Dingqnaeuz mwhgonq miz boux siucaiz ndeu, coh de heuhguh Cuh Yaucungh. De daj iq couh coengmingz, youh gaenx hag, daengz seiz mbauqcoz, dungxcaiz gaenq rim dungx rim uk. De ndaej 20 bi bihaenx, bae Baekging gaujsi, gauj ndaej cangh- yienz. Vuengzdaeq raen de mboujdan miz dungx- caiz, caemhcaiq mbauqndei, vunz hix lauxsaed, couh dawz de guh lwggwiz.

Gauj ndaej canghyienz caemhcaiq ndaej guh fumaj, song gienh saehndei caemh daeuj, Cuh Yaucungh sim’angq raixcaix. Lwg bouxhoj ndaej miz cungj saehndei neix, de roxnyinh miznaj dangqmaz. Ciuq gij gvenqlaeh, Cuh Yaucungh daenj buhvaq bouxcanghyienz daenj haenx, bakaek raek duj vahoengz baengzcouz, gwih max dauq ranzmbanj.

Yaek hwnj roenz seiz, de dawz cingzgvang ndawranz lwnh vuengzdaeq nyi. Cuh Yaucungh ndaej 10 bi bide, daxboh de baenzbingh dai bae. Daxmeh boux vunz dog, guh boh youh guh meh ciengx de majhung, son de guh vunz, ngoenzneix de baenzvunz lo. Baenzlai bi gvaqdaeuj, song mehlwg neix doxing doxbaengh gvaq ndwenngoenz, gwn gvaq haujlai haemzhoj, souh gvaq haujlai vei, deng vunz hangz gvaq, hix deng vunz yaeuh gvaq. Daxmeh lumj go faex hung nei, vih de dangj fwn dangj rumz, hawj de miz giz ing. Daxmeh vih de guh maiq ciuh vunz ndeu, ndiep de、gyaez de、ganq de, daxmeh sinhoj lai lo, aencingz naekna daxmeh de ciengxlwenx mbouj lumz.

De cingjgouz vuengzdaeq hawj daxmeh laeb aen baizfangh ndangseuq ndeu, siengj yienghneix daeuj ndaejgeiq gij aencingz daxmeh. Vuengzdaeq dingq gij goj ranz de le, nyinhnaeuz daxmeh de simndei simsoh, yienznaeuz dwg bouxvunz bingz- ciengz, hoeng, suenq dwg boux vunz hungmbwk ndeu, couh doengzeiq lo. Seizhaenx, byawz ndaej vuengzdaeq laeb baizfangh hawj, dwg gienh saeh gig miznaj. Gaxgonq song gienh saehndei, seizneix youh dem gienh ndeu, bienqbaenz sam gienh saehndei, Cuh Yaucungh haengjheiq dangqmaz.

De rimhoz rim’eiq gwih max ma ranzmbanj. Youq gwnz roen, de bak riu naj riu, najhai lumj duj va hai angj nei, ndawsim gag ngeix: Danghnaeuz daxmeh rox gij saehndei neix, de mbouj rox angq baenzlawz bae. De seiz mbouj seiz aeu bienmax fad max mbat ndeu, gyaep max vaiqdi ganjroen.

Dauq daengz ranz le, Cuh Yaucungh dawz saehndei gienh doek gienh lwnh daxmeh nyi. Gangj daengz gauj ndaej canghyienz caeuq guh lwggwiz vuengzdaeq song gienh saehndei neix, daxmeh gig sim’angq, gikdoengh ndaej raemxda lae okdaeuj, naeuz:“Nditraeuj dauqdaej ciuq daengz ndang raeuz lo, lwg gou dauqdaej ak gvaq vunz lo. Gij haemz、gij hoj、gij vei raeuz gwn gvaq, dauqdaej mbouj aeu caiq souh lo, doeklaeng ndaej gvaq saedceij ndei, raeuz aeu ndeindei insik gijneix nw. Lwg ha, ngoenzlaeng mwngz guh hak mboujlwnh dwg gangjvah roxnaeuz guhsaeh aeu doiq ndaej gvaq liengzsim swhgeij bw, gaej guh bouxhak simrwix nw!”

