Ngoenz banhaet, miz boux baengzyoux doxiu, dou cibgeij boux couh angqangq yangzyangz naengh ci bae aen Mbanjyauz gyaeuqndei youz.

Aen Mbanjyauz neix youq Sangswh Yen Nanzbingz Yangh, ndaw mbanj miz 1336 vunz, ndawde boux Yauzcuz ciemq 98%, dwg aen mbanj gig miz daegsaek Yauzcuz he.

Yienznaeuz aen mbanj neix liz yienhsingz ngamq miz 30 geij goeng- leix, hoeng gou baez daih’it daeuj. Gou dwg Bouxcuengh, doiq gij vah Yauzcuz、gij buhvaq Yauzcuz、gij fungsug Yauzcuz cungj roxnyinh gig geizheih.

Ngamq dingz ci, gou couh gaenj- gip diuq roengzdaeuj, doq muengh- yawj gij gingj Mbanjyauz neix. Baengzyoux raen gou baenzneix couh naeuz: “Neix dwg aen Mbanjyauz he, mbouj dwg ‘diegsien’, caen miz baenz vuenheij law?” Gou cij riu, mbouj hoiz de, angqyangz riengz loh buet coh ndaw mbanj.

Lingh boux baengzyoux naeuz gou nyi:“Yaep ndeu bae ranz cunh- cujyin, de dwg boux mehmbwk he, baenzngoenz cungj nyaengq mbouj dingz. Hoeng, de rox dou daeuj youz, ngoenzneix daegbied cingj dou bae ranz de guhhek gwn ceiz.”

“De caen dwg boux mehmbwk maenh’ak, aiq dwg dahcej laux di ba?”Gou itloh siengj dwk, itloh cimyawj henz mbanj gij faexgawq caeuq faexbatgak. Daengx mbanj cungj cimq youq ndaw gij heiqhom faexgawq caeuq batgak. Raq rumz iq liengzsisi ci gvaqdaeuj, lumh dawz faj naj gou, hawj gou simsangj dangqmaz.

Mbouj geij nanz, couh ndaejnyi singriu dahsau lo, lumj doengzlingz nei ndeidingq. Gij singriu neix, couhdwg Lij cujyin riu ne. De naj maeqhoengz, daenj buhvaq gyaeundei Yauzcuz, lingh miz dah he cingq bang de roi gyaeuj, gij byoemgyaeuj raez- rangrang ndaemndongq de couh lumj baengzsei saekndaem nei. Liuh mbouj daengz de baenzneix coz baenzneix gyaeundei.

Geij dahsau Yauzcuz henz ndang de raen dou daeuj daengz, gwnz naj lumj mbin gvaq dujduj fwj hoengz nei. Gyoengqde doq ciengq go coux hek, sing go goksasa, gwnz naj lumj hai va nei, unqswnh youh gyaeundei. Boux baengzyoux he gaenjgip ingj roeng- daeuj. Yienznaeuz dou mbouj rox gyoengqde ciengq maz, hoeng, cungj ndaej daj gij riunyumj caeuq sing go roxnyinh gij cingzeiq gyoengqde.

Gyoengq dahsau Yauzcuz aeu Vahgun caeuq dou gangjgoj, mizseiz lij caeuq gou gangj Vahcuengh dem, gou loeklak lo. Mbouj geij nanz, daihgya mwngz coenz gou gawq, menhmenh gangj sug caez. Yienz- naeuz gij vah miz di mbouj doxdoengz, hoeng, gyoengq boux Yauzcuz caeuq Bouxcuengh cungj sim lienz sim lo.

“Dou dwg Vahdaeuzyauz, diuz sujbaq gwnz gyaeuj siuq miz gij vahoengz iqet, couhdwg aen daegdiemj ceiq hung dou.” Lij cujyin riunyum- nyum gangj.

De youh dawz buhvaq cang ndang Yauzcuz menhmenh gangj hawj daihgya. Doenghgij baenz dauq buh Yauzcuz, cujyau miz buh raez、 vaqdinj caeuq saivaq 3 yiengh gyoep- baenz. Gij baengzfaiq buhvaq cungj dwg saeklamz laeg, buh raez hai aek, naj dinj laeng raez, song mbiengj lij ajca; hozbuh、bakgenbuh caeuq aek- buh nyib gij baengzva hajsaek siuq gopva; ndaw buh lij boiq miz geu gopva dudouh nding he; daenj ndei dudouh caeuq buhvaq le, caiq cug diuz saivaq hajsaek youq gwnz hwet. Daenj aen mauh siuq vahoengz、seiqhenz venj rim roixroix caw haj- saek, caiq daiq aen gyongx ngaenz he.

Gij buhvaq baengzfaiq saeklamz laeg, gij diuqriengz ndinghoengz, gij caw saekheu, gyahwnj aen gyongx ngaenz ronghsagsag, gak cungj gak yiengh cungj dapsaek dapboiq, youh doxhab doxbouj, gyaeundei maez vunz.

Gyoengqde naeuz dou nyi, dauq buhvaq Yauzcuz cang ndei yiengh- neix, cungj dwg daxmeh nyumx baengz、siuq va、san baenz, youh baez cim baez cim nyib baenz buh, doeklaeng caiq nyib hwnj gij caw caeuq diuqriengz…… Boux dinfwngz vaiqvet hix aeu yungh baenz ndwen lai cij guh ndaej baenz. Dauq buhvaq yienghneix dwg daxmeh Yauzcuz soengq hawj dahlwg guh gyaqcang. Danghnaeuz dwg hekyouz diegrog daeuj yaek cawx, dauq buh neix gai daengz cien baj song cien maenz.

