Gou vaiqvit youh cingsaenz gvaekgvaek, raq heiq mboujfug saw haenx youh mauh okdaeuj lo. Byaij mbouj doeng cib yienh gih ndeu gungh- anhgiz, gou couh bae byaij cib yienh gih ndeu baicuzsoj! Gou rox baicuzsoj gvi gungh’anhgiz guenj, hoeng gou mboujguenj baenzlai, giendingh yiengq aen dem aen baicuzsoj lajmbanj byaij bae. Couh yienghneix, gou bungz raen Yizgyangh Baicuzsoj sojcangj Cinz Naijgvei lo.

Yizgyangh dwg aen yangh iq bien’gyae ndeu. Cinz Naijgvei naeuz: “Daeuj gizneix dang gingjcaz aeu miz di bonjsaeh caeuq bouxwnq mbouj doxdoengz he cijndaej, mwngz miz gijmaz bonjsaeh caeuq bouxwnq mbouj doxdoengz?” Gou couh ndenq caet bet cib hot sei hawj de.

“Couh gijneix?” De ca di couh diuq hwnjdaeuj lo, de ganjnaeuz gou aiq naeuz nyingz cungq cinj raixcaix, doxbanj doxhoenx sam seiq boux vunz cungj hingz mbouj gvaq gou, daengjdaengj. Doenghgij neix gou cungj rox, dangguh boux hagseng gingjyau ndeu, doenghgij goengfou neix cungj aeu miz, ndigah gou mbouj dawz de dangguh gij bonjsaeh caeuq bouxwnq mbouj doxdoengz, cix dawz sij sei dangguh gij bonjsaeh caeuq bouxwnq mbouj doxdoengz, couh lumj boux vunzguhnaz seiqcawq angj naeuz, bonjfaenh cawz rox dajndaem le, lij rox dub diet.

“Hagdangz dou couh gou boux vunz dog rox sij sei.” Gou naeuz.

“Miz bonjsaeh raixcaix bw,” Cinz Naijgvei naeuz, “gijneix caen dwg mwngz sij?” Lwgda de dingz youq gwnz sei yaepyet ndeu, dingz youq gwnz naj gou nanz raixcaix. Gou naemj, de haengjdingh coengzlaiz mbouj raen gvaq baenzlai sei, aenvih de mbouj saenq baenzlai sei dwg boux hagseng gingjyau ndeu sij okdaeuj.

“Dwg ha.” Gou naeuz.

“Yienghneix mwngz vihmaz lij aeu dang gingjcaz? Mwngz dwg mbouj dwg seizseiz yaek caeuq boux vunzfamh dwgngeiz ndeu doeg sei, yienzhaeuh caj de daengx naj lae raemxda, lauxlaux saedsaed nyinh coih ha?” Gou ngauzngauz gyaeuj. Gij sei gou mbouj baenzak law.

Gou naeuz: “Dinfwngz lai mbouj at ndang, gou aeu sij sei dangguh bonjsaeh caeuq bouxwnq mbouj doxdoengz, dwg aenvih sij sei ciengzseiz ndaej hawj gou roxnyinh miz mingzdaeuz, roxnyinh mbouj roxnyinh miz mingzdaeuz dwg gij biucinj youqgaenj dagrau gingjcaz maenh’ak mbouj maenh’ak, neix caeuq nyingz cungq cinj mbouj cinj doengzdaengj youqgaenj.” Dingq gou baenzneix gangj le, lwgda Cinz Naijgvei daj gwnz naj gou nodcienq daengz gwnz sei bae, raq rumz ndeu daj gwnz fwngz de gienj hwnjdaeuj, caet bet cib hot sei yaepyet couh deng de fan liux lo.

“Louz roengzdaeuj ba.” Gou ganjnaeuz de doengzeiq aeu gou lo, ndaw sim angqvauvau, siengj mbouj daengz de ciep roengzdaeuj naeuz: “Mwngz ndaej baema lo.” Laxlawz de cij hawj gou louz sawsei roengzdaeuj. Mboujgvaq gou senq couh bwh ndei, aenvih ndaw daeh gou caepcawq miz haujlai faenh gij doxgaiq neix. Gou yiengq Cinz Naijgvei ngaem gyaeuj baiq baez ndeu, yienzhaeuh cienq ndang, giendingh dwk yiengq lingh aen baicuzsoj byaij bae. Daengx aen seizhah, gij seizgan gou cungj yungh youq gwnz roen bae baicuzsoj. Gyoengqvunz ban gou mizmbangj hwnjfangj、mizmbangj doxhoenx doxnauh、mizmbangj ra youx ra cienz、mizmbangj sou cienzbaujhoh、mizmbangj guh loeghabcaij, gyoengqde youq henz ndang gou gouznge’nge, daejdaej nauhnauh, hawj gij ginglig ra hong gou gyahaeuj haujlai yienhsaed saekcaij. Doenghboux deng gou dangguh doengzsaeh ngoenzlaeng haenx, doiq gou miz ndei miz rwix, doiq gou ndei seiz dang gou dwg vunz bonjfaenh, lij cingj gou gwn laeuj, doiq gou mbouj ndei seiz dang gou dwg vunzfamh, fokfok ndaqndaq gou.

Gou yien gvaq saek bak fajfwngz, louz roengz saek bak faenh sawsei——Gyoengqde caeuq mbangj caizliuh cuengq youq itheij, yienh ndaej godog caeuq nyieg’iq.

