Youq gingjyau raeuz, gou dwg boux yozyenz sij sei dandog ndeu. Henz swiz gou cungj dwg sawsei. Youq baez sawqmwh diemjcaz veiswngh seiz, Liuz Feih yaucangj raeuz yawjraen gij seigauj henz swiz gou, naemj cungj mbouj naemj couh cam naeuz: “Doenghgij cihsaw ndaw diengzhaex haenx dwg mbouj dwg mwngz sij ha?”

Vunz hauxseng heiq lwed vuengh raixcaix, cungj haengj youq ndaw diengzhaex fatok gij gamjcingz gyoengqde, couhcinj dwg gij hagseng gingjyau hix mbouj laehvaih.

Gou sikhaek han naeuz: “Baugau yaucangj, gou youq ndaw diengzhaex cij sij diuz ndeu.”

Liuz Feih cam: “Diuz lawz?” Liuz Feih ngamq- ngamq diemjcaz gvaq diengzhaex, gij byauhyij ndawde gaenq geiqsug youq ndaw sim lo.

Gou naeuz: “Gwnz ciengz diuz ceiq sang haenx ‘boh gou naeuz, danghnaeuz mwngz ra mbouj ndaej hong, couh gaej ma raen gou!’”

Neix dwg diuz byauhyij yungh faenjbit hoengz sij ndeu, liz sei lij gig gyae, hoeng cix dwg gij singsim ranz dou caeuq gyoengq cawjranz daengx hagdangz hagseng. Sij ndaej le, gou gag daekeiq geij ngoenz, caemh lij siengj doigawj de hawj hagdangz, dangguh vahgienq hagdangz.

Ngoenzhaenx, Liuz Feih yaucangj raeuz deng gij “seibakgangj” ndaw diengzhaex yaux ndaej sim fanz eiq luenh, dingq gou gangj sat le, hujheiq dangqmaz, minghlingh caebcomz hagseng daengx hagdangz. De aeu dawz doengh bouxsij “seibak- gangj” haenx baez boux baez boux rag okdaeuj, hawj gyoengqde dak ndit. Doeklaeng gyoengq hagseng ndwn buenq ngoenz lo, cij miz gou boux dog deng rag okdaeuj. Yiemzgek daeuj gangj, gou lij mbouj dwg deng rag okdaeuj, cix dwg cawjdoengh gagnyinh hane. Yienghneix, gou bienqbaenz huqndaejhingz ceiq hung baez hengzdoengh sawqmwh diemjcaz neix. Hagdangz doiq gou gagnyinh mbouj cuengq- soeng saek di, cawzbae fad gou cingleix gij seibakgangj sojmiz gwnz ciengz diengzhaex le, lij hawj gou geiqloekhung. Couhdwg gij cawqfad yienghneix, hawj gou youq ngoenzlaeng ra hong bungzdaengz mazfanz youqgaenj raixcaix. Doeklaeng gou gag naemj, seizhaenx danghnaeuz gou yiengq daengxgyoengq canghsei seibakgangj hagdangz raeuz hagsib, mbouj gagnyinh youq gwnz ciengz diengzhaex sij sei, Liuz Feih yaucangj hix mbouj miz banhfap doiq gou baenzlawz yiengh. Gou seizhaenx gagnyinh bonjfaenh youq gwnz ciengz diengzhaex sij cih, dwg aenvih yaek henhoh gij viyiemz doenghgij seisaw henz swiz gou, cingqmingz bonjfaenh caeuq doenghboux canghsei haenx mbouj doxdoengz. Gou couhcinj dwg youq ndaw diengzhaex sij sei, hix aeu sij ok gij vahdaezsingj lumj coenzvah “boh gou naeuz, danghnaeuz mwngz ra mbouj ndaej hong, couh gaej ma raen gou” baenzneix miz yienhsaed cujyi saekcaij haenx. Famh gij loekloeng gaepdaemq cawjdoengh gagnyinh le, gou couh deng doenghgij cihsaw gou sij haenx gyaep, caen bienqbaenz boux vunz ra mbouj ndaej hong ndeu lo.

