Baiq Yahyauz Bouxcuengh dwg aen sibgvenq ndaw beksingq Boux- cuengh daegbied ndeu laeng Denzlinz Yen Lucwngz Yauzcuz Yangh Mbanjrunghgvangh. Aen sibgvenq neix gig miz lizsij, biujyienh ok gij cingsaenz Cuengh、Yauz song aen minzcuz cungbyoengq yawjmbieng gwnzbiengz、doxgiet doxhuz、roengz- rengz hoenxguh haenx. Moix bi liggaeuq ndwencieng ngeihhaj, aen mbanj neix cungj cujciz vunzmbanj banh aen hozdung caeqbaiq Yahyauz neix.

Cienznaeuz, doenghbaez miz dahsau Yauzromj gyaeundei ndeu, caeuq Mbanjrunghgvangh daegmbauq ndeu doxmaij lo. Seizhaenx, Cuengh、Yauz song cuz gimq doxaeu, hoeng songde doxiu ngoenz ndwencieng ngeihhaj gyanghhaemh youq gwnz bo doiqfwen cienzcingz, caegcaeg dingh gig saeh songde, doeklaeng songde buq gij gvigawj song cuz, couh gapbaenz gvanbaz. Dahsau neix haq daengz Mbanjrunghgvangh le, yungh gij dinfwngz ywbingh ak de bang vunzmbanj ywbingh ywsieng, ngoenz- ciet youh cujciz vunzlai banh hozdung, hawj aen mbanj neix hwngfat hwnjdaeuj. Vunz couh heuh de guh “Yahyauz”. Gvaqlaeng moix bi liggaeuq ndwencieng ngeihhaj, vunzmbanj couh banh baenzdauq cienzdoengj hozdung lumjbaenz dwk- gyangq、dwkcik、dwkyienq、loengh saeceij、bau daehman、mbokfaiz doiqfwen、Heiqcuengh biujyienj、ngaiz daizraez daengj, biujdap gyoengqde ndiepgyaez caeuq geiq- niemh buzcoj “Yahyauz”.

Ngoenz ciet haenx, daengx mbanj vunz cungj ndang daenj buhvaq gyaeundei, doxcomz youq diegbingz baihnaj miuh Yahyauz cungqgyang mbanj haenx, banh gij hozdung caeqbaiq Yahyauz. Gyoengqvunz gagrox daj ranz dawz haeux、laeujhaeux、fwnz daengj doxgaiq bae camgya hozdung. Gyoengqde faenhong cingcuj, vunzsai gaj mou、gaj gaeq、gaj yiengz； vunzbaz couh duk haeuxfaengx、daem ceiz、guh haeuxsei；vunzlaux cix youq ndaw miuhdangz baij gij mou 、gaeq、bya、haeuxfaengx、ceiz、haeuxsei daengj doxgaiq cawj cug haenx, ciuq sibgvenq daeuj banh gij yizsiz caeqbaiq Yahyauz.

Youq aen hozdung yienhciengz “baiq Yahyauz”, miz canghfwen ndang daenj buhvaq minzcuz cienz- doengj daeuj doiqfwen, caemh miz minzcuz cienzdoengj diuqfoux biujyienj lumjbaenz foux doengz- lingz、foux nyenz. Bouxsai、mehmbwk、vunzlaux、lwgnyez cungj gyahaeuj hozdung bae, fwngz rag fwngz caez diuq foux, angqyangz raixcaix.

Doengxhaemh, ciengz diuqfoux baiq Yahyauz ceiq nauhyied haenx couh hainduj lo. Haidaeuz dwg song duz saeceij vifung okdaeuj gonq, sing gyonglaz、sing hemqndei、sing riu、sing bauqciengh gyukgyadgyad yiengj hwnjdaeuj, haprwenz youq aen lueg hoengqvangvang neix. Gaendaeuj, cib lai boux vunzsai cangqak ndang daenj gij buhvaq Yauzcuz lai cungj saek caeuq yienghsik haenx, daep gij mauhngeg lai cungj lai yiengh bae cang baenz Yahyauz. Gyoengqde fwngz rag fwngz humx baenz aen gvaengx hung ndeu, fid fwngz、vangh ga miz siengq miz yiengh dangqmaz, riengz fuengyiengq aen cung byaij cienq dwk mbouj dingz, doq eu fwen doq diuq hwnj foux cienqgien vuenheij daeuj. Bouxyawj yienh- ciengz caemh riengzdwk ciengq hwnjdaeuj：“Cingj Yahyauz gingq- gyaez yienjlingz, baujyouh lwglan cangqcwt、bingzan！”“Cingj Yahyauz saenzswng nyokfuk, baujyouh fwn- raemx ndaej yinz, guek ak minz an！” Baez ciengq daengz diemj doxangq seiz, bouxyawj caez daihsing ciengq dwk hoizdap, gyoengqde nyinhnaeuz vunz ndaej hanhaemq cix dwg ndaej fukheiq lo.

Bi 2010, baiq Yahyauz Boux- cuengh ndaej senj haeuj buek daihsam swcigih gaep feihvuzciz vwnzva yizcanj mingzloeg.