Seizhah ca mbouj geijlai gvaqbae seiz, gwnz bauqceij daengh ok gij siusik gingjcaz moq hwnj gangj. Gou sojmiz roengzrengz cungj begsai lo. Daxboh gou naeuz, danghnaeuz ra mbouj ndaej hong, couh gaej baema raen de. Gou caen mbouj baema raen daxboh gou, cix dwg caeuq doengzban doengzhag Vangz Cenzfuz benz hwnj aen banci bae Gvangjdungh dang baujanh.

Seizneix gaenq dwg seizcou lo, ndaw daeh gou lij euqgengz dwk cuengq miz gij sei gou, gyoengqde buenx gou gvaq aen seizhah boihseiz ndeu, seizneix, doenghgij sawsei neix couh lumj beixnuengx cainanh, caeuq gou caez buet coh gij saedceij mbouj rox baenzlawz yiengh haenx. Youq gwnz banci roen’gyae, gou caeuq Vangz Cenzfuz nem geij cib boux fuzyenz ginhyinz yaek bienqbaenz baujanh haenx baknaek mbouj gangjvah, yienghneix, gij sing go gwnz banci couh yienhndaej coeg rwz raixcaix, Couh Gezlunz 《Dunghfunghbo》、 Linz Cingez 《Gyanghnanz》、 Dauhlangz 《Siengjniemh Canyouj》、 Yanghyangh 《Duznou Gyaez Haeux- san》……Doenghgij go neix fanfan foekfoek ciengq, gou dingq ndaej naet raixcaix. Gou caeuq fuzvuyenz naeuz, ndaej mbouj ndaej hawj sing go daemq dihe, fuzvuyenz mboujhaengj, de naeuz: “Neix dwg ciroen’gyae, sing go iq le, bouxhaici yungzheih raninz, ok cihux le bouxlawz dangrap? Caeuq minghvunz doxbeij, singyaem coeg rwz miz maz gvanhaeh?” Gou cijndaej laebdaeb nyaenx roengz- bae.

Geijcib boux raeuz dwg youz ranz lauzvu gunghswh ndeu cujciz hwnjdaeuj, raeuz aeu daengz Gvangjdungh cib geij giz diegguhhong, henhoh gij gangdiet caeuq suijniz gizhaenx, hawj gij ranzlaeuz Gvangjdungh baez caengz baez caengz maj doxhwnj. Gou youq Ginhcwngz Si cib yienh gih ndeu baicuzsoj bungq ding le, doiq bonjfaenh mbouj miz saek di saenqsim lo. Gou buet bae ra Vangz Cenzfuz, gij simcingz Vangz Cenzfuz hix rwix raixcaix. De caeuq gou doxlumj, hix camgya dijgenj lo, hoeng mbouj rox gijmaz saeh, mbouj ndaej haeuj daengz ndaw gvaengx baihlaj. Yaek ra vunz bang, ndaw ranz de nyinh boux daeggoux moq ndeu, gyau sam fanh maenz hawj daeggoux moq neix, hawj de bae doeng doeng gvanhaeh. Doeklaeng cienz soengq okbae lo, hoeng gvanhaeh doeng mbouj ndaej, yienghneix ranz de couh caeuq boux daeggoux ngamq nyinh neix doxceng doxnauh hwnjdaeuj. Vangz Cenzfuz caiqlij fak daeggoux moq sam fajfwngz, fajfwngz bonjfaenh cungj deng fak gawh liux. Daxboh yawj cik fwngz deng sieng de, naeuz: “Couh yienghneix lij siengj dang gingjcaz, hoenx vunzvaih, vunzvaih mbouj miz saeh, bonjfaenh dauqfanj deng sieng.”

Gou raen de seiz, de byom bae haujlai, song lwgda youh loet youh hoengq. De yaengx mbaw biuj ndeu yaek bae dang baujanh, buenq ngoenz hix gangj mbouj ok vah. Gou naeuz: “Cenzfuz, gou caeuq mwngz caez bae, vunz cungj aeu miz vanj haeux ndeu gwn.” Vangz Cenzfuz naeuz: “Mbouj gamsim ho, gij ciennieb gou baenz ndei.” Youq hagdangz seiz, Vangz Cenzfuz dwg boux ceiq ak hagsib ndeu. “Sam fanh maenz, couhdwg meh de sam diuz ndoksej, ndaej mbouj bae ma?” De youh naeuz.

Banci youq gwnz goengloh ngeihgaep haibae, youq sing go coegrwz Couh Gezlunz、coegrwz Linz Cingez、coegrwz Dauhlangz、coegrwz Yanghyangh, gou mbouj rox, aen mingh gou seizneix cingq caegcaeg gaijbienq. Seizneix gou ca mbouj geijlai gaenq bienqbaenz boux gingjcaz ndeu lo. Youq banci hai bae Gvangjdungh ndaej diemj cung ndeu le, Yizgyangh Baicuzsoj sojcangj Cinz Naijgvei hai aen mozdozceh sam loek gyaep gou daeuj lo. Youq neix gaxgonq, de hai cisamloek bae ndaw ranz gou, ranz gou gizhaenx cingq bongj rumz doek fwn, roen bya hoj byaij coeg vaih aen loekci de, de soemh gumzgumz gemxgemx daeujdaengz ndaw ranz gou seiz, gaenq bienqbaenz boux vunzboengz ndeu, ngamq haeuj bakdou de couh daih hemq aen mingzcoh gou sij sei yungh haenx, hix couhdwg mingzbit gou: “Vangz Dujlu! Vangz Dujlu youq mbouj youq?” Daengx ranz dou yawjraen boux gingjcaz daengx ndang lae raemxboengz neix, bak heuh gij mingzcoh sengswtswt ndeu, roxnyinh geizheih raixcaix.

（2）