Seizneix miz daxbuz Yauzcuz he naengh youq henz ndang Lij cujyin son dahsau he daemj saivaq. Giuz- ndaeng de gaq fouq gingqlauxva he, aiq dwg ciengz guh hongnaz, naengnoh naj de laepsengseng, gij nyinz song fwngz doedded, lumj naeng faexcoengz nei. Daxbuz haenx gig haeujsim son, yienghceij gig unqswnh. Dahsau de naihsim nyinhcaen bued rag gij mae daemj saivaq.

Dingqgangj diuz saiva dahsau Yauzcuz gig youqgaenj. De beij geu buh dijbauj lai lo. Youq dieg Yauzcuz miz vahsug naeuz “nyienh ciq gimngaenz cienfanh hawj, cienfanh gaej hawj ciq saivaq”. Neix dwg aenvih saivaq dwg gij huq bouxcoz Yauzcuz dinghcingz, mbouj ndaej ciq hix mbouj ndaej doek.

Danghnaeuz dahsau Yauzcuz maij daegmbauq lawz, couh gej saivaq swhgeij daemj baenz haenx soengq hawj daegmbauq de; danghnaeuz daegmbauq de hix dauqsoengq saivaq bonjfaenh hawj dahsau, songde couh baenz lo, caiq mbouj ndaej caeuq bouxwnq guhyoux.

Danghnaeuz daegmbauq de sou ndaej saivaq dahsau le, caengz dauqsoengq saivaq swhgeij hawj dahsau, couhdwg aeu ngeixnaemj ndei cij gietdingh. Lau daegmbauq neix ngeix nanz lai deng dah wnq ciengj bae, lij miz dahsau mbeihung bae ciengj saivaq daegmbauq de dem. Gou caen boiqfug boux Yauzcuz baenzneix gamj yienh gij cingzeiq bonjfaenh okdaeuj.

Gou yawj diuz saivaq hajsaek neix caeuq gij doxgaiq miz minzcuz daegsaek gwnz haw ca mbouj geijlai, nanz hawj gou hwnjsim. Hoeng, sijsaeq cimyawj, diuz saivaq neix ngamq daemj ndaej gen fwngz gou baenzneix raez, miz gij mae nding、mae lamz、mae henj daengj geijcib diuz maesei baiz daemj baenz. Cungqgyang gij yienghsaek vanzlij aeu doq daemj doq miz gvilwd bienqvuenh dem, dwgrengz daemj buenq ngoenz hix daemj mbouj ndaej geijlai raez bw!

Youq seizneix, gij vunz naengh dingh ndaej baenz nanz naihsim guh gij hongfwngz saeqnaeh neix caen mbouj miz geijlai lo. Hoeng, vih dahlwg ndaej vuenyungz, gyoengq daxmeh Yauzcuz caiq nanz hix aeu son dahlwg rox guh. Seizde, ndawsim gou fwt lumj coemh dong feiz nei ndat hwnjdaeuj, engq boiqfug gyoengq beixnuengx Yauzcuz lo, gyoengqde baenzneix coengmingz、swnzsienh、gaenxguh!

Gyoengq dahsau cang ndang ndei le, couh caez angqvauvau bae guh ceiz simgyoij dakdaih dou. Gij ceiz neix aeu simgyoij、nohmou、raetnae、coeng daengj faen yiengh cauj ndei le, youh caez cab haeuj rek cauj baez he , dwk okdaeuj le guh sim ceiz. Gij ceiz neix gig mizfeih, dwg aeu daeuj dakdaih bouxhek daegbied!

Dou doq angqvauvau yawj gyoengq dahsau Yauzcuz guh ceiz doq haeujsim dingq gyoengqde gangj baenzlawz guh ceiz——“Gij ceiz guh ndei le, dahsau mbouj ndaej swhgeij cuengq roengz cwngloengz bae, aeu hawj boux vunz daegbied he baenz song aen song aen roengz haeujbae.”

Gou gig geizheih, caegcaeg cam dahsau henz ndang vihmaz. De yaep- yaep da, dwggyaez dwk rwz gou naeuz:“Song aen song aen cuengq dwg aenvih gitleih, maqmuengh saehndei comz daeuj; boux vunz daegbied neix dwg banlaux roxnaeuz boux coeng- mingz roxsoq, baenzneix dwg yawj- naek bouxhek.”

Caen dahraix, gyoengq dahsau guh ceiz ndei le, cungj ndenq hawj Lij cujyin, Lij cujyin couh siujsim riri dawz ceiz song aen song aen cuengq roengz cwngloengz bae.

Naengj ceiz seiz, gyoengq beixnuengx Yauzcuz vanzlij lwnh gij fungsug gak cungj gak yiengh gyoengqde hawj dou. Youq ndaw gyanghongh boux Yauzcuz neix, daihgya miz gangj miz riu, singriu mbouj daengx gvaq.

Dou yaek dauqma seiz, gyoengq beixnuengx Yauzcuz mboujlwnh sai mbwk roxnaeuz laux iq, cungj humx gvaqdaeuj, baenzlawz cungj mbouj hawj dou dauq. Miz dahnuengx Yauzcuz bakred he, gaem fwngz gou ndaetndaet bae, gvaengzda hoengz- gywggywg naeuz:“Dahcej, gou mbouj ndaej doegsaw lai, mbouj rox gangj gij vah ndeidingq, seizneix lij romh, mbouj gip dauqma, gyoengq beixnuengx dou caiq caez gwn caeuz gonq……” Coenz baj song coenz vah lauxsaed de, yaepyet couh dawz aen sim gyoengqdou cungj gyoeb youq giz he, Bouxcuengh boux Yauzcuz cungj dwg beixnuengx!