●7 nyied 16 daengz 17 hauh, Denzyangz Gih youq dieg guhyiengh daeuz 20 fanh moux nungzlinz swnghdai duetgungz canjnieb banh aenban son boux senj diegyouq hag dinfwngz ganq makgaivaiz. Aen ban neix youz ndaw gih nungzyez nungzcunh giz hawj guh, heuh Gvangjsih Bwzswz Nungzyau coengh son’gyauq, aen yozyau neix nda doenghboux lauxsae sughangz daeuj hwnjdangz. Yiengh sonlienh neix guh 2 geiz, geiz miz 40 daengz 50 bouxhag.

（Vangz Gozsun）

●7 nyied 16 hauh, Cauhbingz Yen comz gyoengq cujyin gak cunh（segih）daengx yienh youq Vangzyauz Cin hai aenhoih ciendaez son cunghgyau cwngcwz fazgveih cihsiz. Miz 50 lai boux cujyin gak cunh（segih）、boux guh hong dungjcan camgya baez hoih neix.

（Cau Ginhbinh）

●7 nyied 1 hauh daengz 14 hauh, Denhdwngj Yen 96 aen hagdangz cunghag siujhag gonqlaeng mbeguh baenzroix hozdung dawz《Gojgaeq Gwzming》（mwh 1925 nienz daengz 1949 nienz aendangj raeuz youq Guengjsae baenzlawz hwngfat）cienz haeuj ndaw hagdangz, gungh miz 38486 boux hagseng camgya hozdung. Baenzneix guh daezgonq hawz ndawbiengz hwnghoengh hongsaeh angqhoh laeb dangj 100 hopbi.

（Hij Vwnzbinz）

●Bineix doxdaeuj, Ningzmingz Yen iuheuh daengx yienh ganbu cizgungh、gij giyez maij coengh vunz caeuq doenghboux gyaez coengh vunz mbeguh gak cungj hozdung gienhawj cienzngaenz doxgaiq, gien 30 lai fanh maenz doxgaiq hawj“cauhsi boizcingz”, 9000 lai vunzbaez ndaej ikleih, baenzneix guh gikcoi vunzlai lai rox gyo’mbaiq aencingz dangj、lai maij riengz dangj guhdoih byaij, gyonjrengz laemxsim hingzdingh gunggeng duetgungz.

（Luz Dezsanh）

●Bineix doxdaeuj, Lingzyinz Yen yawj dieg guhsaeh, habngamj haifat vihhong goeng’ik banggungz. Suenq daengz 6 nyied daej, aen yienh neix gungh haifat gvaq 1061 aen vihhong goeng’ik banggungz, lumj vihhong goeng’ik lajmbanj、boux coengh gaemhhanh binghraq daengj, hawj 1100 boux vunzhong ranz- gungzhoj ndaej hong guh, fat 424.28 fanh cienzngaenz boujdiep vihhong gvaq.

（Lij Sinvaz）