Gaga—— riengzdwk rumz banhaemh, raq sing bit hemq he daj aendaemz laeng gaiqnaz cienz gvaqdaeuj. Daj gyae yawj bae, gyoengq diemj iq he cingq menhmenh daenq gvaqdaeuj. Yi, cungj daengz banhaemh lo, bit baenzlawz lij caengz haeuj ranz? Daxbuz haengjdingh lumz gyoengqde lo! Mboujgvaq, daengz mwh hai bonjsaeh gou okdaeuj lo!

Gou youh gaenjcieng youh angq buet bae coh gyoengq bit. Gyoengq bit dingz he lij youq ndaw raemx, dingz he youq gwnz hamq. Gou ganjgip dawz diuz faexsaux raez he, youq ndaw raemx “vava” vad song mbat, couh “gyaep” gyoengq bit ndaw raemx dam guhcaemz haenx hwnj hamq lo. Hoeng cingq youq mwh gou daekeiq “gyaep” gyoengq bit hwnj hamq, bit gwnz hamq lumj dwg deng gou sawqmwh “caegguk” hwk dawz lo, “ca” mbat he couh seiq baih deuz bae. “Vei, gyoengqsou dauqma, ranzbit youq baihneix!” Gou gaemdawz faexsaux gyaep gyoengqde. Hoeng gyoengqde yied buet yied gyae. Miz duz ndeu mbouj roxsoq youh heuh coh gou sing ndeu, lumj dwg doiq gou hatmaenj. Yawj daeuj, dan yungh rengz mbouj ndaej bw, gou yaek doengh uk siengj geiqmaeuz cij ndaej lo.

Gou ra di swzliu duzbit maij gwn haenx, vanq youq henz ranzbit. Bit youq giz gyawj giz gyae cungj buet gvaqdaeuj, gou ndawsim gag angq. Hoeng youq mwhde, duzbit gwnz ndang miz diemjraiz haenx hengzdoengh fanjciengz, sawqmwh daj henz ranzbit buet bae buet dauq, lij hemq mbouj dingz. Duzbit raizndaem ciuyinx gyoengq bit he doxcaez buet. Bitraizndaem bi aen caekhaex de, daekeiq nyeux gyaeuj heuh coh gou, lumj dwg naeuz: “Daeuj vei, daeuj vei, yawj mwngz yaeuh ndaej gou lwi?” Gou youh simgip youh hozndat, din baez caij couh caij deng haexbit bae. Bitraizndaem caiq nyeux gyaeuj doiq gou “riugan”. Mwhde, gyoengq bit youh luenh- yauyau lo. Gou mbouj goq baenzlai lo, buet coh baihnaj, hoenx “bouxcoihdaeuz” duz bitraizndaem neix. Yienghneix gyaep geij baez le, bitraizndaem mbouj cingznyienh deng gou gyaep haeuj ranzbit bae lo. “Gaeb bit gaeb duzraizndaem gonq”, gyoengq “binglwg” lw roengzdaeuj haenx couh ndei doiqfouq lo.

Doeklaeng, ginglig ciengz doxgyaep he le, gou cienzbouh duq gyoengq bit haeuj ranzbit bae lo. Ginggvaq baez duq bit neix, gou hix lienh ndaej dauq bonjsaeh duq bit he lo.

Gou naengh youq gwnz diegnywj, yawj aen daengngoenz menhmenh doek roengz bya bae, ndawsim itcig naemj gyoengq bit lingzlaeux、dwggyaez haenx. Ndithaemh ciuq daengz hanh gwnz naj gou, gou naemj, hanh gwnz naj seizneix itdingh dwg ndongqndikndik, aenvih gyoengqde hix itdingh vih gou angqfaengz.

(seiq nienzgaep Dungz Sinhyi)