Daxboh gou naeuz: “Mwngz ra vunz loeng luba? Ranz gou mbouj miz boux vunz neix.” Daxboh cojgvaq gou, de itcig cungj mbouj rox de miz daeglwg rox sij sei ndeu, engqgya mbouj rox daeglwg de lij miz lingh gij mingzcoh heuhguh “Vangz Dujlu”. Cinz Naijgvei hoiz hoenz gvaqdaeuj lo, sing sang hemq gij mingzcoh gou: “Veiz Cunghsiengz, Veiz Cunghsiengz youq mbouj youq?” “De gaenq haujlai nanz mbouj ma ranz lo.” Daxboh simvueng dwk yawj Cinz Naijgvei, lauheiq Cinz Naijgvei ciep roengzdaeuj gangj ok gijmaz vah doiq ranz dou mbouj leih.

Cinz Naijgvei rox bonjfaenh hwk deng vunzlaux lo, couh fwt riuhaha hwnjdaeuj. “Gou dwg daeuj ciep Veiz Cunghsiengz hane.” De gejnaeuz.

“Ciep de guh gijmaz?” Daxboh gou cam.

“Ciep de bae bouj mienhsawq ho, raeuz hawj de aen seizgei bouj mienhsawq ndeu.” Gij vah Cinz Naijgvei ngamq dingz, song fwngz daxboh gou sikhaek gaemdawz gwnz mbaq Cinz Naijgvei, de lau bonjfaenh baez ngeizvaeg le, gij siusik ndei yienghneix couh daj ndawfwngz de roh deuz. Cieplaeng gij raemxda caeuq mug daxboh gou couh doek roengzdaeuj lo, “a——” de swenj hwnjdaeuj, lumj bouxvunz souhcaenh veiheiq le, doeklaeng aeundaej vuenyungz nei, de boemz youq gwnz mbaq Cinz Naijgvei, raemxda swiq cingh gij buh Cinz Naijgvei bae vengq ndeu lo. Daxmeh gou vaiqdi rag daxboh deuz, naeuz: “Baujminz, lij mbouj vaiqdi bae gyaep Cunghsiengz dauqma.” Yienghneix, daxboh gou naengh hwnj aen mozdozceh samloek Cinz Naijgvei, bae gyaep gou gaenq youq gwnz roen、yaek bienqbaenz boux baujanh Gvangjdungh neix.

Youq gwnz roen, daxboh gou gangjvah mbouj dingz, mozdozceh bae foenfoen, de gangj gijmaz Cinz Naijgvei swhyienz dingq mbouj nyi. Dang aen cisamloek Cinz Naijgvei yiengj ci sing ndeu vang youq baihnaj banci raeuz seiz, gou yawjraen daxboh gou daj gwnz cidouj mozdozceh samloek ndwn hwnjdaeuj, de angq ndaej naj cungj bienqyiengh liux. Yawj gij yienghceij de, aen gyaeuj gou vaeng sing ndeu, gou rox gou ndaej gouq lo.

Gou daj aen banci yiengj gij go coeg rwz haenx buetdeuz, naengh hwnj gwnz mozdozceh samloek cungj dwg naezboengz Cinz Naijgvei.

Youq gwnz roen, daxboh gou riuhehe mboujdingz, seizbienh Cinz Naijgvei gangj gijmaz, de cungj hehe riu dwk. Gou naemj de aiq baenz ciuhvunz cungj geiq ndaej ngoenzneix, aenvih ngoenzneix doiq ranz dou daeuj gangj, dwg gwnzmbwn doek bingjnoh、daengngoenz daj baihsae swnghwnj、raemx yiengq diegsang lae.

Boh, mwngz couh riu ba.

Doeklaeng Cinz Naijgvei doiq gou naeuz: “Vangz Dujlu, mbouj, Veiz Cunghsiengz, mwngz rox gou vihmaz buet bae gouz ndaw giz hawj mwngz bouj mienhsawq lwi?” Gou fanjying daih’it couh dwg caet bet cib hot seiz gou lingzniemh lo. Hoeng Cinz Naijgvei dauqfanj naeuz mbouj dwg, de naeuz dwg aenvih gwnz sawgaggawj gou lauxlaux saedsaed mingzmingz begbeg dawz gij saeh cawqfad geiqloekhung gou hix sij hwnjbae lo. De lij naeuz: “Seizneix bae gizlawz ra bouxvunz gagnyinh gij diemjuq bonjfaenh dem? Moix bouxvunz cungj naeuz bonjfaenh ndei lumj saenzsien nei. Gou vih gienh saeh neix buet bae hagdangz sou cazrox mwngz vihmaz deng geiqloekhung, youq ndaw diengzhaex luenh sij cih baenzlai vunz, couh mwngz boux ndeu gagnyinh, gou couh haengj doengh bouxvunz yienghneix. Yizgyangh raeuz, aeu boux- vunz lumj mwngz yienghneix.” “Dangyienz, mwngz rox sij sei hix gig youqgaenj, mboujgvaq, daengz Yizgyangh le, mwngz gaej luenh sij cih lubw, gij hong mwngz couh dwg liebbyaij, mbouj dwg sij sei.” De doeklaeng naeuz.

