Yaek cwngmingz bonjfaenh doiq ndaej gvaq gij cwngheuh miznaj yinzminz gingjcaz, gou cijndei baez dem baez gip aeu gij cien gwnznamh bek aen gyaeuj bonjfaenh, itcig bek daengz ngauq cien soiq liux bae, hawj gyoengqde yawj ndaej da daengx bak aj liux. Yienzhaeuh gou youq raq ienhoenz saek hoengz cienq ndang byaij deuz. Ndaw mboengq ndeu, gou youq bakdou cin cwngfuj bek cien gwnz gyaeuj bonjfaenh, youq bakdou gunghsanghsoj bek cien gwnz gyaeuj bonjfaenh, youq gvangjcangz gunghsiuhse bek cien gwnz gyaeuj bonjfaenh, couhlienz youq bakdou cin siujyoz hix bek cien gwnz gyaeuj bonjfaenh, gou couh lumj cangh- yienjheiq louzlangh nei, yaek cwngmingz gij cien bouxwnq gveng youq gwnznamh hawj de haenx, dwg dijndaej roengzrengz bek gyaeuj mbouj dingz.

Gou miz di mbouj naihfanz, vihmaz gij vwndiz gyoengqde cungj dwg baenzneix doxlumj? Gou yied daeuj yied roxnyinh sojcangj dou Cinz Naijgvei hungmbwk lai lo, caezgya cungj dwg gwn gij raemx Yizgyangh, de miz leixyouz caeuq gyoengqde doxlumj, youq gou ngamq daeuj seiz, hawj gou bek ngauq cien, bag cienheu, dik dinmbin doenghgij neix.

Yawj doenghgij cien sanq baenz dieg, gou hix mbouj roxnyinh miznaj saek di, ndigah gou mbouj nyinhnaeuz banhaet dwg gou daengx ngoenz ndaw- de seiz ceiq ndei. Gou ngoenznaengz seiz ceiq ndei dwg gyangngoenz, hix dwg gou seiz byaij youq dieg gihminz, cij miz seizneix, gonj bitveh ndaw uk gou, cijndaej vaddoengh hwnjdaeuj cacaca veh mbouj- dingz.

Gij hong gou mbwndingh aeu youq laj gorungz guh. Sou yawj, gorungz haenx cwgoemq bae buenq diuz gai, ndigah, gij ranz buenq diuz gai neix couh yap rongh yap laep youq lajraemh, danghnaeuz mwngz mbouj miz doiq lwgda ndei ndeu, hoeng mwngz youh siengj byaij gaenh doengh aen ranz haenx, mwngz gaenbonj yawj mbouj cingcuj gizhaenx cingq ok gijmaz saeh, caemhcaiq saedsaeh gizhaenx cungj dwg cingq ok gijmaz saeh. Gij saeh gizhaenx ok haenx, swhyienz dingzlai mbouj dwg saehndei.

Ngoenzhaenx, gou youq bakdou cin cwngfuj bek daihbet ngauq cien daj gou daengz Yizgyangh doxdaeuj, hawj bouxdajcawj fandangz cin cwngfuj Siz Yungjgez、bouxcuznaz ndaw cin Vangz Yiz- gvangj、cin giswnghcan cancangj Liuz Fuzding loengh ndaej da daengx bak aj liux, gyoengqde sam boux vunz lumj doxiu nei, doengzcaez bekfwngz hwnjdaeuj, bakdou cin cwngfuj yiengj gij sing bekfwngz seiz sang seiz daemq haenx, ciudaeuj haujlai vunz ngamq singjndiu.

Siz Yungjgez haenh gou, de yungh gij fuengfap gyangqdaemq Cinz Naijgvei daeuj haenh gou, de naeuz: “Cinz Naijgvei guh gijmaz ndaej baenz, daengx ngoenz cungj yawj mbouj raen vunz, ci cungqdinj de wnggai raek youq gwn hwet mwngz, Yizgyangh couh yaek aeu boux gingjcaz lumj mwngz yienghneix.”Vangz Yizgvangj byaij gvaqdaeuj cazyawj aen gyaeuj gou, raen aen gyaeuj gou mbouj miz saeh, couh gig unqswnh dwk baet gij ciensoiq gwnz gyaeuj gou, riengz laeng Siz Yungjgez gyangqdaemq Cinz Naijgvei, de naeuz:“Cinz Naij- gvei dangyienz mbouj miz banhfap caeuq mwngz beij lo, de cawz rox goeb gunghcangh le, lij rox gijmaz dem?” Vangz Yizgvangj gangj ndaej mboujloek, Cinz Naijgvei sojcangj gou daj haet daengz haemh couh rox hen youq bangunghsiz, hawj doenghboux vunz bae Gvangjdungh dajgoeng haenx goeb gunghcangh, coinyoengx gyoengqde ndeindei dajgoeng, gaej siengj bohmeh ndaw ranz lai. Liuz Fuzding naeuz:“Goeb gunghcangh miz gijmaz yungh, gaemh vunzvaih cij mizyungh. Mwngz gaej hag Cinz Naijgvei, mwngz aeu bae gaemh vunzvaih, Yizgyangh vunzvaih lai raixcaix.”

Gou ngamq liebbyaij mbouj nanz, couh dingqnyi vunz naeuz Yizgyangh miz haujlai vunz- vaih, gou roxnyinh diuzrap gou naek dangqmaz, couh sikhaek mbon ok bonjbitgeiq, aeu geiq gij mingzcoh doenghboux vunzvaih haenx, ngoenzlaeng gaemh gyoengqde haeuj ranzlauz bae.

