Bineix 5 nyied 9 hauh daengz 28 hauh, Cunggoz Minzcuz Yijvwnz Fanhyiz Giz ciqdiuh vunz bae Baekging guh hong Sawcuengh fanhoiz daengx guek song hoih, danvih couh baij gou bae lo. Gij hong neix dwg youq seiz fuengzgaemh binghraq cingqciengzvaq haenx hainduj. Gou daih’it mbat caenndang ginglig gij hong fanhoiz daengx guek song hoih, youq mwhhaenx youh bungzdaengz ranz gou ok saeh, gij ginglig haenx lumj ciengz “haigienj gaujsi” ndeu nei.

“Haigienj Gaujsi” Cwngci

Yungh Sawcuengh, daegbied dwg youqlaeng ciengzhab youqgaenj haenx yungh Sawcuengh dwg gij gihbwnj gienzleih aendangj caeuq guekgya hawj vunz Bouxcuengh raeuz. Gijneix caemh dwg aen dauhleix minzcuz doxgiet wnggai raen miz haenx, baijok gyoengqvunz Bouxcuengh raeuz yiengjsouh “Gak aen minzcuz cungj miz gij swyouz sawjyungh caeuq hwngfat gij vah saw bonjfaenh” fapguek hawj haenx, gij cwngci yiyi gig mingzyienj.

Sawcuengh fanhoiz daengx guek song hoih, couhdwg dawz song hoih gij gauj Sawgun cujyau haenx hoiz baenz Sawcuengh, dawz gij sing’yaem dem gij cingsaenz song hoih gibseiz cienz hawj gyoengq daibyauj veijyenz youq Baekging camgya song hoih haenx caeuq vunzlai Bouxcuengh. Ndigah, bouxhoiz Sawcuengh daengx guek song hoih couhdwg boux bu roen dap giuz haenx, roxnaeuz fouruz.

Sojlaiz, fanhoiz Sawcuengh daengx guek song hoih dwg aen cwngci yinvu gig miznaj caemhcaiq dwg gij hong gig dwgrengz haenx, cix aeu bouxhoiz roengzsim caeuq roengz- rengz raixcaix, cij ndaej baujcingq gij hong fanhoiz mbouj miz loek.

1 nyied, danvih yaek baij gou bae camgya gij hong neix, cam gou bae mbouj bae. Bae hixnaeuz mbouj bae? Ciengz “haigienj gaujsi” cwngci caenh miz diuz bietdap daez ndeu baij youq baihnaj gou. Gaxgonq gou cix dingq gyoengq banlaux gangj gvaq, gij hong neix aeu gij vunz ciennieb suijbingz sang he, seizgan fanhoiz gaenj, yaek aeu hwnzngoenz buek- mingh hoenx, ganhoj yaekdai. Hoeng gou hix roxnyinh aen yinvu neix gig miznaj. Gou dwg dangjyenz, dwg Bouxcuengh, dwg boux guh hongsaw he, rap gij hong neix hwnjdaeuj dwg gij cwzyin gou mbouj ndaej doi haenx.

“Haigienj Gaujsi” Ndawranz

5 nyied 9 hauh, gou rieng daengx guek song hoih misuhcuj Minzcuz Yijvwnz Fanhyizcuj Sawcuengh fanhoiz siujcuj haeuj diegcap bae. Banringzgvaq 5 diemj geij, aenvih gij hong yaek aeu baujmaed, soujgih raeuz cungj deng gyau hwnj bae funglouz. Mbouj caengz funglouz soujgih seiz, gou youq veizsin louz vah hawj yah gou, louz aen hauhmax gaenjgip lienzhaeh he hawj de.

Doengxhaemh 10 diemj geij, yah gou daj aen hauhmax gaenjgip de hawj gou, naeuz gou nyi——daxmeh gou gvaqseiq lo. Dangseiz gou gag rox- nyinh lumj nditndat ngaiz byajben nei, gou gipgip muengzmuengz doenggvaq diuz roen gaenjgip lienzhaeh haenx daj denva ma ranz. Yienznaeuz miz daegnuengx dahnuengx banh gij saeh daxmeh, hoeng ndawsim gou vanzlij mbouj onj geijlai.

Cung hauq mbouj ndaej goq caez. Seizneix baihnaj gou miz song diuz roen: Bae ma caenhhauq? Roxnaeuz louz roengzdaeuj caenhcung, giensouj gangjvei?

Gijneix dwg ciengz “haigienj gaujsi” cij miz diuz riegleh daez ndeu, cij ndaej ngeih leh it. Gou, sienj le caenhcung, giensouj gangjvei.

