau gingjcaz lo, seizneix bang lwgnyez neix mboujdan mbouj lau, lij yungh ndaekdoem hoenx gingjcaz.

Yizgyangh ak lai lo.

Gyoengqvunz guhdoj doeklaeng sanqdeuz liux lo, gou boux vunz dog ndwn youq gwnz Cuhmuzlangjmaj, cazyawj gij sieng gou, gwnz ndang gou gungh miz cibhaj riz hoengz. Caeklaiq Cuhmuzlangjmaj dwg aen ndoi ndeu, danghnaeuz dwg byarin, yiengq gou mbin gvaqdaeuj haenx couh mbouj dwg ndaekdoem lo, gwnz ndang gou, hix cieddoiq mbouj dwg cibhaj riz hoengz baenzneix genjdanh lo.

Cinz Naijgvei naeuz: “Bouxlawz hawj mwngz gag hengzdoengh, gou aeu mwngz liujgaij liujgaij gij cingzgvang Yizgyangh, youh mbouj dwg heuh mwngz okgingj, mwngz yienghneix guh yungyiemj raixcaix bw.” De doq yiengq gwnz ndang gou byoq Yinznanz Bwzyoz doq hawj gou “hwnjdangz”. “Baezlaeng mboujguenj bungzdaengz gijmaz saeh, mwngz cijguenj yawj, yienzhaeuh dauqma caeuq gou gangj, mwngz aeu dingq gij vah gou cijndaej. Yizgyangh giz deihfueng neix mbouj bingzciengz, de mbouj dwg ceijfuenggek, mwngz seizlawz siengj youq gwnzde sij sei couh seizlawz youq gwnzde sij sei. Yizgyangh dwg sawcuenh, mwngz cijguenj doegyawj couh baenz lo, cawz le yawjraen hengz yak gaj vunz, mboujnex gaej gag hengzdoengh.” Cinz Naijgvei roengz minghlingh hawj gou, de yungh cihswz “yawj sawcuenh” yienghneix.

Ndaw cin cwngfuj Siz Yungjgez、Vangz Yizgvangj naeuz, Cinz Naijgvei mbouj bae gaemh vunzvaih, laxlawz de cingq “yawj sawcuenh” ne. Gou roxyiuj lo, doengxngoenz, daengx aen cin Yizgyangh gwnz gai mbouj miz saek boux vunz, vunzsai mehmbwk bouxlaux lwgnyez cungj buet bae Cuhmuzlangjmaj guhdoj lo, mboujdan dwg Cinz Naijgvei, couh dwg cincangj Veiz Saulez hix guenj mbouj ndaej gyoengqde, mbouj yawj sawcuenh mbouj ndaej ho. Hoeng gyoengqde mbouj wnggai yungh ndaekdoem caeghoenx gou. Ndawsim gou caen mbouj cwxcaih geijlai, miz seizgei gou itdingh aeu son’gyauq son’gyauq gyoengqde.

Cinz Naijgvei yawj ok gij simgei gou, de dwk aen dienhvah ndeu, yaepyet, Cinz Lieng daiq caet bet boux nyezrauh daeujdaengz dangqnaj gou, couh dwg gyoengqde yiengq gou ndek ndaekdoem.

Cinz Lieng youq dangqnaj gou, moix boux fak fajfwngz ndeu hawj gyoengqde, miz geij boux in ndaej daej hwnjdaeuj liux.

Youh dwg boux Cinz Lieng neix, banhaet hoenx bouxvunz beij de hung haenx (caemhcaiq dwg daxboh de), banhaemh hoenx boux beij de iq lwgrauh, mbouj genjdanh ho. Miz boux nyezrauh deng Cinz Lieng hoenx daej ndeu naeuz, gyoengqde mbouj roxnaj gou, ganjnaeuz gou dwg daeuj ciengj ngaenz hane.

Cinz Naijgvei naeuz: “Mwngz mbouj roxnaj de, sou wnggai roxnaj gingjcaz ba, de daenj buhgingjcaz ne, nanzdauh sou lienz buhgingjcaz cungj mbouj roxnaj ha?”

Cinz Lieng yawj gou baez ndeu, naeuz, gyoengqde cij roxnaj gingjcaz Yizgyangh.

Cinz Naijgvei naeuz: “De couh dwg gingjcaz Yizgyangh, seizneix sou roxnaj luba?” Gyoengqde ngaekngaek gyaeuj.

Cinz Lieng lij iet fwngz okdaeuj siengj caeuq gou gaem fwngz, gou mbouj leixlangh de, gij fwngz de cijndei catcat gwnz diuz saeu suijniz henz ndang gou.

Gyoengqde byaij deuz le, Cinz Naijgvei naeuz: “Gienh saeh neix couh yienghneix lo, ngoenzlaeng mwngz wnggai nyinhcaen seiz nyinhcaen, mbouj wnggai nyinhcaen seiz mwngz yawjyawj couh baenz lo, yienghneix cijndaej naihnanz. Gou youq Yizgyangh cib geij bi lo, danghnaeuz gienhgienh saeh cungj nyinhcaen, senqcaeux couh rueg lwed lu.”

Gou geiqmaenh gij vah de, hoeng fajnaj Cinz Lieng seizneix dauqfanj yienh youq ndaw uk gou, beij de ndwn youq dangqnaj gou seiz lij cingcuj ne, gij rwz、ndaeng、bak Cinz Lieng miz di caenx he, lwgda、aen ndaeng、conghbak vih ceng diegnaj gak mbouj doxnyiengh, yakyawj raixcaix. Yawj hwnjdaeuj, de dwg boux vunz gou youq Yizgyangh aeu ciengzseiz raennaj ndeu lo.（5）