Cuh Yaucungh dingq le ngaekngaek gyaeuj naeuz:“Meh, lij miz gienh saehndei ndeu.” Gangj daengz neix, de cienh’eiq dingz bak mbouj gangj.

Daxmeh doq cam lij miz maz saeh’angq dem, heuh de vaiqdi gangj. Cuh Yaucungh naeuz:“Meh, mwngz vih gou guh maiq baenz ciuh vunz, gwn haemz lo. Vih neix, gou gouz vuengzdaeq hawj mwngz laeb aen baizfangh ndangseuq ndeu, vuengzdaeq doengzeiq lo.” Gangj sat, de riunyumj yawj daxmeh.

Haxbaenh daxmeh angqvauvau, naj hai angj, baez ndaejnyi yaek laeb baizfangh hawj de, saenzcingz fwt bienq ndaej mbouj onj lo, caemhcaiq najbyak nyaeuq comz.

Cuh Yaucungh raen le gig geizheih, cam:“Meh, ndang mwngz mbouj cwxcaih la?”

Daxmeh danq gaemz heiq ndeu, naeuz:“Meh ciengx mwngz hung, seizneix mwngz baenzvunz lo, mbouj yungh meh cabheiq lo. Mbatneix, meh siengj gvaq gij ndwenngoenz swhgeij. Gangj lauxsaed, hix mbouj lau mwngz riu, gou caeuq lauxsae mwngz song sim doxhap, lauxsae mwngz gaenq caeuq gou naeuz gvaq lai baez, muengh gou haq hawj de. Hoeng, meh lau mwngz gwn vei, cungj mbouj nyienh haq. Daj seizneix hwnj, gou mbouj maqmuengh gijwnq, couh siengj haq hawj de, caeuq de doxing doxgoq gvaq gij ndwenngoenz dou.”

Cuh Yaucungh baez dingq daxmeh baenzneix gangj, doq lumj deng byaj bag nei, diuq hwnjdaeuj, saeknaj hix bienq heu caez. Yaepyet, “boeb” sing ndeu, de fwt gvihyouq dangqnaj daxmeh, naeuz:“Meh, mwngz mbouj ndaej caiq haq vunz bw, mwngz yienghneix guh, naj gou dawz bae gyawz coq? Caiqnaeuz, mwngz caiq haq vunz, gou couhdwg yaeuh vuengzdaeq lo, neix dwg coih naek, deng raemj gyaeuj bae bw!” Cuh Yaucungh song da sohrwdrwd cim daxmeh, maqmuengh daxmeh nyiengh.

Daxmeh gej naeuz:“Lauxsae mwngz dwg boux vunz simndei ndeu. Lai bi gvaqdaeuj, de mboujdan son mwngz caizhag, lij laeglemx bang raeuz haujlai. Goj baenzneix gangj, mbouj miz de couh mbouj miz mwngz ngoenzneix. Ceiq youqgaenj dwg, de deq gou daengz seizneix lij caengz baenzranz, bouxmoiz gaisau gvaq haujlai dahsau hawj de, de cungj mbouj nyienh, faenh cingzngeih neix nanz ndaej ha! Meh mbouj citgeiz aeu baizfangh, cij siengj caeuq de gvaq ndwenngoenz.”

Mehlwg cungj mbouj rox baenzlawz guh lo. Gvaq canh he, daxmeh danq gaemz heiq raezrangrang ndeu, naeuz:“Hawj mbwn daeuj dingh ba!” Gangj sat, de swnhfwngz duet geu dox gwnz ndang bae, yienh hawj Cuh Yaucungh, naeuz:“Lwg ha, ngoenzcog mwngz lawh daxmeh saeg geu dox neix, dak ngoenz caeuq hwnz ndeu. Danghnaeuz dak ndaej hawq, meh couh ei mwngz mbouj haq lo; danghnaeuz dak mbouj hawq, mwngz couh gaej gienq meh lo.”

