●“Gou dawz 500 lai duzgaeq duzbit daeuj, gai bae liux gvaq, ndaej cienz lai raeuh, aenq ndaej 20000 lai maenz, neix hawj gou gwngwn daenjdaenj yied daeuj yied ndei.”6 nyied 24 hauh, Yungzanh Yen Daboh Yangh Luzgiz Cunh boux ranzduetgungz Veiz Gvangh- cwngz sim angq naj riu. Ngoenz de, aen yienh neix nungzyezgiz gunghvei dingh dieg cawx huqdoj seuqcingh lajmbanj, cawx 768 duz gaeq、256 duz bit daengj, baengh neix okrengz bang- coengh gyoengqvunz gungz- hoj gyalai souhaeuj.

(Liuz Liengzcunh)

●6 nyied 24 hauh banhaemh, Denzyangz Gih Aensingzgeq Denzcouh Cinghyinz Yajyen gawjbanh baez doxdax yaemz faengx ndeu, dawz“simmaez duen- ngux·vunz angq faengx lai”guh cawjdaez, mizyinx dangqmaz, dazyinx haujlai vunz daeuj camgya, baenz- neix guh hawj ndawbiengz gvaq ngoenzciet duenngux hoenghhwdhwd.

(Vangz Gozsin)

●Bineix doxdaeuj, Lingzyinz Yen Yinzse Giz itsim roengzrengz, caez yungh lai cungj banhfap, haenqrengz guh hong fug- saeh nungzminzgungh dauq guhhong. Seizneix, aen yienh neix gaenq soengq 1137 boux nungzminzgungh ok rog guhhong（baudaengz 398 boux vunzhong ranzgungz- hoj）, ndawde 1058 bae Guengjdoeng, 62 boux bae Cinghhaij, 17 boux bae Fuzsuih Yen.

(Lij Sunvaz)

●6 nyied 25 hauh, Hocouh Si Bazbu Gih Lenz- dangz Cin Sinhlenz Cunh, bouxcujciz ndeu youq gwnz vangj dangciengz cig boq aen hozdung suek faengx. Ngoenz de dwg ngoenzciet duenngux, Hocouh Si Duz- suhgvanj mbeguh aen hoz- dung suek faengx neix：“Ngoenzciet raeuz——faengx homngeungeu, menh gwn ciet donqngux”, ciuq gij guhfap gaeuq suek faengx.

(Liu Cujbingz)