“Dahlingz baenz caeux bae giz- lawz la?” Mehlingz cawj cug ngaiz- romh, caengz raen Dahlingz haeuj daiz, couh haeuj rug bae heuh de, raen ndaw rug hoengqvangvang, swnhbak cam goenggvan coenz he. Bohlingz cingq nyaengqnyinyi dajcoih aen ci rag huq, ndawsim caenh naemj baenzlawz lai rag di huq, cauh cienz ma ciengx 4 aen dungx ranzvunz, mbouj dawz haeujsim han:“Aiq bae lienhndang luba.” Mehlingz youh cam daeglwg gaenq ndaej 7 bi, daeglwg hix naeuz mbouj rox.

Sam vunz gwn ngaizromh sat, Bohlingz hai ci bae rag huq, daeg- nuengx Dahlingz cix haeuj rug bae hwnj vangjgoq. Deq daengz 7 diemj lai cung, caengz raen Dahlingz dauqranz, Mehlingz sim diuqbubbub. Dahlingz mbouj dwg deuz okrog bae ba?

Mehlingz youq diegyouq henz- gyawj baenqbangh cimhra, hoeng, ngumhngaeuz cungj mbouj raen. Mehlingz ganjvaiq dwk denva heuh Bohlingz dauqma. Gvanbaz haici okbae gvaengxgvax geij diuz gai, daengngoenz swng daemx 5 caengz laeuz sang lo, gvanbaz cij ngeix daengz bae baicuzsoj bauqanq.

Boux gingjcaz ciepdaih songde, vunz gig yiedsim, aeu bit geiq ndei le, doq daj denva coh baihgwnz veibau, youh sikhaek anbaiz vunz haici okbae cimhra. Sat le daengq gvanbaz de maranz deq denva.

Mehlingz baenzlawz youq ndaej onj, de heuh Bohlingz caiq haici ok gai bae ra, de couh naemj banhfap bae ra. Byaij youq gwnz roen, Mehlingz raen vunz couh cam. Lij aeu fwngz dagdag raurau, naeuz dahlwg de ndaej 14 bi, vunz sangseuq, miz 1.5 mij sang. Cam gvaq cibgeij boux, mbouj dwg ngauzgyaeuj couhdwg bifwngz, miz boux simndei lij nai de song coenz. Yienghneix guh, lumj duz nengznyaen fouzgyaeuj nei, luenh bungq luenh ndonj, mbouj ndaej.

Mehlingz simdingh roengzdaeuj, lumj cuengq denyingj nei youq ndaw uk naemjnaemj gij saeh geij ngoenz neix. De fwt siengj daengz gienh saeh ngoenzlwenz. Ngoenzlwenz banhaet, Mehlingh mwh okdou bae cawx byaek, lumj bingzseiz nei daengqvah Dah- lingz caeuq daeglwg yaek ciuqseiz hwnj vangjgoq, gaej dam guhcaemz. Cawx byaek dauqma, Mehlingz lau ndwet song boux lwg, couh laeglemx gven dou, laeglemx yamq haeuj ranz ma, de youh sibgvenq nyengqda ndumq haeuj rug bae, cix yawjraen song cejnuengx de cingq angq- fwngfwng boenz denswj youzhi. De doq ndatheiq ndaqnaeuz:“Sou mbouj nyinhcaen dingq vangjgoq, lij caeg boenz youzhi dem. Daegnuengx iq mbouj rox, dahcej hix mbouj roxsoq ha. Caiq boenz, gou dawz gvenggvak bae.”

Dahlingz iet linx myemmyem, ganjvaiq dawz doxgaiq sousib cuengq ndei. Dahlingz mbouj dwg aenvih gienh saeh neix couh deuz okrog ba? Hix cojgvaq lwgnyez lo, fat binghraq doxdaeuj, lwgnyez hix riengz boux- hung caez gyaeng youq ndawranz, baez gyaeng couh sam ndwen lai, baenzlawz mbouj mbwq, gaej naeuz lwgnyez lo, vunzhung cungj yaek fatbag bae. De dwg mbouj dwg yiemzmbwq doegsaw le, hixnaengz deuzhag suenq lo. Ngeix daengz gizneix, Mehlingz ganjvaiq bae ra Vangz lauxsae banhcujyin dahlwg, camcam Dahlingz youq ndaw hag- dangz gij cingzcik hagsib baenzlawz yiengh.