Geu dox neix dwg aeu mae’ndaij daeuj daemj baenz, cungj buh neix youh na youh co, miz di yakyawj, mboujgvaq, daenj youq gwnz ndang ndaej dangj nit dangj heiz. Gyoengq bouxhoj guhhong seiz, gyaez daenj cungj buh neix daeuj dangj heiz. Cungj buh neix saeg le gig nanz hawq, aeu miz ndithaenq dak ngoenz caeuq hwnz he cij ndaej hawq.

Ngoenzneix haetromh, ndit raeuj mbwn seuq. Cuh Yaucungh ngiengxgyaeuj yawj mbwn baez ndeu, sim caeg angq, gag ngeix: Ngoenzneix dwg ndithaenq bw!

Sugvah naeuz “vunz suenq mboujyawz mbwn suenq”. Liuh mbouj daengz haeuj haemh le doek raqfwn hung ndeu. Geu dox daxmeh deng fwn rwed ndaej ndaekyaiyai, lij miz raemx yag doek dem. Cuh Yaucungh ndawsim hemq hoj hemq haemz, roxnyinh mbouj miz banhfap laengz daxmeh lo.

Daxmeh nyinhcaen naeuz:“Lwg ha, mbwn yaek doek fwn, meh aeu haq vunz, gij saeh mbwn dingh raeuz euq mbouj gvaq ne!”

Cuh Yaucungh mbouj guhsing lo. De cijndei dawz saehcingz daxmeh lwnh hawj vuengzdaeq nyi, youz vuengzdaeq dingh coih.

Vuengzdaeq dingq le, gamjdoengh dangqmaz. Cuh Yaucungh mbouj rox gij saeh daxmeh de, dauqfanj gouz swhgeij hawj meh de laeb baizfangh, neix gvaiq mbouj ndaej de. Ndigah vuengzdaeq riuhaha naeuz:“Mbouj gvaiq boux mbouj rox, mienx coih mwngz lo. Daxmeh mwngz yaek haq vunz, caih de haq ba!”

Cuh Yaucungh dingq le soeng gaemz heiq raezrangrang ndeu, ndawsim gag naeuz:“Vuengzdaeq caen doengheiq, hix dwg boux simndei ndeu. Ngoenzlaeng gou guh hak, hix aeu vih beksingq gangj vah, mbouj hawj gyoengqde gwn vei roxnaeuz souh ien’uengj.” Siengj daengz daxmeh ndaej caeuq lauxsae de gvaq ndwenngoenz, gwn haemz buenq ciuh dauqdaej miz vunz buenx lo, Cuh Yaucungh rimhoz raixcaix.

Cuh Yaucungh yaek bae Baekging guh hak seiz, heuh daxmeh caeuq lauxsae hix bae riengz. Daxmeh caeuq lauxsae baenzlawz cungj mbouj nyienh bae, lau hawj de dem mazfanz. Daxmeh naeuz:“Seizneix gou caeuq lauxsae mwngz lij gwn ndaej guh ndaej, songdou doxing doxbaengh, mwngz cuengqsim bae ba. Caj daengz ngoenz dou ndang yieg goq mbouj ndaej swhgeij le, caiq bae riengz mwngz hawj mwngz ganq.” Lauxsae de naeuz:“Gou haengjdingh ndeindei ciuqgoq daxmeh mwngz, cuengqsim ba.” Cuh Yaucungh naeuz:“Gij aencingz naekna song bouxlaux sou, gou ciengzlwenx mbouj rox lumz. Caj gou youq onj youq gvenq le, dauqdaeuj ciep sou.” Gangj sat, de baiq bouxlaux sam mbat couh lizbae lo.

Coenz vahgeq “mbwn yaek doek fwn, meh aeu haq vunz” couhdwg daj aen gojgaeq neix ok daeuj.