“Haigienj Gaujsi” Fuengz- gaemh Binghraq

Aenvih roeb daengz ciengz binghraq neix, bineix daengx guek song hoih doilaeng daengz 5 nyied ndawnyieb cij ciuhai, gij hong fanhoiz song hoih caemh doilaeng lo. Daj binghraq bauqfat daengz daengx guek song hoih swnghleih haisat, gou caemh ginglig le ciengz “haigienj gaujsi” fuengzgaemh binghraq ndeu.

Daj binghraq bauqfat daengz 5 nyied 9 hauh, gou caeuq ciqdiuh conhgyah wnq ityiengh, cawz moix ngoenz aenqseiz youq ndaw Veizsin- gin “Ciqdiuh conhgyah moix ngoenz fuengzgaemh binghraq cingzgvang” baugau ndangdaej cingzgvang, yaek bae Baekging seiz, vanzlij hawj dou guh song baez hwzsonh genjcaz. Genjcaz doenggvaq le, couh diep mbaw ciemheu ndeu youq gwnz cingqsaenfaenh cij ndaej okroen. Youqlaeng diegcap, ngoenzngoenz fuengzgaemh binghraq bienqbaenz saehcingz ciengzgvi. Cawz ok dou yaek daep goujcau, faen seiz gwn haeux, haeuj ok fandangz aeu yungh raemxsiudoeg uet fwngz, diegnaengh gwn haeux hix doxgek itdingh gyae, lij aeu swhgeij moix ngoenz aenqseiz damq dijvwnh, gyanghaet 10 diemj caeuq gyanghaemh 8 diemj gak bauq baez ndeu.

Aenvih binghraq, dieg donlen ndawrug diegcap binaengz cungj hai haenx， seizneix cungj gven dou liux lo. Gij ndwenngoenz bouxhoiz raeuz caenh miz sam gaiq saeh doxlwnz bae dauq: Youq suzse guhhong yietbaeg, bae fandangz gwn haeux, bae rogrug guhcaemz. Mbouj miz soujgih, mbouj miz muengx, gij swnghhoz raeuz loq miz di dandiuh caeuq nyapmbwq he.

Ciengz “haigienj gaujsi” fuengzgaemh binghraq cingqciengzvaq moix ngoenz cungj guh. De dwg diuz buenqduenh daez “mbouj deng cix loek” ndeu: Daj gij hingzveiz gidij bonjfaenh baeznaengz guh haenx bae guh buenqduenh. Gou caeuq bouxhoiz wnq ityiengh souj gveihcwz, dawz ndaej yiemz, sijsaeq, cujdung boiqhab fuengzgaemh binghraq, genhciz caiqlij hawj de bienqbaenz aen sibgvenq ndeu, caemh suenq dwg raeuz gyau le faenh dapgienj habgek ndeu.

“Haigienj Gaujsi” Daj Sawgun Daengz Sawcuengh

Mbouj miz soujgih, mbouj miz muengx, caenh miz bizgibwnj dennauj caeuq saw hongdawz, doiq bouxhoiz daeuj gangj, daj Sawgun daengz Sawcuengh couh lumj ciengz “haigienj gaujsi” ndeu nei. Ciengz gaujsi neix, cawz ok boux vunz dog, lij yaek aeu duenzdoih; cawz ok haenqrengz, lij aeu miz geiqmaeuz; cawz ok haicei, lij aeu miz maenhgaenj.

5 nyied 9 hauh, ngamq haeuj bae ngoenz haenx gyanghaemh, cujcangj Lanz Ligoz couh heuh gyoengq ciqdiuh conhgyah doxcomz haihoih, dingh le goekdiuh, fanfoek giengzdiuh fanhoiz dwg hoiz “eiqsei”, gaijbienq gij fuengfap gaxgonq yaek aeu cih cih cungj miz doiqwngq haenx, gaem dawz gij gvanhgen Vahcuengh—yijfaz, ra cinj gij biujdap fuengsik Vahcuengh, hawj gij yijfaz engq hab sibgvenq Vahcuengh, hawj de engq doengsug.

5 nyied 10 hauh, youq diegcap ngoenz daihngeih, bi 2020 daengx guek song hoih misuhcu minzcuz yijvwnz fanhyizcuj fucujcangj Lij Silen, Sawcuengh fanhoiz siujcuj cujcangj Lanz Ligoz heuh gyoengq boux Sawcuengh fanhoiz doxcomz hwnjdaeuj gangjvah, cienmonz dauj- lun doenghgij sawloih caeuq sinhgvan feiyenz doxgven haenx gij hoizfap he, dingh le gij Sawcuengh hoizfap lumjbaenz “新冠肺炎、疫情、病情” daengj swz doxgven de.

Ndaej! Dingh le gij banhfap fanhoiz, dingh le gij swz seizhwng caeuq swz cungdenj le, bouxhoiz raeuz ndawsim miz soq le, couh ndaej naemj gonq menh guh, ciuq banhfap banh saeh lo.