Hoeng Liuz Fuzding mbouj naeuz gou nyi bouxlawz dwg vunzvaih, de cijdwg hwhw riu song sing, lumjnaeuz gyoengq vunzvaih Yizgyangh cungj youq ndaw song sing hwhw de nei.

Liuz Fuzding naeuz: “Mbouj ndaej naeuz mwngz nyi, bouxlawz dwg vunzvaih mwngz bonjfaenh gag bae yawj, daengz laj gorungz bae yawj.” Gangj sat faj fwngz de baez vix, lumjnaeuz vunzvaih couh youq laj gorungz nei.

Yienghneix gorungz youq ndaw lwgda gou, couh mbouj dandan cij dwg giz gingjsaek ndeu lo. Gou vaiqdi ganj bae laj gorungz.

Vangz Yizgvangj、Liuz Fuzding gangj ndaej mbouj loek, gou ngamq daengz gizhaenx, couh yawjraen daeg hauxseng ndeu mbat fajfwngz ndeu, hoenx goenglaux ndeu dingjai youq gwnznamh, “ba” sing ndeu, hwk mbin geij duz roeglaej gwnz gorungz bae. Seizhaenx laj gorungz mbouj miz vunz, daeg hauxseng ndeu daj gizgyae gyaep goenglaux ndeu daengz laj gorungz, de gaemhdawz goenglaux haenx le, baez yaengx fwngz couh mbat fajfwngz ndeu fak hwnjbae, goenglaux haenx lumj lwgyinz nyingz deng nei, sikhaek boemz laemx youq gwnznamh, lij youq gwnznamh niuj bae niuj dauq. Daeg hauxseng neix roengzfwngz baenxneix haenq, baez daih’it couh siengj hoenx dai goenglaux haenx, gou gag naemj, ndawsim daeg hauxseng neix haengjdingh yo miz ywcaq.

Gou mbouj ndaej hawj daeg hauxseng neix caiq roengzfwngz baez daihngeih caeuq baez daihsam. Seizhaenx gou mbouj rox song boux neix dwg bohlwg, fanjcingq miz vunz deng hoenx, gou boux gingjcaz couh aeu guenj.

“Mboujcinj hoenx vunz!” Gou doq hemq doq cung hwnjbae.

Daeg hauxseng neix siengj mbouj daengz, laj gorungz buet daeuj boux gingjcaz najseng ndeu, de ngeizvaeg yaep ndeu. Hoeng goenglaux haenx dauqfanj daj gwnznamh diuq hwnjdaeuj, doq nyoengx daeg hauxseng neix doq hemq naeuz: “Vaiq buet, Cinz Lieng, dwg daeuj gaemh mwngz hane.”

Goenglaux haenx nyoengx Cinz Lieng byaij deuz cib geij mij, raen gou mbouj miz gij eiqsei gaemh Cinz Lieng, couh maeuq roengz gwnznamh gag momo fajnaj bonjfaenh. Seizneix gou cij roxyiuj gyoengqde dwg bohlwg. Goenglaux heuhguh Cinz Cangfeih neix, seiz youqgaenj lij mbouj lumz daeglwg bonjfaenh bw. Cinz Lieng mbouj lau saek di, de ndwn dwk mbouj doengh, cimyawj gou, lumjnaeuz gou mbouj wnggai youq seizneix okdaeuj nei.

Gou byaij gaenh de, guhyiengh dwk hat naeuz: “Vih ma hoenx vunz, boux iq hoenx bouxlaux, mbouj baenz law!”

“De dwg daxboh gou.”

“Daxboh mwngz couh ndaej seizbienh hoenx la? De ciengx mwngz geijlai sinhoj ya.”

Dingqnyi gou naeuz “de ciengx mwngz geijlai sinhoj ya”, Cinz Lieng couh riuhaha lo.

“De ciengx gou?” De cienq ndang najcoh daxboh de, “mwngz ciengx gou ha?” Aen gyaeuj daxboh de sikhaek suk daengz laj gwnzmbaq.

Daj seizhaenx le, youq dieg Yizgyangh, gvendaengz gij vwndiz lumjbaenz bouxlawz ciengx bouxlawz, gou couh mbouj caiq caeuq bouxlawz gangj dem lo. Daj gij biujcingz song bohlwg daeuj yawj, dwg bouxlwg neix ciengx boux vunzlaux haenx lo, gvaiq mbouj ndaej de gamj hoenx daxboh de.

Gou siengj hwnj Mbanjdaepvan dou, gij lwgnyez Mbanjdaepvan dou, mbouj miz saek boux gamj hoenx daxboh bonjfaenh. Siengj daengz Mbanjdaepvan, gou couh maeuq roengzdaeuj, cam Cinz Cangfeih: “Lij in dem lwi?”

“In, in gijmaz, de couh rox cang.” Cinz Lieng youq bangxhenz naeuz.

Gij vah de nyex gou heiq hwnjfoedfoed, gou ndwn hwnjdaeuj: “Daekeiq lo dwg mbouj dwg, mwngz caiq hoenx baez dem sawqsawq, gou sikhaek cug mwngz hwnjdaeuj.”

Seizneix gou roxnyinh bonjfaenh loek lo, gou yienghneix gangjvah, mbouj dwg coinyoengx de bae hoenx vunz ma, gou sikhaek gaijbak naeuz: “Gou seizneix couh cug mwngz hwnjdaeuj.”

（4）