Ciet Faenlungz Mauznanzcuz (caemh heuh “ciet miuh”) dwg Mauznanzcuz aen ciet ceiq gaeuqgeq ceiq hwnghoengh haenx. Aen ciet neix itbuen cungj banh song daengz sam ngoenz. Moix bi daengz ciet hahceiq le ngoenz duzlungz daih’it gonqlaeng youq “miuh Samgyaiq” banh. Cujyau dwg doenggvaq banh aen yizsiz “daem vaiz” caeq saenz daeuj bauj daengx bi dajndaem ndei, soucingz ndaej lai.

Vihmaz heuqguh ciet faenlungz ne? Yienzlaiz, gyoengqvunz Mauz- nanz guhhong nanz le, couh fatyienh mbouj caengz daengz ngoenz haenx ni, fwnraemx yinz dangqmaz, hoeng gvaqlaeng cix yaep fwn yaep rengx, yienghneix couh yingjyangj okmiuz majhwnj caeuq gij soucingz baenz bi lo. Vunzlaux Mauznanzcuz couh nyinhnaeuz doengh ngoenz haenx dwg ngoenz “lungz raemx doxbiek”, ndigah couh nyinhnaeuz ngoenz haenx aeu gaj vaiz bae caeq saenz, mbaenjgouz baenz bi fwn raemx ndaej yinz, gomiuz doenghduz maj ndaej baenz.

Saenz Samgyaiq dwg boux guenj yw caeuq guenj vaiz haenx, caemh dwg boux saenz Mauznanzcuz ceiq coengzbaiq haenx. Cienznaeuz, de ceih ndaej Duzbyaj gvaq, Lungz- vuengz caeuq Duzbyaj youh guh boux guenj rumz fwn byajraez haenx. Baenzneix gyoengqvunz couh youq baihnaj miuh de gaj vaiz daeuj caeq boux saenz ciengx vaizbyaek Mauznanzcuz neix. Daengz ciet song ngoenz gonq, gyoengqvunz dangdieg couh doxcomz banh aen hozdung “nyoengx vaiz” caeq miuh haenx. Gyoengq “saefangz” daenj buhfap naj daep mauhngeg youq baihnaj “miuh Samgyaiq” guh “fap”, bouxboux gwnz hwet cungj beq aen gyongraez aeu naengvaiz guhbaenz haenx, fwngz gaem diuz faexcuk ndeu, doq roq gyong doq diuq foux. Ngoenzlaeng, gyoengq “saefangz” couh banh aen yizsiz “daem vaiz” haenx , aeu rieng vaiz、 gyaeuj vaiz、 lwed vaiz caeuq seiq gaiq ga vaiz haenx caeq saenz Samgyaiq, dungx- saej cix hawj bouxdauh caeuq boux cujciz haenx aeu ma gwn. Nohvaiz mbangj faen hawj vunzlai, mbangj cix dawz bae gwnzhaw gai.

Linghvaih, youq ngoenz “faen- lungz” neix, lwgmbwk baehaq haenx couh daiq lwg ma ranzmeh “gwn miuh”， sim’angq dangqmaz. Boux- cawj couh loengh haeuxnaengj haj saek, naengj nohmou luj mba, gaj gaeq, gaj bit daeuj caeqbaiq coj- goeng, saenz Samgyaiq、Yahvuengz、 Cauqvuengz、 Yahdojdeih daengj. Gyoengqvunz vanzlij aeu di gomiuz baij youq baihnaj Yahdojdeih, mbaenjgouz dajndaem ndaej baenz, soucingz ndaej lai. “Ngux yied faenlungz dwg duenngux, beixnuengx doengz daeuj caeq Lungzvuengz.” Daegmbauq dahsau cix youq ngoenz- neix eu fwen cienzcingz, daegmbauq soengq gyaepbangx va, dahsau cix soengq haisiuqva, ciengzmienh nauhyied raixcaix.