Gyaban Baenz Gvenq Bae

Gij hong fanhoiz nyaengqyatyat, gingciengz gyaban. Miz mbat dwg gyanghaemh 10 diemj geij, vwnz- gencuj fat gaujgen daeuj: Moix boux fanhoiz 4 yieb gauj Sawgun, iugouz dou ngoenz daihngeih banringz 11 diemj gaxgonq gyau hwnjbae. Yenz- gauj yieb ndeu aiq miz 700 cihsaw, 4 yieb aiq miz 2800 cih. Haemhde, gou gyaban fanhoiz daengz ngoenz daih- ngeih gyanghwnz 4 diemj cij guh sat. 4 diemj geij cij ninz, 7 diemj geij ciuqciengz hwnqdaeuj hainduj guh hong lo.

Cawz fanhoiz Vahgun baenz Vahcuengh ok, bouxhoiz dou dingz- lai cungj yaek guh gij hong cosaemj Sawcuengh, ngeihsaemj, samsaemj, doengjgauj caeuq fatbaiz daengj. Yinvu lai, hong lai, gyahwnj yinvu gaenj, seizgan gip, ndigah ndaw 20 ngoenz neix, gyaban, gingciengz daengxhwnz mbouj ninz.

Vih “Hoiz”, Vunz Bienq Ho

Song hoih vwnzgen cujyau dwg faenzcieng cwngci, dwg Vahsawmienh hamq lai, cienmiz mingzswz caeuq hangzvah sawjyungh gig gvangqlangh, yungh swz cinj cix gveihfan, cingcuj mingzbeg, nanz gvaq fanhoiz gij faenzcieng wnq bae. Nanz couh nanz youq aeu lijgaij ndaej cinj gij eiqsei yenzvwnz, fanhoiz ndaej cinj.

Lijgaij yenzvwnz, daj lijgaij sawloih hainduj, yienghneix couh aeu gaenx fan sawloih. Lumjbaenz daih’it mbat bungzdaengz “竞争” aen sawloih neix, baez yawj he lumjbaenz roxnaeuz gij eiqsei de lo, mbouj caz sawloih, couh youq ndawuk ra aen sawloih ndeu bae doiwngq, miz “gingcwngh, ceng, doxciengj, doxdax” daengj. Danghnaeuz yaemhoiz baenz “ging- cwngh”, lumjbaenz caemh ndaej, gizsaed dwg ndojgik; beijswq hoiz baenz “ceng”(争), lumjbaenz haemq ndei gvaq yaemhoiz, hoeng mbouj miz gij feihdauh “caeuq vunz” doxceng lo; langh hoiz baenz “doxciengj”(互抢), “doxdax”(比赛), lumjbaenz eiqsei cungj ca mbouj geijlai, hoeng baez doeg seiz caiq noix di feihdauh ndeu. Yungh cungj lawz baenz ni? Gou dawz mbouj ndaej roengz cawjeiq, gietdingh sien loengh gij eiqsei de cinj gonq, menh bae caz sawloih Vahgun——“Beijlumj vih gij leih’ik bonjfaenh couh caeuq vunz ceng hingz”. Daj ndaw sawloih gou roxnyinh aen sawloih neix gij haedsim eiqsei dwg “caeuq vunz ceng hingz”. Hoeng mbouj caengz sat, vanzlij aeu daj ndaw Vahcuengh ra aen sawloih caeuq gij eiqsei ceiq doxgaenh ndeu. Gou youh gaemj gyaeuj ngeixloekloek, doek- laeng gou cij ngeix daengz “beijak” (比厉害、比强), aen swz neix haemq depgaenh gij eiqsei nyuenz miz, gij Vahcuengh biujdap engq cingq.

Yienznaeuz Cuengh——Gun fanhoiz song hoih caemh miz aen ronjgen cinaengz fanhoiz ndeu, hoeng gij vah ndaw yijliugu Sawcuengh de mbouj gaeuq lai, fanhoiz mbouj gaeuq cinj. Sojlaiz Cuengh——Gun fanhoiz cujyau baengh bouxhoiz daeuj guh.

Ndigah, gaeu sim gaeu saej, naebsim bae guh, seiz guhloenloen, seiz gaeu rwz gaeu naj, haenx couh- dwg gij yiengh bouxhoiz dou lo. Mbat ginglig neix youq cwngci fuengmienh dwg diuz daez bietdap, youq gyadingz fuengmienh dwg diuz daez riegleh, youq fuengzgaemh binghraq fueng- mienh dwg diuz daez buenqduenh, youq yezvu gunghcoz fuengmienh dwg diuz daez “haigienj gaujsi” lwnh- gangj.

Gou gaenq dap liux lo, ndaej gyau gienj lo.