Byaij daengz aen siujgih Vangz lauxsae youq, baujanh naj saep- saengsaeng laengz de youq baihrog bakdou, naeuz seizneix fuengzraq youqgaenj, vunzrog mbouj ndaej haeuj siujgih. De cij ndaej dwk denva cingj Vangz lauxsae okdaeuj. Vangz lauxsae ndaejnyi boux hagseng de deuz okrog bae, hix simgip raixcaix, coenz lai mbouj naeuz, doq buet roengz laeuz okdaeuj raen naj Mehlingz. Song boux cungj raek goujcau ndwn youq doiq- naj. Vangz lauxsae naeuz, gij cingzcik Dahlingz ndei dangqmaz, gig haeujsim hagsib, mbouj raen de yiemzmbwq gvaq. Naeuz sat, youh nai Mehlingz naeuz, “Mwngz gaej you, gou fat siusik haeuj ndaw ban veihsinginz bae, cingj gyoengq doengzhag doxcaeuq cimhra, vunzlai ra ndaej vaiq.” Mehlingz coh Vangz lauxsae gungjhwet baiq baez he, couh byaijgoemgoem deuz lo.

Mehlingz biek Vangz lauxsae le, youh naemj daengz, dahlwg dwg mbouj dwg damzyoux ni? Seizneix miz noh miz bya gwn ndei yingzyangj gaeuq, lwgnyez ndangdaej cungj majbongh, cib sam seiq bi vunz couh maz cungj rox lo. Baez ngeix daengz gijneix, Mehlingz daengx ndang doq hwnj naenggaeq, ndaw uk yut ok gij ciengzmienh lwedyanyan daeuj. Gij haenx dwg dahlwg meh hujgeiq de, aenvih dahlwg damzyoux, deng daxboh fok geij coenz, doq hozgaek geggeg bae diuq laeuz. Dahlwg ciengx ndaej 14 bi lo, yaepyet couh song mbiengj doxbiek, bouxbyoemhau soengq boux- byoemndaem. Hai! Caen hojlienz aen sim bohmeh lajmbwn lo. Mehlingz yied ngeix yied lau, de sikhaek buet bae ra Dahfangh. Dahfangh dwg dah doengzhag ceiq ndei Dahlingz. Dah- fangh ndaejnyi Dahlingz liz ranz deuz okrog bae, hix dungxcieg fubfub, de doiq Mehlingz naeuz:“Daxheiz, mwngz gaej gip, gou ngoenzngoenz caemh de caezyouq, ceiq roxyiuj de lo. Gaej naeuz damzyoux lo, lienz gij vah neix cungj caengz dwen gvaq. De mbouj dwg yiengh vunz neix. Mwngz aeu saenq gou.”

Gwnz gai dienhdaeng rongh- sagsag, ndaw singz dauqcawq sing vunz cauzhoho. Mehlingz naiq- nueknuek yamq haeuj ranz ma, din baez unq, doq gyad naengh roengz sahfaz bae. Ndaw uk caenh couxrim gij yiengh dahlwg swhgeij. Daj iq daengz 14 bi, Dahlingz cungj dwg dah gvaigvetgvet ndeu, de roxsoq gvaq doengzban lwgnyez, mbouj yungh bohmeh coi, de gag rox bang bohmeh cawj ngaiz, baet ranz, miz baez lij bang daegnuengx saeg buhvaq, de mbouj laebluenh cam bohmeh aeu cienzsawj. Song ngoenz gonq, de siengj cawx aen soujgih ndeu, Mehlingz hozunq vahswnh lwnh de nyi, seizneix binghraq youqgaenj, bouqfaenj gven dou song ndwen lo, mbouj ndaej cauh saek faen cienz. Seizneix baihgwnz ngamq hawj haidou, hoeng, cix mbouj miz geijlai hek. Daxboh bang vunz rag huq hix cauh mbouj ndaej geijlai cienz. Ndawranz seizneix mbouj miz cienzyawz lo, deq gvaq ciengz binghraq neix menh cawx. Dahlingz couh mbouj ok sing lo, gag naebsim bae guh cozyez. Nanzdauh naeuz, de gag aeuqheiq ndaw hoz, caeg deuz okrog bae guhhong rom cienz cawx soujgih? Mehlingz youh gag ngauz- gyaeuj sigsig, dahlwg de mbouj dwg yiengh vunz neix.