Saehcingz dwg yiengneix, ngamqngamq bizye, gou couh camgya daengx gih swhfaz hidungj ciu hong gaujsi. Cuengq buengj seiz, mingzcoh gou youq ndaw buengj, caemhcaiq baizmingz youq haemq gaxgonq. Dijgenj haemh gaxgonq, daxboh lau gou dijgenj mbouj gvaq, couh daengz gwnz bya mbaet ma haujlai mbawfaex, vat ma buenq gaen duzndwen, doxgyaux le, cuengq roengz ndaw gu bae baekgoen, hawj gou naenj ndaeng gwn roengzbae, de naeuz: “Yienghneix, gij bingh daepgawh mwngz couh caz mbouj ndaej okdaeuj lo.” Daxboh gou itcig ngeiz aendaep gou gawh. Lienzdaemh cib geij bi, gyoengq daegmbauq mbanj dou youq bingmoq dijgenj seiz, cungj dwg aenvih daepgawh deng rag roengzma. Yienghneix mbanj dou gaenq cib geij bi mbouj miz vunz bae dang bingh lo, vunz vujcanghbu baez dwen daengz gij hauxseng mbanj dou couh ngauz gyaeuj dwddwd naeuz: “Daepgawh, daep——gawh.” Gyoengqvunz mbanj wnq hix riu dou, caemhcaiq an cohnoix hawj dou. Mbanj dou heuhguh Mbanjdaepvan, gyoengqvunz mbanj wnq naeuz:“Gijmaz Mbanjdaepvan, wnggai heuhguh Mbanjdaepgawh!” Hawj gyoengq hauxseng mbanj dou youq baihrog gyaeuj cungj ngiengx mbouj ndaej hwnj. Youq cungj yienghsiengq neix le, daxboh gou haengjdingh yousim gou lo, de raix mbawfaex caeuq duzndwen roengz ndaw gu caiq gya raemx, yungh feizduemh baekgoen, de baekgoen gij mbawfaex caeuq duzndwen yungz bae le cij hawj gou gwn. Daxboh gou lumj canghdajcawj cingq cawj byaekfeih nei, hen youq henz cauq siujsim fugsaeh, nanz mbouj nanz youh yungh beuz daek di ndeu okdaeuj cimzcimz, moix baez cimz le, cungj aeu buet okbae rueg okdaeuj. Yawj gij yienghceij de baenzneix, caj daxboh baekgoen ndaej le, gou gangj gijmaz cungj mbouj haengj gwn. Daxboh simgip lo, yaek ra faex hoenx gou, deng daxmeh gou laengz, daxmeh naeuz: “Gwn ba, di haemz neix cungj souh mbouj ndaej, lij dang gijmaz gingjcaz?” Daxboh youq bangxhenz couh swnhbak naeuz: “Couh dwg lo, di haemz neix cungj souh mbouj ndaej, baenzlawz bae gaemh vunzyak?” Gou cijndaej gwn roengz dungx bae. Gou gag naemj, cijaeu hawj gou dang gingjcaz, couhcinj dwg gwn……Mbouj gangj lo. Ngoenz daihngeih, gou couh bae camgya dijgenj, doeklaeng ndang gou cingqciengz dangqmaz. Daxboh buenx gou bae dijgenj le naeuz: “Mwngz yawj, lij dwg duzndwen guenjyungh, mizyauq luba.”Daengx ranz vunz cungj vuenheij raixcaix, cungj muengh ngoenz mienhsawq vaiqdi daeujdaengz. Hoeng caj daengz doeklaeng, ndaw mingzdan mienhsawq mbouj miz gou. Daengx ranz vunz cungj daej lo. Doeklaeng gou cij rox, couhdwg aenvih gou gaxgonq youq ndaw diengz- haex sij diuz byauhyij saekhoengz“boh gou naeuz, danghnaeuz mwngz ra mbouj ndaej hong, couh gaej ma raen gou” deng hagdangq geiqfadhung, gyoengde cij mbouj hawj gou bae mienhsawq.

Gou baenzbaenz mbouj fugheiq, gyoengqde mbouj hawj gou mienhsawq, gou couh bonjfaenh gag bae, gou aeu hawj sojmiz vunz cungj rox, gou dwg geijlai maenh’ak ha. Gou mbouj rox mienhsawq lauxsae dwg bouxlawz, gou cij rox gyoengqde haengjdingh cungj dwg gingjcaz. Ndigah gou siengj gou itdingh aeu hawj engqlai gingjcaz cungj rox, miz boux yozyenz gingjyau heuhguh Veiz Cunghsiengz ndeu goengfou maenh’ak raixcaix.

Gij cingzgingj seizhaenx cungj lij baij youq dangqnaj. Ndaw daeh gou oet miz caet bet cib hot sei fatbiuj youq gwnz bauganh caeuq faenh genjliz sij ndaej sei cingz eiq noengz ndeu, haeujok gak aen gungh’anhgiz cib yienh gih ndeu youz Ginhcwngz Si guenj haenx, youq dangqnaj haujlai vunz doisiu bonjfaenh. Mizseiz gou dawz gij sei okdaeuj gonq, mizseiz gou youh dawz gij genjliz gou okdaeuj gonq, hoeng gwnz naj gou, cwkrom gij biujcingz daxboh daxmeh gou、gij biujcingz daengx ranz dou gya youq fajnaj byom gou, lumj faj moegngeg daiq lwed ndeu nei.

Gyoengq lingjdauj gungh’anhgiz cungj yied- cingz raixcaix, mboujlwnh dwg sei roxnaeuz genjliz, gyoengqde cungj nyinhcaen yawjdoeg, riengzlaeng, gyoengqde ca mbouj geijlai lumj doxiu nei, cungj yinx diuz roennaj engqgya ronghsag haenx hawj gou: Bae vwnzva’gvanj.

Gyoengqde hawj gou bae vwnzva’gvanj, lij mbouj dwg aenvih gij sei gou, cix dwg roxnyinh cijmiz gizhaenx, cijndaej yungz gij loekloeng gou luenh daz luenh sij haenx. Gou mbouj haengj bae vwnzva’gvanj, gou mboujhaengj bae giz deih- fueng miz baenz bang vunzdajsij haenx. Linghvaih gou euqgeuz nyinhnaeuz, baicuzsoj beij vwnzva- gvanj engq aeu yungh canghsei, canghsei youq baicuzsoj beij youq vwnzva’gvanj engqgya miz- yungh. Gou lumj boux vunzseng’eiq gai huq nei, yunghsim raixcaix, itsim siengj aeundaej. Doek- laeng, byaij doh cib yienh gih ndeu sojmiz gungh’anhgiz le, gou lumj boux vunzfamh ngamq ndaej cuengq okdaeuj nei, doeknaiq dangqmaz.（1）