Cuj gadangz neix, doenggvaq 10 “soengq cej”, byaujdaz ok gyoengq cejnuengx ndaw gyog ndaw mbanj gij gamjcingz hoj biek hoj liz.

Miz cuj gadangz ndeu heuhguh《Ga Cib Maenz Ngaenzcienz》, aeu “maenz ngaenzcienz” daeuj guh ciengq haidaeuz, ciengq ok gij cingzeiq naeklaeg caeuq vuenyungz ndaenggon haq sau, yienh’ok ranz haq sau angqangq yangzyangz. Cuj gadangz neix dwg yienghneix ciengq:

Maenz ngaenzcienz daih’it,

Okbae vit gyang haw,

Yaek siengj cawx bonj saw,

Cix dawz bog va dauq.

Maenz ngaenzcienz daihngeih,

Beixnuengx cingz naekna,

Dahcej yaek baenzgya,

Vihmaz mbouj lwnh nuengx.

Maenz ngaenzcienz daihsam,

Raeuz doengzban doengzsaemh,

Ngoenznaengz haet daengz haemh,

Raeuz doxcaemh guhhong.

Maenz ngaenzcienz daihseiq,

Cug baengz maeq guh giuz,

Cej bae gonq couh riu,

Nuengx gvaq giuz dumh hwet.

Maenz ngaenzcienz daihhaj,

Hoh cej haq gvan ndei,

Daj ngoenzneix doxbae,

Doengzcaez gvaq saedceij.

Maenz ngaenzcienz daihroek,

Caux goek hawj nuengxsai,

Muengh doegsaw baenz gvai,

Dungx miz caiz miz maeg.

Maenz ngaenzcienz daihcaet,

Duzmax baet diuzrieng,

Cej gwih max hwnj biengz,

Riengz gvan roemx seiqgyaiq.

Maenz ngaenzcienz daihbet,

Vunz guh et guh ceiz,

Dahcej guh ceiq ndei,

Nuengx seiqseiz cungj ngah.

Maenz ngaenzcienz daihgouj,

Ndaejhoengq daeuj cet haw,

Gwnz hangz goenh lienz caw,

Baij daengx haw rimsad.

Maenz ngaenzcienz daihcib,

Nyib buhmoq dauqranz,

Bohmeh daenj gwnz ndang,

Angqyangz gvaq bi geq.

Ciengq gadangz daj ciuh lawz hainduj hwng hwnj, gou cungj mbouj miz banhfap bae gaujcaz cingqsaed, hoeng daj gij neiyungz ciengq fungfouq lai yiengh caeuq gij biuj- yienh soujfap daeuj yawj, haengjdingh youq duenh seizgeiz ndawde haemq hwngfat. Hoeng, cungj fungsug laux- coz haengjgyaez、coi vunz hag ndei neix, youq mwh “vwnzva dagwzming” cib bi doenghluenh ndawde deng dawz daeuj guh “seiq gaeuq” baet- cawz bae, yienghneix gij singyaem ciengq gadangz gyaeundei、rwenzrwz maez vunz neix cix deng siusaet bae seuqsat, saedcaih miz di hojsik.

Gaenh geij bi neix daeuj, gwnz biengz miz raq rumz “henhoh feih vuzciz vwnzva yizcanj” ndeu ci daeuj, gak cungj vwnzva maenhndei gaeuq- geq cix lumj goeknywj geq feiz coemh gvaq bungz rumzcin nei doxcanj dauq did ngaz. Gadangz hix mbouj laehvaih, Nazheuj dou miz geij naihlaux caet bet cib bi uk haemq gvai haenx gag comz baenz aen doihgadangz ndeu.

Yienznaeuz gaijgwz hailangh le, gij laexciet aeubawx haqlwg gwnz biengz bienq lo, ranz lwgmbwk okhaq caiq hix mbouj miz vunz ciengq gadangz lo. Hoeng aen doihgadangz neix ngoenznaengz lij doxiu comz youq laj goreiz gyang mbanj roxnaeuz dieghoengq henz rij naj mbanj gag ciengq gag angqmbupmbup. Vwnz- gvangjcan ndaw cin rox le lij soengq buhvaq hawj gyoengqde, gujli caeuq haeujcoengh gyoengqde. Aiq dwg aenvih aen doihgadangz moq neix ciengq ok le “cingq naengzliengh”, ciengq ok le gij cujsenzliz seizdaih moq, couh ciemhciemh miz haujlai bouxcoz haengj daeuj dingq haengj daeuj yawj lo. Baez daengz ngoenzciet roxnaeuz ngoenz miz saeh’angq, gyoengqde lij ndaej iucingj daengz cunhveij roxnaeuz vwnzva cungsim ndaw haw bae hwnjdaiz ciengq gadangz. Gyoengqde miz cuj gadangz heuhguh《Ga Daengq Lwgmbwk》ndeu ciengq naeuz:

“Daengq lwgmbwk coenz it,

Gaej vit meh cingzaen,

Ngoenzneix bae gietvaen,

Ngoenzlaeng ciengz dauq yawj.

Daengq lwgmbwk coenz ngeih,

Laexsoq geiq ndaw hoz,

Gingq bouxlaux bouxcoz,

Huz daengx byoz daengx gyog.

Daengq lwgmbwk coenz sam,

Nem gvan sim doxcoh,

Guhhong gaej lau hoj,

Gaenxgyaek rox miz gwn.

Daengq lwgmbwk coenz seiq,

Uk gvai ndaej baenz miz,

Hag engq lai cihsiz,

Ndaej baenz miz baenz fouq.

Daengq lwgmbwk coenz haj,

Okhaq bae ranzgvan,

Gaenx caux gya caux ranz,

Coengh bouxgvan guh saeh.

Doengq lwgmbwk coenz roek,

Daj goek gangj daengz byai,

Cograwz ndaej fatcaiz,

Niemh vunzlai beixnuengx.

Daengq lwgmbwk coenz caet,

Geiq dauhdaek vunzbaz,

Hab guh maz guh maz,

Gaej ra saeh saenzsied.

Daengq lwgmbwk coenz bet,

Aeu rox get rox humz,

Gaej veizfap doek gumz,

Guh boux vunz simsoh.

Daengq lwgmbwk coenz gouj,

Yaek haeuj doih cij baenz,

Saeh goeng’ik comz ngaenz,

Aeu gaenxmaenx guhfaenh.

Daengq lwgmbwk coenz cib,

Yienghyiengh gip gij ndei,

Cograwz ciengx lwg gyaez,

Guh yienghsae yienghmeh.”

Aen doihgadangz neix maqhuz ak, gag rox bien ciengq moq, hawj gadangz cungj yisuz ciuhlaux gaeuq- geq neix ndaej riengz seizdaih moq byaij, coi vunz byaij cingq byaij soh, hawj vunzlai ciuhneix haengjgyaez. Seizneix gaenq miz mbangj bouxcoz hainduj bae riengz gyoengq naihlaux hag ciengq gadangz lo. Gou ngeix ha, ciuq yienghneix hwngfat roengzbae, aen doihgadangz neix itdingh ndaej yied ciengq yingjyangj yied hung, ciengq hoengh Hawnazheuj, cienz daengz diegrog, cienz doh daengx biengz!（sat）