Liebbyaij Codaeuz

Gaxgonq gou mboujcaengz ndeindei cazyawj gvaq Yizgyangh, dwg aenvih gij aplig ra hong hawj gou mbouj haeujsim daengz gij yienghceij de, seizneix, gij vwndiz gwn haeux gou ndaej gaijgez le, ngauq rin hung ndaw sim bohmeh gou doek roengz gwnznamh lo, gou cij yungh gij ndangfaenh bouxcawj sijsaeq cazyawj aen dieg iq gou henhoh neix. Doeklaeng gou roxnyinh lwgda gou mizdi canggyaj he. Gizsaed Yizgyangh mbouj yungh cienmonz bae cazyawj, cij aeu siengjsiengj Mbanj- daepvan dou couh roxyiuj lo, siengjsiengj song fajnaj daxboh daxmeh gou couh roxyiuj lo.

Aen loekci mozdozceh deng diuz roenbya nanz byaij ranz gou ndaemq vaih haenx, couh gveng youq gok ciengz bangunghsiz Yizgyangh Baicuzsoj, Cinz Naijgvei mbouj cij baez ndeu doiq gou naeuz: “Diuz roen mbanj sou dwg baenzlawz coih ha?” Gizsaed gij roen Yizgyangh beij Mbanjdaepvan dou hix ndei mbouj daengz gizlawz bae, seiqcawq cungj dwg gij roen lumj Mbanjdaepvan dou yienghhaenx. Gwnz gai hung hongh iq Yizgyangh cungj dwg fajnaj lumj daxboh daxmeh gou yienghhaenx, yawjyawj gyoengqde, gou couh roxyiuj bonjfaenh seizheiq miz geijlai ndei, daxboh daxmeh gou seizheiq miz geijlai ndei lo. Gou baez dem baez youq ndaw sim gag gangj: “Docih Cinz Naijgvei.”

Cinz Naijgvei naeuz: “Mwngz ngamq daeuj, aeu vaiqdi sug cingzgvang, bonjlaiz gou wnggai gejnaeuz gij cingzgvang gizneix hawj mwngz nyi, hoeng gou siengj mwngz lij dwg gag bae cazrox ba, yienghneix mwngz doiq Yizgyangh yaenqsiengq cij laeg. Seizneix ndaw uk mwngz lumj mbaw ceijhau ndeu nei, mwngz aeu vaiqdi youq mbaw ceijhau neix veh ok fuk doz ndeu. Mwngz aeu lai byaijdoengh byaijdoengh.”

Yienghneix, gou couh hainduj ceiq codaeuz liebbyaij lo.

Mwngz mbouj rox lo, gou dwg geijlai haengjheiq dauq buhdaenj gwnzndang gou ho, gyoengq gingjcaz Baekging hix dwg daenj cungj buh yienghneix, gyoengq gingjcaz Namzningz hix dwg daenj cungj buh yienghneix, gyoengq gingjcaz yienhsingz Duh’anh hix dwg daenj cungj buh yienghneix, gingjcaz Yizgyangh dou hix dwg daenj cungj buh yienghneix, cij miz daenj buhgingjcaz le, gou cijndaej gvaq gij saedceij caeuq vunz ndaw singz mbouj doxca haenx; cij miz daenj buhgingjcaz le, gou yawj hwnjdaeuj cij mbouj lumj boux lwgnyez Mbanjdaepvan, mwh byaij roen cijndaej leix gaeuq gangj gok. Doenghgij ndwenngoenz youq Yizgyangh haenx, gou cij daenj buhgingjcaz, couhdwg seiz gwn haeux, gou hix daenj buhgingjcaz. Yienghneix, haujlai vunz Yizgyangh couh yawjraen cungj cingzgingj neix: Boux gingjcaz hauxseng daengx ngoenz daenj buhgingjcaz ndeu, haetromh couh byaij youq gwnz gai Yizgyangh, de sien daengz cin cwngfuj bae, yawjyawj gizhaenx haemhlwenz miz gijmaz saeh, yienzhaeuh couh daengz caizcwngsoj、gunghsanghsoj、suivusoj、sinyungse、gunghsiuhse、veiswnghyen、cunghyoz、siujyoz daengj danhvei cienq gvaengx ndeu, byaij gvaengx neix liux le, banhaet couh yaek gvaqbae lo, gwn haeuxringz gvaq le, de cij byaij youq gwnz gai vunz comzyouq haenx.

Doenghgij vunz ndaw cin cwngfuj、gungh- sanghsoj、suivusoj daengj danhvei, gyoengqde coengzlaiz mbouj dawzhaeujsim gou, gyoengqde ciengzseiz buenq gangjriu dwk doiq gou naeuz: “Cinz Naijgvei daengz gizlawz bae la, baenzlawz mbouj raen de? Mwngz lienz cungqdinj cungj mbouj miz, mwngz liebbyaij gijmaz? Cawz gij buh gwnz ndang mwngz le, mbouj raen mwngz miz gijmaz bonjsaeh, oksaeh seiz, mwngz yaek baenzlawz guh? Mwngz cungj mbouj ndaej aeu gonjcien caeuq vunzvaih doxbuek ba?”

Gou mbouj miz cungqdinj, gyoengqde gangj daengz gizin gou bae lo, boux gingjcaz moq ndeu dwg mbouj ndaej raek cungq bw. Youq dangqnaj doengh cungj vunz neix, mwngz mbouj ndaej caeuq gyoengqde naeuz, gou rox sij sei ba, rox sij sei doengh cungj vah neix, gou cijndaej caeuq sojcangj Cinz Naijgvei gangj, danghnaeuz caeuq gyoengqde gangj ne, gyoengqde haengjdingh riu ndaej faenz cungj doek liux bae, caemhcaiq yawj mbouj hwnj gou dem. （3）