Mehlingz sim goenj baenz feiz, ukgyaeuj bongz dwk yaek aq. De naemj mbouj ok Dahlingz dauqdaej vihmaz deuz okrog bae. De byaij haeuj ndaw rug Dahlingz, gizneix fanfan, gizhaenx boekboek, muengh ndaej ra raen de louz saekdi vah. De mbon daehsaw lumhlumh, youh dawz gobwnj saeujsaeuj. Gwnz congz, daizsaw, de song da gyaeploekloek, mbouj cuengq gvaq saek giz. Sawqmwh, youq bonj- cozyez gwnz daiz, Mehlingz yawjraen mbaw ceij sij miz geij hangz cih ndeu, de doq gaem hwnjdaeuj vaiqvet yawj roengzbae. Yawj sat, Mehlingz raemxda doq loenqbyoegbyoeg. Gwnz ceij sij naeuz:

Daxboh daxmeh, sou dwgrengz lai lo. Sou ciengx cejnuengx dou yungh bae haujlai cienz. Gou mbouj siengj hawj bohmeh vih gou baenzlai sinhoj lo. Sou gaej ra gou, gou okrog bae gag ra cienz gwn. Deq gou miz cienz le, gou couh soengq ma hawj ndawranz. Sou louz cienz soengq daegnuengx hwnjhag ba.

Dahlwg sou: Dahlingz

4 nyied 24 hauh

Mehlingz doq uet raemxda, doq gag damzbyoedbyoed:“Dahniq ha dahniq, mwngz baenzlawz yienghneix naemj, nanzdauh daxboh daxmeh ciengx mbouj ndaej mwngz ha, caj mwngz hung le, menh bang bohmeh ra cienz ciengx ranz ha.”

Cingq youq seizneix, aen soujgih de yiengj lo. Mehlingz doeksaet yat, de saenzdwddwd ciep soujgih:“Gou……gou dwg Mehlingz, mwngz dwg……” “Gou dwg baicuzsoj, mwngz seizneix youq gizlawz?” “Gou youq ranz, dahlwg gou baenzlawz yiengh lo?” Mehlingz aensim yaek saet ok aek daeuj lo. “Dahlwg mwngz ra raen lo.” “Caen ha?!” Mehlingz gikdoengh ndaej angqhemq hwnjdaeuj, ngamq siengj cam de seizneix youq gizlawz, doiqfueng youh naeuz:“Mbouj- gvaq——” Mehlingz sim baez cieg, doq gat vah ciep cam:“Mboujgvaq maz la?” Doiqfueng ndwnj gaemz myaiz he le, cij menhmenh naeuz:“De mbouj siengj maranz, cingj mwngz daeuj baicuzsoj ciep de baema.” O! Dwg yienghneix. Mehlingz soeng gaemz heiq he, fajnaj doq haiyab.

“Dahniq……” Youq ndaw bai- cuzsoj, Mehlingz gotdawz Dahlingz daejngoegngoeg, “Langh mbouj miz mwngz, daxmeh baenzlawz lix ha.” Bohlingz caeuq daegnuengx Dahlingz ndwn youq henz ndang, raemxda hix gvaengxloekloek. Geij boux gingjcaz riunyumnyum ngonzyawj song mehlwg neix.