Aen fuengzcug Guxsam youq ndaw mbanj suenq dwg boihfaenh ceiq sang lo. Guxsam baihgwnz miz song daeggo, de baizhangz daihsam, ndigah vunz ndaw mbanj cungj heuh de guh Guxsam.

Guxsam mbouj suenq gyaeundei, mij haj geij sang, ndang hung mbaq luenz, cangq lumj bouxsai nei, miz rengz dangqmaz. Guxsam baenzseiq mbouj haq vunz baenzgya, boux ndeu gvaq saedceij. Gou lij iq seiz cungj roxnyinh gij beizheiq Guxsam seiz ndei seiz rwix.

Vunzmbanj haeujok hix aeu byaij lohrin caeuq lohnamh cij daengz diuz lohnamh gyangmbanj. Lohrin nanz byaij lai, lwgnyez ga dinj byaij mbouj vaiq youh dwgrengz. Mizseiz ngaemgyaeuj gwq byaij gwq byaij, fwt nyouq baihlaeng miz raq heiq bwnhhaex haeu mbin haeuj ndaeng daeuj. Baenq gyaeuj baez yawj, cij raen Guxsam rap song doengj bwnhraemx rimfwdfwd, gij bwnh- raemx sinz youq gwnznamh, caeuq namhfaenx doxgyaux, gij heiq haeu cienz daeuj engq haenq lo, oenq ndaej gou gyaeuj ngunh daraiz yaek rueg bae.

Guxsam ndwn youq gizhaenx, liz gou cij miz fajfwngz yienghhaenx gyae, couh yaek bungq daengz buhvaq gou lo. Song da de cij hujdengdeng cimyawj gou, gou mbouj gamj lawq saekdi, deuzmingh nei buetdeuz lo. Gvaqlaeng caiq bungz Guxsam rap bwnh, gou cungj lumj deuz raq nei buetdeuz.

Seizhaenx cuengqhag le, gou couh bae henz mboq langh hanq caeuq swiq byaek, seizde hix miz bouxwnq caez swiq byaek, langh duzhanq lij ndaej gip gwn gij byaekreuq caeuq byaek non vunz vut. Henz mboq dieggaeb miz geij ndaek rin baiz dwk, coux ndaej sam seiq boux vunz doengzcaez swiq byaek. Lwgnyez fwngz iq swiq byaek mbouj vaiq, Guxsam daeuj doeklaeng mbouj miz dieg swiq couh haenqrengz coi gou:“Mwngz dah iq neix vaiqdi swiq, gou caj baenz buenq ngoenz ndwn ndaej ga cungj in caez lo!” De couhdwg raen gizde cij miz boux lwgnyez gou cij baenzneix gangj.

Guxsam mizseiz simcingz ndei, couh sing hung heuh gou:“Dahvah, daeuj ranz gou guhcaemz gangjgoj!” Dingq daengz gij vah Guxsam, aen sim gou angqfwngfwng, couh riengzlaeng de bae lo. Seizde lwgnyez mbouj miz maz doxgaiq gwn, gwnz bya godumh makndoi cungj gwn nywnx lo, bae ranz Guxsam guhcaemz dwg ngah makdauz ranz de, makdauz gwnz godauz ranz de aenaen youh hung youh hoengz. Guxsam lumjbaenz rox gij simsaeh gou nei, moix baez gou bae de cungj mbaet geij aen hawj gou gwn, lij aeu daehgyau cang geij aen hawj gou daiq hawj daegnuengx gou gwn dem.

Miz baez he dou gyoengq lwgnyez cingq guh’angq doxgyaep, Guxsam laeglemx rag gou caeuq Dahyungz gvaq mbiengj ndeu bae, naeuz:“Sou rox lwi? Mbouj geij nanz couh miz gaijfangginh gwed cungq gvaq mbanj raeuz, duivuj raezrangrang muengh mbouj raen gyaeuj, yamqdin sing yiengj caezcupcup, gij yienghceij haenx daegbied vifung!”

Gij vah Guxsam hawj dou dingq ndaej gikdoengh dangqmaz, aen sim diuqbubbub couh lumj yaek diuq ok rog aek daeuj. Dou bang lwgnyez neix, seizde ceiq gyaez yawj denyingj hoenxciengq lo, gig ndiepgyaez gaij- fangginh. Gou caeuq Dahyungz dox- yaeng gvaq, gij saeh neix gaej lwnh hawj doengzdoih wnq rox gonq, daengz seizde hawj gyoengqde doeksaet baez ndeu. Dou song dahniq ngoenz muengh hwnz muengh cungj mbouj raen miz gaijfangginh daeuj, doek- laeng dou cij rox hwnjdangq lo. Mboujgvaq Guxsam caeuq bouxbing miz di gojgaeq yaek aeu gangj.

Dingqnaeuz, seizhaenx godaih Guxsam bae dang bing, daiq boux canyouj ndeu maranz gvaq. Guxsam gingqyienz mbat da he couh gyaez boux canyouj de lo.

Gaxgonq ranz gungz Guxsam ngamq ndaej haeuj hagdangz doeg song bi saw ndwi, de hix gamj laeglemx sij fung cingzsaenq ndeu hawj boux bing daegmbauq.

Mbouj rox baenzlawz, fung saenq haenx deng cienz okbae, doeklaeng ndaw mbanj bouxboux rox caez, loengh ndaej Guxsam gig najmong. Roxnaeuz Guxsam itcig mbouj lumz boux bing daegmbauq haenx, daj mbatde hwnj, gyoengqvunz cungj mbouj raen Guxsam caeuq daegmbauq lawz damzyoux gvaq. Bouxwnq haeuj ranz guhmoiz, de hix mbouj swt saekdi. Guxsam daj dahsau oiq he bienqbaenz dahsau geq he, doeklaeng caiq hix mbouj naemj haq vunz lo.

Youq lajmbanj, dahsau seiqvunz mbouj haq vunz mbouj miz geijlai boux, loq miz saekdi, mboujlwnh byaij daengz gyawz gyoengqvunz cungj lwnhfoenfoen, vunz ndawranz roxnyinh gig saetnaj. Bohmeh Guxsam raen dahlwg dog neix dailix cungj mbouj naemj baenzgya, baez ndatheiq, couh lingh faen ranz hawj Guxsam gag youq, caih de gag guh gag gwn, mbouj caiq leixlangh.

Boux mehmbwk gag guh hongnaz gig mbouj yungzheih, Guxsam ciengx duz vaizmeh hung he, gag son duzvaiz neix rox cae reih cae naz. Hongnaek hongmbaeu rog ranz ndaw ranz baengh de gag guh caez.

Mboengq mbwnrengx yinx raemx dwk naz, dwg seiz ceiq sinhoj ndeu. Sien ra namhboengz saek congh nou gonq, caiq yinx raemx daeuj, mbouj- nex raemxdah cienz lae roengz congh nou bae, beg sai goengrengz lo. Raemxdah riengz diuz mieng ngutngut ngeujngeuj yiemq roengz lajnamh bae gaeuq le, cij lae haeuj ndaw naz bae. Guxsam miz gaiq naz he caeuq ndaw mbanj goenglaux he doxgyawj. Goenglaux neix beizheiq gaenj youh manz, caeuq vunz doxcomz gangjgoj mbouj daengz faencung couh doxceng ndaej naj hoengz rwz dit, cungj maij euq aeu hingz, de daengz gizlawz, vunz gizde cungj sanq caez.

Mizseiz doengxhaemh lwnz daengz Guxsam dwk raemx naz, gyanghwnz raemxraiz naek youh deng nyungz haeb, Guxsam youq haenznaz guh daengz gyanghwnz le, couh maranz ninz lo. Byawz rox haetlaeng bae yawj, gaiq naz Guxsam cij miz di raemx, cungj dumh mbouj daengz goek gomiuz, gaiq naz goenglaux cix raemx rim fubfab, cungj dumh daengz nyod miuz bae.

Guxsam baez yawj couh rox lo, cam goenglaux vihmaz yienghneix guh? Goenglaux riuhehe naeuz:“Lauheiq lwgnyez dwkbya luenh vat boengz luenh saek dwngj, gou bouxlaux baenzlawz guh gij saeh neix?”Haujlai baez cungj dwg yienghneix, Goenglaux lumj caeuq Guxsam guh yahndoj nei, gaemh mbouj ndaej de. Guxsam hix mbouj miz banhfap.

Seizde boh gou bae baihrog dajgoeng, meh gou couh caeuq Guxsam caez bae dwk raemx naz, baenzneix doengxhaemh mbwn caiq laep hix mbouj lau lo. Miz baez he, Guxsam doiq meh gou naeuz:“Lwg mwngz iq, mwngz maranz buenx gyoengqde ba, gou bang mwngz aeu raemx.” Guh caenh he Guxsam ra aen dieg yietnaiq fwix yaep he caiq dwk raemx.

Guxsam ngamq laepda, couh dingqnyi miz vunz byaij daeuj lo. Boux de cingq dwg goenglaux, cij raen de gwed gvak bae hai dwngjnaz de gonq, caiq bae saek dwngjnaz ranz gou caeuq Guxsam hwnjdaeuj, raemx naz laefoedfoed cienz haeuj gaiq naz de bae lo.

“Goenglaux, baezneix cungj- suenq gaemhdawz mwngz lo, mwngz lij miz maz vah gangj.” Guxsam daj aen gox hongz naeuz. Goenglaux dingq le, naj hoengzfwgfwg, sukndoenq geij yamq, gig vaiq buetdeuz lo. Guxsam riuhaha eu fwen naeuz:

“Vunz dwk raemx haeuj naz,

De lumhlax daeuj aeu,

Gangj ak lai ak raeuh,

Gag guh laeuh simgei.”

Goenglaux dingq le, engq naj- mong, gvaqlaeng caiq hix mbouj gamj luenh guh lo.

Guh sat gij hong reihnaz le, Guxsam couh nyaengqfoedfoed ndaem byaek. Daengx bi ndaw suenbyaek Guxsam cungj dwg heusausau, mwn- cupcup, lij miz lwggwz caeuq mak- yungz giet rim gwnz go, cang aen suenbyaek ndaej gyaeundei dangq- maz.

Guxsam mbat ciengx seiq haj duzmou, lij ciengx haujlai bit gaeq dem. Lajmbanj ciengx doihduz gwn byaek lai, mbouj miz byaekheu lai hix ciengx mbouj baenz.

Byaekheu ndaw suen Guxsam gwn mbouj sat, de couh faen hawj vunzmbanj, lij miz lw couh dawz bae haw gai. Miz vunz riu Guxsam naeuz:“Boux ndeu baenzneix dwgrengz guhmaz?” Guxsam dingq le, cij riuriu, mbouj dap vah.

Vunz lix gwnzbiengz, cungj miz ngoenz ndei ngoenz yak, Guxsam ndaej 60 bi lo, bi’gvaq ngamq gvaq ngoenzseng mbouj geij nanz, de couh baenz binghnaek lo.

Guxsam ninz youq gwnz congz, naj heu ndang unq, de heuh vunz daj ndaw gvihbuh hung dawz aen daehnaeng ndaem iq ndeu okdaeuj, ndawde miz bonj cunzcez ndeu, cunz miz 9 fanh maenz.

Guxsam sing naiqniekniek doiq gyoengqvunz naeuz:“Gou seiqneix daeuj lajmbwn, guh mbouj ndaej maz, hix mbouj miz maz, cij miz gij doxgaiq seng mbouj daiq daeuj dai mbouj daiq bae neix. Gou seiq neix mbouj rox saw, roxnyinh gig dwgrengz, sou aeu 3 fanh maenz bae bang gij hagseng ndaw ranz gungzhoj; henz dah diuz mieng yinx raemx dwk naz gaenq dauqcawq vaih lo, vunz byaij gvaqbae cungj byaij mbouj onj, sou aeu 3 fanh maenz bae guh miengraemx; lij miz, mbanj raeuz seizneix yienznaeuz lohnamh gaenq bienqbaenz loh suijniz bingzrwd seuqsak lo, hoeng mbouj miz lohdaeng, doengxhaemh byaij loh gig mbouj fuengbienh, sou dawz 3 fanh bae guh lohdaeng.”

Guxsam gangj sat, aen gyaeuj mbit gvaq mbiengj he bae, ciengx- lwenx laep da lo.